Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Uthenga Wamampha Wakutuliya Kwaku Chiuta

 Sambiru 15

Lutirizgani Kusambira Vakukwaskana ndi Yehova

Lutirizgani Kusambira Vakukwaskana ndi Yehova

1. Kumbi musaniyengi vitumbiku wuli chifukwa chakulutirizga kusambira Bayibolo?

Tikayika cha kuti vo mwasambira mu kabuku yaka vakuwovyani kuti muyanjengi ukongwa Yehova. Kweni titenere kulutirizga kusambira kuti chanju ichi chilutirizgi kukuwa. (1 Petro 2:2) Mukhumbika kulutirizga kukuzga ubwezi winu ndi Chiuta mwakusambira Mazu ngaki kuti muzilonde umoyu wambula kumala.Ŵerengani Yohane 17:3; Yuda 21.

Chigomezgu chinu chikuwengi asani mulutirizga kusambira uneneska wakukwaskana ndi Chiuta. Chigomezgu chikuwovyeningi kuti muchitengi vinthu vakukondweska Chiuta. (Ŵahebere 11:1, 6) Chikuchitiskeningi so kuti mulapi ndi kusintha umoyu winu ndikwamba kuchita vinthu vamampha.Ŵerengani Machitidu 3:19.

Mukhoza kuja pa ubwezi wapade ndi Yehova

2. Kumbi ŵanthu anyaki angayanduwa wuli asani imwi mwaziŵa Chiuta?

Pakuti taŵanthu titanja kukambiyaku anyidu nkhani yamampha, namwi muyesesi kukambiyaku ŵanthu uthenga wamampha wo mwasambira. Asani mulutirizga kusambira Bayibolo, musambirengi mo mungaligwiriskiya nchitu pakukonkhoske anyinu chigomezgu chinu mwaku Yehova kweniso uthenga wamampha.Ŵerengani Ŵaroma 10:13-15.

Ŵanthu anandi atamba kukonkhoska uthenga wamampha kwa abwezi ŵawu pamwenga abali ŵawu. Kweni mutenere kuchita ivi mwakuphwere ukongwa. M’malu mwakuŵakambiya kuti chisopa chawu nchaboza, akambiyeni vinthu vo Chiuta walayizga. Mutenere so kukumbuka kuti ŵanthu anandi akondweskeka ukongwa ndi jalidu linu lamampha kuruska vo mukamba.Ŵerengani 2 Timote 2:24, 25.

3. Kumbi mungaja pa ubwezi wa mtundu wuli ndi Chiuta?

Kusambira Mazu ngaku Chiuta kukuwovyeningi kuti muluti panthazi mwauzimu. Mukuluta kwa nyengu mujengi pa ubwezi  wapade ukongwa ndi Yehova. Mujengi ŵaki nge mwana wa m’banja laki.Ŵerengani 2 Ŵakorinte 6:18.

4. Mungachita wuli kuti mulutirizgi kuja pa ubwezi ndi Yehova?

Mungaja pa ubwezi wakukho ndi Yehova asani mulutirizga kusambira Mazu ngaku Chiuta. (Ŵahebere 5:13, 14) Kambiyani yumoza wa Akaboni aku Yehova kuti wasambirengi namwi Bayibolo pakugwiriskiya nchitu buku lakuti Kumbi Bayibolo Lisambizanji Weniukongwa? Mujengi ndi umoyu wamampha ukongwa asani mulutirizga kusambira Mazu ngaku Chiuta.Ŵerengani Sumu 1:1-3; 73:27, 28.

Uthenga wamampha utuliya kwaku Yehova, Chiuta walikondwa. Mungaja nayu pa ubwezi asani mutanjana ndi ŵanthu ŵaki. (Ŵahebere 10:24, 25) Asani mutesesa kukondweska Yehova, mwazamusaniya umoyu chayiwu, umoyu wambula kumala. Chinthu chakuzirwa ukongwa cho mungachita nkhuja pa ubwezi ndi Chiuta.Ŵerengani 1 Timote 1:11; 6:19.