Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Ufumu Waku Chiuta Uwusa!

 MUTU 13

Apharazgi a Ufumu Atole Nkhani Zawu Kumakhoti

Apharazgi a Ufumu Atole Nkhani Zawu Kumakhoti

FUNDU YIKULU YA MUTU UWU

Nge mo Yesu wangukambiya limu, maboma kweniso alongozgi avisopa agwiriskiya nchitu marangu kuti akanizgi nchitu yakupharazga

1, 2. (a) Kumbi alongozgi avisopa anguchita wuli ndi nchitu yakupharazga, nanga akutumika anguchita wuli? (b) Nchifukwa wuli akutumika angukana kuvwiya dangu lakuti aleki kupharazga?

PAJUMPHA ŵaka nyengu yimanavi kutuwa pa Pentekosite wa mu 33 C.E. Ndipu pajumpha ŵaka masabata ngamanavi kutuliya po mpingu wachikhristu ku Yerusalemu ungwambiya. Kweni Satana wawona kuti yeniyi ndiyu nyengu yamampha yakutimbanyizgiya mpingu wenuwu. Iyu wakhumba kuti wawubwanganduwi wechendakuwi. Mwaliŵi, Satana wachitiska kuti alongozgi avisopa akanizgi nchitu yakupharazga Ufumu. Kweni akutumika alutirizga kupharazga mwachiganga ndipu ŵanthu anandi ‘avwana mu Ambuya.’Mac. 4:18, 33; 5:14.

Akutumika angukondwa chifukwa anguŵawona kuti “ŵenga akwenere kukomwa ndi kulengeskeka chifukwa cha zina lo”

2 Chifukwa chakukwiya, ŵanthu akususka angulutirizga kulimbana ndi akutumika ndipu wosi anguponyeka mujeri. Kweni ndi usiku, mungelu waku Yehova wanguŵajuliya ndipu kwati kwacha wosi angwamba so kupharazga! Akutumika angumangika so ndipu anguluta nawu kwa akweruzga chifukwa chakuleka kulondo dangu lo lingujalikiskika lakuti angapharazganga cha. Yiwu angumuka mwachiganga kuti: ‘Titenere kuvwiya Chiuta kuluska ŵanthu.’ Akweruzga angukwiyiya akutumika wosi ndipu apejanga “kuŵabaya.” Kweni pa nyengu yeniyi, Gamaliele msambizi wa Chilangulu, kweniso munthu wakuzirwa, wangutcheŵeska akweruzga kuti: ‘Chenjeni . . . [“mungalimbananga nawu cha,” NW] wo ŵanthu, . . . alekeni.’ Akweruzga anguvwiya mazu ngaku Gamaliele ndipu angufwatuwa akutumika. Kumbi ŵanthu akugomezgeka ŵenaŵa anguchitanji? Yiwu anguchita mantha cha ndipu angulutirizga “kusambiza ndi kumtawula Yesu kuti ndiyu Khristu.”Mac. 5:17-21, 27-42; Nthanthi 21:1, 30.

3, 4. (a) Kumbi ndi nthowa wuli yo Satana wayigwiriskiya nchitu kwa nyengu yitali kuti wayukiyi ŵanthu aku Chiuta? (b) Kumbi tikambiskanengenji m’mutu uwu kweniso m’Mutu 14 ndi 15?

3 Mlandu uwu wo wengaku mu 33 C.E., wenga wakwamba mwa masuzgu ngo mpingu wachikhristu ukumana nangu, kweni wenga wakumaliya cha. (Mac. 4:5-8; 16:20; 17:6, 7) Mazuŵa nganu Satana wachiska so ŵanthu akususka kuti agwiriskiyengi nchitu ŵanthu amaudindu kuti akanizgi nchitu yidu yakupharazga. Ŵanthu akususka apusikiya ŵanthu aku Chiuta milandu yakupambanapambana. Mwakuyeruzgiyapu, yiwu akamba kuti titimbanyizga ŵanthu, tiyukiya boma kweniso kuti tichita malonda. Abali ŵidu alutanga kumakhoti pa nyengu yakwenere kuti akasimikizgiyi kuti milandu iyi njaboza. Kumbi milandu yeniyi  yamalanga wuli? Kumbi imwi mazuŵa nganu muyanduwa wuli ndi mo makhoti ngakuyeruzgiya nkhani zidu zinyaki m’vyaka vakuvuli? Tiyeni tikambiskanepu milandu yimanavi kuti tiwoni mo yawovye pa nchitu yakujalikiska mwadangu uthenga wamampha.Ŵaf. 1:7.

