Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Uthenga Wamampha Wakutuliya Kwaku Chiuta

 Sambiru 4

Kumbi Yesu Khristu Ndiyani?

Kumbi Yesu Khristu Ndiyani?

Kumbi ndi mijalidu niyi yo yinguchitiska kuti Yesu waje wakufikirika?—MATEYU 11:29; MARKO 10:13-16.

1. Kumbi umoyu waku Yesu ungwamba wuli?

Yesu wapambana ndi munthu munyaki weyosi chifukwa chakuti iyu wenga kuchanya wechendawi nge munthu pacharu chapasi. (Yohane 8:23) Iyu wenga chakulengeka chakwamba chaku Chiuta ndipu wawovyananga ndi Chiuta pa nchitu yakulenga vinthu vinyaki vosi. Yehova wakumulenga yija Yesu kwambula kugwiriskiya nchitu munthu munyaki weyosi, ndichu chifukwa chaki wadanika kuti “Mwana wakuwayija” waku Chiuta. (Yohane 1:14) Yesu waŵereŵetanga so m’malu mwaku Chiuta lekani wadanika kuti “Mazu.”Ŵerengani Nthanthi 8:22, 23, 30; Ŵakolose 1:15, 16.

2. Nchifukwa wuli Yesu wanguza pacharu?

Chiuta wangutuma Mwana waki pacharu mwakusamusiya umoyu waki mu moyu mwaku Mariya yo wenga msungwana wa Chiyuda. Yesu wengavi awiski a umunthu. (Luka 1:30-35) Yesu wanguza pacharu (1) kuzisambiza uneneska wakukwaskana ndi Chiuta, (2) kuzitilongo chakuwoniyapu cha mo tingachitiya khumbu laku Chiuta chinanga kuti tingakumana ndi masuzgu ndipuso (3) kuzipereka umoyu waki wambula ubudi nge “sembi.”Ŵerengani Mateyu 20:28.

3. Nchifukwa wuli tikhumbika uwombozi?

Uwombozi ndi mtengu wo ulipirika kuti munthu wawomboleki ku mulandu wo ungamuchitiska kuti wabayiki. (Chituwa 21:29, 30) Pakulenga ŵanthu, Chiuta wakhumbanga cha kuti azikotengi ndi kufwa. Kumbi tiziŵa wuli venivi? Chiuta wangukambiya Adamu kuti asani wachitengi “ubudi,” wafwengi. Mwaviyo, asani Adamu wanguleka kubuda, mphanyi wakufwa cha. (Chiyambo 2:16, 17; 5:5) Bayibolo likamba kuti nyifwa ‘yikusere’ m’charu kuporote mwaku Adamu. Mwaviyo,  Adamu wakuyambuzgiya ubudi ndi nyifwa kwa ŵana ŵaki wosi. Ndichu chifukwa chaki tikhumbika sembi kuti yitifwatuwi ku chilangu cha nyifwa cho tikwambuwa kwaku Adamu.Ŵerengani Ŵaroma 5:12; 6:23.

Kumbi ndiyani yo wenga wakwenere kupereka umoyu waki nge sembi yakutifwatuwa ku nyifwa? Asani munthu wafwa, watijipereke sembi ya vakunanga vaki. Palivi munthu wambula kufikapu yo wangapereke sembi anyaki.Ŵerengani Sumu 49:7-9.

4. Kumbi Yesu wakufwiyanji?

Yesu wapambana ndi isi, iyu wenga wakufikapu pamwenga kuti wambula kubuda. Mwaviyo, iyu wakufwiya mphulupulu zaki cha chifukwa palivi cho wakunanga. M’malu mwaki, Yesu wakufwiya maubudi nga ŵanthu. Yapa Chiuta wangulongo chanju chikulu ukongwa pakutitumiya Mwana waki kuti wazitifwiyi. Yesu nayu wangulongo chanju chikulu pakuvwiya Awiski ndi kupereka umoyu waki chifukwa cha maubudi ngidu.Ŵerengani Yohane 3:16; Ŵaroma 5:18, 19.

5. Kumbi Yesu wachitanji sonu?

Pa nyengu yo wenga pacharu chapasi, Yesu wanguchizga akutama, wanguyuska akufwa ndi kovya akusuzgika. Ivi vingulongo vo wazamuchitiya ŵanthu akuvwiya kunthazi. (Mateyu 15:30, 31; Yohane 5:28) Yesu wati wayuskika, Chiuta wangumupaska umoyu wauzimu. (1 Petro 3:18) Yesu wangulindizga kuti nyengu yaku Chiuta yikwani ndipu wanguja kujanja lamaryi laku Yehova kuti wamupaski nthazi zakuwusiya nge Fumu pacharu chapasi. (Ŵahebere 10:12, 13) Pasonupanu, Yesu wawusa nge Fumu kuchanya ndipu akumulondo ŵaki apharazga uthenga wamampha uwu pacharu chosi chapasi.Ŵerengani Danyele 7:13, 14; Mateyu 24:14.

Kwaja kanyengu kamanavi ndipu Yesu wagwiriskiyengi nchitu nthazi zaki nge Fumu kuti watuzgepu masuzgu ngosi pacharu chapasi kweniso ŵanthu wo atambisa masuzgu ngo. Ŵanthu wosi wo agomezga Yesu ndi kumuvwiya azamulonde umoyu wambula kumala m’paradayisu pacharu chapasi.Ŵerengani Sumu 37:9-11.