Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Uthenga Wamampha Wakutuliya Kwaku Chiuta

 Sambiru 5

Khumbu Laku Chiuta la Charu Chapasi

Khumbu Laku Chiuta la Charu Chapasi

1. Kumbi Chiuta wakulengiyanji charu chapasi?

Yehova wakutipaska charu kuti uje muzi widu. Chiuta wangulenga Adamu ndi Eva kuti azazi kuchanya cha, chifukwa ndipu walenga kali angelu akwenere kuja kuchanya. (Jobu 38:4, 7) Kweni Chiuta wanguŵika ŵanthu akwamba yaŵa mu paradayisu wakutowa yo wadanikanga kuti munda wa Edene. (Chiyambo 2:15-17) Yehova wanguŵapaska mwaŵi wakuti akondwengi ndi umoyu wambula kumala pacharu chapasi limoza ndi ŵana ŵawu.Ŵerengani Sumu 37:29; 115:16.

Pakwamba, munda wa Edene pe ndiwu wenga paradayisu. Ŵanthu akwamba akhumbikanga kuzaza charu chapasi ndi mphapu yawu. Mukuluta kwa nyengu, akhumbikanga kuthereska charu chosi ndi kuchipanga paradayisu. (Chiyambo 1:28) Charu chazamunangika cha. Ŵanthu ajengepu nge muzi wawu nyengu zosi.Ŵerengani Sumu 104:5.

2. Kumbi nchifukwa wuli charu che paradayisu cha sonu?

Adamu ndi Eva angumuvwiya cha Chiuta, ndichu chifukwa chaki Yehova wanguŵatuzgamu m’munda. Paradayisu wangumaliya penipo ndipu palivi munthu yo wangumuwezgiyapu. Bayibolo likamba kuti: “Charu chapasi chaperekeka mu janja la ŵaheni.”—Jobu 9:24.Ŵerengani Chiyambo 3:23, 24.

Kumbi Yehova wakuleka kuchitiya ŵanthu vo wakhumbanga pakwamba? Awa! Iyu ngwanthazizosi ndipu palivi cho chingamutonda. (Yesaya 45:18) Wazamuwezge mtundu wa ŵanthu pa umoyu wo wakhumbanga pakwamba.Ŵerengani Sumu 37:11, 34.

3. Kumbi Paradayisu wazamuwezgekiyapu wuli?

Paradayisu wazamuweriyapu so pacharu chapasi asani Yesu waziyamba kuwusa nge Fumu yaku Chiuta. Pa nkhondu yo yidanika kuti Aramagedoni, Yesu wazamulongozga angelu aku Chiuta pakutuzgapu ŵanthu wosi wo asuska Chiuta. Pavuli paki,  Yesu wazamumanga Satana kwa vyaka 1,000. Ŵanthu aku Chiuta azamupona pa nkhondu iyi chifukwa chakuti Yesu wazakuŵalongozga ndi kuŵavikiriya. Yiwu azamukondwa ndi umoyu mu Paradayisu pacharu chapasi.Ŵerengani Chivumbuzi 20:1-3; 21:3, 4.

4. Kumbi masuzgu ngazamumala zukwanji?

Kumbi Chiuta wazamutuzgapu zukwanji masuzgu pacharu? Yesu wangupereka “chisimikizgu” cho chazamulongo kuti charu chepafupi kumala. Asani vinthu vo vichitika pacharu mazuŵa nganu vingalutiriya, ŵanthu akhoza kumala kweniso vilongo kuti tija m’mazuŵa nga “umari wa mgonezi.”Ŵerengani Mateyu 24:3, 7-14, 21, 22.

Pa nyengu yo Yesu wazamuwusiya kwa vyaka 1,000 pacharu chapasi, wazamutuzgapu masuzgu ngosi. (Yesaya 9:6, 7; 11:9) Kweniso, Yesu wazamuja Mura wa Asembi ndi kuzifufuta maubudi ngosi nga ŵanthu wo atanja Chiuta. Ivi vilongo kuti Chiuta wazamutuzgapu matenda, ukoti ndi nyifwa kuporote mwaku Yesu.Ŵerengani Yesaya 25:8; 33:24.

5. Mbayani wo azamuja mu Paradayisu yo watuza?

Ku Nyumba ya Ufumu, mwamukumana ndi ŵanthu wo atanja Chiuta kweniso wo akhumba kuziŵa mo angamukondweske

Ŵanthu wo avwiya Chiuta ndiwu azamuja mu Paradayisu. (1 Yohane 2:17) Yesu wangutuma akumulondo ŵaki kuti akapenjipenji ŵanthu akufwasa ndi kuŵasambiza vo angachita kuti Chiuta waŵayanji. Mazuŵa nganu Yehova wasambiza ŵanthu mamiliyoni nganandi vo angachita kuti azisere mu Paradayisu yo watuza. (Zefaniya 2:3) Ku Nyumba za Ufumu za Akaboni aku Yehova, ŵanthu asambira mo anthurumi angachitiya umampha vinthu ndi awolu ŵawu kweniso ŵana, ndipuso mo anthukazi angachitiya umampha vinthu ndi arumu ŵawu kweniso ŵana. Apapi ndi ŵana asope pamoza ndi kusambira mo angayanduliya ndi uthenga wamampha.Ŵerengani Mika 4:1-4.