4 M’mutu uwu tiwonengi vo tachita kuti tivikiriyi wanangwa widu wakupharazga. M’Mutu 14 ndi 15, tiwonengi nkhani zinyaki zo tapunda m’makhoti zo zatiwovya kuti tileki kuja chigaŵa cha charu kweniso kuti tilondongi marangu nga Ufumu mwawanangwa.

Kumbi Akaboni Atambisa Viwawa Pamwenga Apharazga Ŵaka Ufumu Waku Chiuta Mwakugomezgeka?

5. Nchifukwa wuli ŵanthu wo apharazganga Ufumu angumangika kukumaliya kwa vyaka va m’ma 1930, nanga wo alongozganga anguchitanji?

5 Kukumaliya kwa vyaka va m’ma 1930, misumba ndipuso vyaru vo vipanga charu cha United States of America, vingujalikiska dangu lakuti Akaboni aku Yehova atongi dankha chikalata chakuŵazomerezga kupharazga ŵechendayambi kuchita uteŵeti wawu. Kweni abali alutanga cha kuchito chikalata chenichi. Yiwu anguziŵa kuti boma linga ŵalonda chikalata ichi nyengu yeyosi kweniso aziŵanga kuti palivi boma lo lingakanizga Akhristu kuvwiya dangu laku Yesu lakuti apharazgengi uthenga wa Ufumu. (Marko 13:10) Ivi vinguchitiska kuti ŵanthu anandi wo apharazganga Ufumu amangiki. Mwaviyo, ŵanthu wo alongozganga gulu lidu angutole nkhani iyi kukhoti. Yiwu akhumbanga kuti akalongo kuti Boma laŵikiya dangu lambula kwenere pa Akaboni kuti aleki kusopa mwawanangwa. Ndipu mu 1938, panguchitika so nkhani yinyaki yo yinguchiyeruzgika m’khoti ndipu yinguwovya pakuyeruzga nkhani zinyaki zamtundu weniwo. Kumbi nchinthu wuli cho chinguchitika?

6, 7. Kumbi nchinthu wuli cho chinguchitikiya banja la M’bali Cantwell?

6 Ndimulenji pa Chiŵi 26, April 1938, Newton Cantwell, yo wenga ndi vyaka 60; muwolu ŵaki, Esther kweniso ŵana ŵawu anthurumi Henry, Russell, ndi Jesse, anguluta kuchipharazga m’msumba wa New Haven, Connecticut, ku U.S.A., ndipu wosi ŵenga apayiniya apade. Yiwu angunozgeke limu kuti amujaku zuŵa limoza cha. Chifukwa wuli? Pa nyengu iyi ndipu amangikapu kananandi ŵaka, mwaviyo aziŵanga kuti angachimangika so. Chinanga kuti yiwu aziŵanga venivi, anguleka cha kugwira nchitu yakupharazga uthenga wa Ufumu. Yiwu angukwera magalimotu ngaŵi achiluta m’msumba uwu. Newton wanguyendesa galimotu yimana yo mwenga mabuku kweniso magilamafoni ndipu Henry yo wenga ndi vyaka 22 wanguyendesa galimotu yo yenga ndi vakukweze mazu. Pati pajumpha nyengu yimanavi apolisi anguŵamika nadi.

