Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Uthenga Wamampha Wakutuliya Kwaku Chiuta

 Sambiru 10

Kumbi Chisopa Chauneneska Mungachiziŵa Wuli?

Kumbi Chisopa Chauneneska Mungachiziŵa Wuli?

“Cheŵani ndi ŵamchimi ŵatesi.”—MATEYU 7:15.

“Ŵazomera kuti mbakumziŵa Chiuta; kweni ndi nchitu zawu ŵatumkana.”—TITO 1:16.

1. Kumbi chisopa chauneneska chilipu chimoza pe?

Yesu wangusambiza akumulondo ŵaki chisopa chimoza pe, chisopa chauneneska. Chiyanana ndi nthowa yo yilongozge ŵanthu ku umoyu wambula kumala. Yesu wanguti: ‘Mbamanavi ŵatiyibowozga’ nthowa iyi. (Mateyu 7:14) Chiuta wazomerezga kusopa ko kutuliya mu Mazu ngaki, Bayibolo. Akhristu auneneska wosi ŵe ndi chivwanu chimoza.Ŵerengani Yohane 4:23, 24; 14:6; Ŵaefesu 4:4, 5.

2. Kumbi Yesu wangukambanji za Akhristu aboza?

Yesu wangutcheŵeska kuti achimi aboza azamutimbanyizga Chikhristu. Yiwu awoneka nge asopa mwauneneska. Matchalitchi ngawu ngakamba kuti ngachikhristu. Kweni ŵanthu yaŵa mukhoza kuŵaziŵa umampha. Mungaŵaziŵa wuli? Chisopa chauneneska pe ndichu che ndi Akhristu wo alongo mijalidu ndi vakuchita vamampha.Ŵerengani Mateyu 7:13-23.

3. Kumbi Akhristu auneneska mungaŵaziŵa wuli?

Wonani vinthu vinkhondi ivi:

  • Akhristu auneneska awona kuti Bayibolo ndi Mazu ngaku Chiuta. Yiwu atesesa kulondo fundu za m’Bayibolo pa umoyu wawu. Mwaviyo, chisopa chauneneska chipambana ndi chaboza cho chitende fundu za ŵanthu. (Mateyu 15:7-9) Akhristu auneneska achita vo asambiza anyawu.Ŵerengani Yohane 17:17; 2 Timote 3:16, 17.

  •   Akhristu auneneska atumbika zina laku Chiuta lakuti Yehova. Yesu wangutumbika zina laku Chiuta mwakuliziŵikiska ku ŵanthu. Iyu wangovya ŵanthu kuti aziŵi Chiuta ndi kuŵasambiza kuromba kuti zina laku Chiuta litoweskeki. (Mateyu 6:9) Kumbi nchisopa nichi cho chipharazga za zina laku Chiuta mu chigaŵa chinu?Ŵerengani Yohane 17:26; Ŵaroma 10:13, 14.

  • Akhristu auneneska apharazga va Ufumu waku Chiuta. Chiuta wangutuma Yesu kuti wazipharazgi uthenga wamampha wa Ufumu. Ufumu waku Chiuta pe ndiwu wazamuwovya mtundu wa ŵanthu. Yesu wangulutirizga kupharazga va Ufumu uwu mpaka pa zuŵa lo wangufwiya. (Luka 4:43; 8:1; 23:42, 43) Iyu wangukamba kuti akumulondo ŵaki nawu azamupharazga uthenga wenuwu. Kumbi asani munthu munyaki wangakukambiyani kuti wakhumba kukambiskana namwi va Ufumu waku Chiuta, mungakamba kuti ngwachisopa nichi?Ŵerengani Mateyu 24:14.

  • Akhristu auneneska aserezgeka cha mu vakuchitika va charu chiheni ichi. Mungaŵaŵanika chifukwa chakuti aserezgeka cha mu ndali ndi mphindanu za charu. (Yohane 17:16; 18:36) Kweniso yiwu atoliyaku cha vakuchitika viheni ndipuso vakofya va m’charu ichi.Ŵerengani Yakobe 4:4.

  • Akhristu auneneska atanjana ukongwa. Mazu ngaku Chiuta ngatiŵawovya kuti atumbikengi ŵanthu amitundu yosi. Chinanga kuti visopa vaboza viserezgeka mu nkhondu za mitundu, Akhristu auneneska akana kuserezgeka mu nkhondu. (Mika 4:1-3) M’malu mwaki, Akhristu auneneska agwiriskiya nchitu nyengu ndi chuma chawu pakuwovya ŵanthu kuti aziŵi Chiuta.Ŵerengani Yohane 13:34, 35; 1 Yohane 4:20.

4. Kumbi mungachiŵanika chisopa chauneneska?

Kumbi nchisopa nichi cho chisambiza vinthu vosi kutuliya mu Mazu ngaku Chiuta, cho chitumbika zina laku Chiuta ndi kupharazga kuti Ufumu waku Chiuta pe ndiwu wazamuwovya ŵanthu? Nchisopa nichi cho Akhristu ŵaki atanjana ukongwa ndi kukana nkhondu? Imwi muwona wuli?Ŵerengani 1 Yohane 3:10-12.