Julani

Lutani pa vo ve mukati

 Sambiru 2

Kumbi Chiuta Ndiyani?

Kumbi Chiuta Ndiyani?

1. Nchifukwa wuli titenere kusopa Chiuta?

Chiuta yo wakulenga vinthu vosi ndiyu wauneneska. Iyu walivi chiyambi ndipu wazamuŵavi umari. (Sumu 90:2) Uthenga wamapha wo usanirika m’Bayibolo Ukutuliya kwaku iyu. (1 Timote 1:11) Chifukwa chakuti Chiuta ndiyu wakutipaska umoyu, titenere kusopa iyu pe.Ŵerengani Chivumbuzi 4:11.

2. Kumbi Chiuta ndi munthu wamtundu wuli?

Palivi munthu yo wakuwonapu Chiuta chifukwa chakuti iyu ndi Mzimu, vo ving’anamuwa kuti ngwapachanya ukongwa kuphara ŵanthu wo ŵe pacharu chapasi. (Yohane 1:18; 4:24) Kweni tikhoza kuziŵa mijalidu yaku Chiuta kuporote mu vinthu vo wakulenga. Mwakuyeruzgiyapu, asani tiwona vimiti va vipasu vakupambanapambana kweniso maluŵa, vititiwovya kuziŵa kuti ngwachanju kweniso ngwazeru. Ukulu wa chilengedu chosi utitiwovya kuziŵa kuti ngwanthazi.Ŵerengani Ŵaroma 1:20.

Tikhoza so kusambira mijalidu yinandi yaku Chiuta mwakuŵerenga Bayibolo. Mwakuyeruzgiyapu, lititikambiya vo Chiuta watanja ndi vo watinkha, mo wachitiya ndi ŵanthu kweniso mo wachitiya pa vakuchitika vakupambanapambana.Ŵerengani Sumu 103:7-10.

3. Kumbi Chiuta we ndi zina?

Yesu wangukamba kuti: “Auskefwi mwaŵakuchanya, lipaturiki zina linu.” (Mateyu 6:9) Chinanga kuti Chiuta we ndi mazina ngaudindu nganandi, kweni zina laki lenechu ndimoza pe. Zina ili lizumbulika mwakupambanapambana mu chineneru chechosi. Mu Chitonga lizumbulika kuti “Yehova.”Ŵerengani Sumu 83:18, NW.

Mu Mabayibolo nganandi, kusazgapu lidu la Chitonga akutuzgamu zina laku Chiuta, m’malu mwaki akulembamu ŵaka kuti Ambuya pamwenga Chiuta. Kweni pa nyengu yo Babiyolo lalembekiyanga, zina laku Chiuta lasanirikanga nyengu zakukwana  7,000. Yesu wakambiyanga ŵanthu zina laku Chiuta wachiŵasambiza.Ŵerengani Yohane 17:26.

Chiuta watitilongo chanju nge po wachitiya da uyu

4. Kumbi Yehova watitiŵanaŵaniya?

Kumbi masuzgu ngo mtundu wa ŵanthu ukumana nangu, ngalongo kuti Yehova ndi Chiuta yo waleka kutiŵanaŵaniya? Ŵanthu anyaki akamba kuti Chiuta wachitiska kuti isi tisuzgikengi kuti watiyesi, kweni ili ndi boza.Ŵerengani Yakobe 1:13.

Chiuta wakupaska ŵanthu mwaŵi wakuti achitengi vinthu mwawanangwa. Tiwonga ukongwa kuti te ndi mwaŵi wakusankha kuteŵete Chiuta. (Yoswa 24:15) Kweni ŵanthu anandi asankha kuchitiya anyawu vinthu viheni, ndichu chifukwa chaki ŵanthu anandi asuzgika. Vitimuguŵiska ukongwa Yehova asani wawona vinthu vambula urunji nge venivi.Ŵerengani Chiyambo 6:5, 6.

Yehova ndi Chiuta yo watitiŵanaŵaniya. Iyu wakhumba kuti isi tikondwengi ndi umoyu. Pambula kuswera yapa watuzgengepu masuzgu ngosi ndi ŵanthu wo atingachitiska. Pasonupanu we ndi chifukwa chakuvwika cho wazomerezge kuti taŵanthu tisuzgiki kwa kanyengu. Mu Sambiru 8 ndimu tazamuziŵa chifukwa ichi.Ŵerengani 2 Petro 2:9; 3:7, 13.

5. Kumbi tingachita wuli kuti tije pa ubwezi ndi Chiuta?

Yehova watitipempha kuti tindere kufupi ndi iyu mwakukambiskana nayu mu rombu. Iyu watanja munthu weyosi pakuyija. (Sumu 65:2; 145:18) Wakhumbisiska kutigowoke ndipu waziŵa kuti titesesa kuchita vinthu vakumukondweska chinanga kuti nyengu zinyaki tinangiska. Mwaviyo, chinanga kuti te ambula kufikapu, tikhoza kuja pa ubwezi wakukho ndi Chiuta.Ŵerengani Sumu 103:12-14; Yakobe 4:8.

Chifukwa chakuti Yehova ndiyu wakutipaska umoyu, titenere kumwanja ukongwa kuruska munthu weyosi. (Marko 12:30) Mujengi pa ubwezi wakukho ukongwa ndi Chiuta asani mulongongi kuti mutimuyanja mwakusambira vinandi vakukwaskana ndi iyu kweniso kuchita vo wakhumba.Ŵerengani 1 Timote 2:4; 1 Yohane 5:3.