7 Wakwamba kumangika wenga Russell, wavyaka 18, ndipu pavuli paki ŵenga anyina ndipuso awiski. Jesse, yo wenga ndi vyaka 16, wenga patali kweni wanguŵawona apolisi achimanga apapi ŵaki kweniso mku waki. Pa nyengu iyi Henry wapharazganga kuchigaŵa chinyaki cha msumba uwu, mwaviyo Jesse wanguja yija.  Kweni iyu wangunyamuwa gilamafoni yaki ndipu wangulutirizga kupharazga. Anthurumi ŵawi achisopa cha Katolika angukambiya Jesse kuti wambisi lekodi ya nkhani ya M’bali Rutherford yamutu wakuti “Arwani.” Kweni achivwisiya nkhani iyi angukwiya ukongwa mwakuti apenjanga kumupuma. M’malu mwakulimbana nawu, Jesse wangutuwapu ŵaka, kweni pati pajumpha nyengu yimanavi nayu wangumangika ndi apolisi. Apolisi angumujuliya mlandu cha Esther Cantwell, kweni M’bali Cantwell ndi ŵana ŵaki anguŵajuliya mlandu. Yiwu angutuzgika pa belu zuŵa lenilo.

8. Nchifukwa wuli khoti lingusaniya kuti Jesse wenga wakunanga pa mlandu wakwambisa viwawa?

8 Pati pajumpha myezi yimanavi, mu September 1938, banja la M’bali Cantwell linguluta ku New Haven kwachimuka milandu kukhoti. Newton, Russell, kweniso Jesse anguŵasaniya ndi mlandu wakupempheska ndalama kwambula chikalata chakuŵazomerezga. Chinanga kuti yiwu anguluta so ndi mlandu uwu ku Khoti Likulu la ku Connecticut, Jesse wangusanirika mbwenu kuti ngwakunanga pa mlandu wakwambisa viwawa kweniso kutimbanyizga ŵanthu. Chifukwa wuli? Chifukwa anthurumi ŵaŵi achisopa cha Katolika angukambiya khoti kuti nkhani ya M’bali Rutherford yo anguvwisiya yenga yakukwiyiska chifukwa yanyozanga chisopa chawu. Kuti alongo kuti mlandu uwu unguyeruzgika umampha cha, abali wo alongozganga gulu lidu angutole nkhani iyi ku Khoti Likulu Ukongwa la ku America.

9, 10. (a) Kumbi Khoti Likulu Ukongwa la ku America linguyeruzga wuli mlandu wa banja la M’bali Cantwell? (b) Kumbi tiyanduwa wuli ndi cheruzgu chenichi?

 9 Kwambiya pa 29 March 1940, Mweruzgi Mura, Charles E. Hughes limoza ndi ŵeruzgi anyaki 8, angwamba kuvwisiya vo M’bali Hayden Covington yo wenga loya wa Akaboni aku Yehova wakambanga pa mlandu uwu. * Loya yo wamiyanga boma la Connecticut wachipereka fundu zaki kuti walongo kuti Akaboni mbanthu wo atambisa viwawa, mweruzgi munyaki wangumufumba kuti: “Kumbi mbuneneska kuti uthenga wo Yesu Khristu wapharazganga m’nyengu yaki ŵanthu awuyanjanga cha?” Loya yo wamiyanga boma wangumuka kuti: “Mbuneneska nadi, ndipu asani ndikumbuka umampha, Bayibolo likamba so vo vinguchitikiya Yesu chifukwa chakupharazga uthenga.” Mazu yanga nganguvumbuwa vinandi! Loya wa boma waziŵanga cha kuti vo wangumuka vinguŵika Akaboni m’gulu laku Yesu ndipu boma wanguliŵika m’gulu la ŵanthu wo angumubaya. Pa 20 May 1940, akweruzga anandi anguyeruzga kuti Akaboni ŵengavi mlandu.

Hayden Covington (kunthazi, pakati), Glen How (kumazge), ndipuso ŵanthu anyaki achituwa mukhoti ŵati apunda pa mlandu

10 Kumbi cheruzgu cha Khoti ili chenga chakukhumbika wuli? Cheruzgu ichi chinguchitiska kuti paje wanangwa wakusopa ndipuso chinguchitiska kuti maboma kweniso vigaŵa vosi ku America vileki kutimbanyizga wanangwa wakusopa. Khoti ili lingusaniya so kuti vo Jesse wanguchita “venga vakwambisa viwawa pamwenga kutimbanyizga ŵanthu cha.” Mwaviyo, cheruzgu ichi chingulongo pakweru kuti Akaboni aku Yehova atambisa viwawa cha. Ivi vilongo kuti ateŵeti aku Chiuta angupunda! Kumbi isi tiyanduwa wuli ndi cheruzgu chenichi? Loya munyaki yo ndi Kaboni wangukamba kuti: “Wanangwa wakuti tisopengi mwambula kukanizgika utitipaska mwaŵi isi nge Akaboni kuti tipharazgiyengi ŵanthu a m’chigaŵa chidu uthenga wa chilindizga.”

Kumbi Akaboni Ayukiya Boma Pamwenga Apharazga Ŵaka Uneneska?

Kapepala ka Quebec’s Burning Hate for God and Christ and Freedom Is the Shame of All Canada

11. Kumbi ndi nchitu yapade niyi yo abali ŵidu ku Canada angugwira, nanga nchifukwa wuli?

11 M’vyaka va m’ma 1940, Akaboni aku Yehova ku Canada angususkika mwankhaza. Mwaviyo, mu 1946, abali ŵidu angwamba nchitu yapade kuti ŵanthu aziŵi kuti boma likhumba cha kuti ŵanthu asopengi mwawanangwa. Nchitu yapade yeniyi yingugwirika m’mazuŵa 16, ndipu yenga yakugaŵiya kapepala kapade. (Quebec’s Burning Hate for God and Christ and Freedom Is the Shame of All Canada) Kapepala yaka kenga ndi mapeji nganayi ndipu kanguvumbuliya limu kuti alongozgi avisopa kweniso apolisi ndiwu ayambisanga viwawa kweniso nkhaza zo abali ŵidu ku Quebec akumananga nazu. Kapepala yaka kangukamba so kuti: “Akaboni aku Yehova ŵeche kumangika kwambula chifukwa. Ku Greater Montreal kwe milandu pafufupi 800 ya Akaboni aku Yehova.”

12. (a) Kumbi akususka anguchita wuli ndi nchitu yakugawiya kapepala kapade? (b) Kumbi abali ŵidu ambikanga mlandu wuli? (Wonani so mazu ngam’mphata.)

12 Maurice Duplessis mulongozgi wa msumba wa Quebec yo wagwiriyanga limoza nchitu ndi Villeneuve, Wasembi Mura wa Katolika wati wawona kapepala yaka wangukamba kuti paŵengi “nkhondu yambula lisungu” ndi Akaboni. Chiŵerengeru cha milandu  ya Akaboni aku Yehova chingukwera kutuwa pa 800 kufika pa 1,600. Mzichi munyaki yo wenga mpayiniya wangukamba kuti: “Apolisi angutimanga kananandi ŵaka mwakuti tikumbuka cha kuti nkhalinga.” Akaboni wo akolekanga achigaŵiya kapepala yaka ambikanga mlandu wakuŵapusikiya kuti apharazga “kapepala ko kachiska kuyukiya boma.” *

13. Kumbi mbayani wo ŵenga akwamba kumbika mlandu wakuyukiya boma, nanga khoti linguyeruzga wuli?

13 Mu 1947, M’bali Aimé Boucher ndi ŵana ŵaki anthukazi Gisèle, yo wenga ndi vyaka 18 kweniso Lucille, wavyaka 11, ŵenga akwamba kumbika mlandu wakuyukiya boma. Yiwu ŵenga panchitu yakugaŵiya kapepala kapade pafupi ndi munda wawu kumapiri nga kumwera kwa msumba wa Quebec, ndipu penga pakusuzga kuŵawona kuti mbanthu akwambisa viwawa. M’bali Boucher wenga munthu wakujiyuyuwa kweniso wakufwasa yo kanandi wajanga kumunda waki ndipu walutanga kutawuni kamozakamoza pa ngolu yo yaguzikanga ndi hachi. Kweni iyu ndi banja laki akumananga ndi masuzgu ngo nganguzumbulika mukapepala kenaka. Yo wayeruzganga mlandu uwu wangukana kuzomerezga ukaboni wakuti banja la M’bali Boucher lilivi mlandu chifukwa chakuti watinkhanga Akaboni aku Yehova. M’malu mwaki, iyu wanguzomerezga vo loya wa boma wangukamba kuti kapepala yaka kenga kakwambisa viwawa ndipu banja la M’bali Boucher litenere kumangika. Mwaviyo, tingakamba kuti mweruzgi uyu waŵanaŵananga kuti: Kukamba uneneska ndi mlandu! M’bali Boucher kweniso Gisèle angumangika limoza ndi Lucille chinanga kuti wenga munamana. Abali anguchimangala nkhani iyi ku Khoti Likulu Ukongwa la ku Canada, ndipu linguzomera kuyeruzga so nkhani iyi.

14. Kumbi abali anguchita wuli ku Quebec pa nyengu yo asuskikanga?

14 Kweni abali ndi azichi ŵidu ku Quebec angulutirizga kupharazga uthenga wa Ufumu chinanga wuli akumananga ndi masuzgu ngakulungakulu. Ivi vinguchitiska kuti nchitu yidu yiluti panthazi. M’vyaka vinayi vo nchitu yapade yingugwirikiya kutuwa mu 1946, chiŵerengeru cha Akaboni ku Quebec chingukwera kutuwa pa 300 kufika pa 1,000! *

15, 16. (a) Kumbi Khoti Likulu Ukongwa la ku Canada linguyeruzga wuli mlandu wa banja la M’bali Boucher? (b) Kumbi abali kweniso ŵanthu anyaki anguyanduwa wuli ndi cheruzgu ichi?

15 Mu June 1950, akweruzga wosi 9 a Khoti Likulu Ukongwa la ku Canada angwamba kuyeruzga mlandu wa M’bali Aimé Boucher. Pati pajumpha myezi 6, pa 18 December 1950, Khoti ili linguyeruzga kuti tilivi mlandu. Chifukwa? M’bali Glen How, loya wa Akaboni aku Yehova wangukamba kuti Khoti ili lingukoliyana ndi fundu yakuti munthu wangambika mlandu “wakuyukiya boma” asani wakhuŵizga viwawa pamwenga wachitiska kuti paje vivulupi vakususkana ndi mo boma litendeske vinthu. Kweni kapepala yaka “kengavi mazu ngakukhuŵizga viwawa pamwenga vivulupi, m’malu mwaki kakambanga ŵaka vinthu vo vachitikanga mwakukoliyana ndi wanangwa wakulongoro.” M’bali How wangukamba so kuti: “Ndinguwona ndi masu ngangu mo Yehova wangutiwovye kuti tipundi.” *

16 Cheruzgu cho Khoti Likulu Ukongwa lingupereka chingulongo kuti Ufumu waku Chiuta upunda nadi. Cheruzgu ichi  chingumaliska milandu 122 ya Akaboni aku Yehova yakuyukiya boma ku Quebec. Ndipu chingupaska so ŵanthu wosi wanangwa wakukambapu maŵanaŵanu ngawu asani boma litendeska umampha cha vinthu ku Canada kweniso m’vyaru vosi vo vawusikanga ndi boma la Britain. Chingumaliska so masuzgu nga ku Quebec ngo ngayambisikanga ndi Boma kweniso Tchalitchi. *

Kumbi Akaboni Achita Malonda Pamwenga Apharazga Ŵaka Ufumu Waku Chiuta Mwaphamphu?

17. Kumbi maboma nganyaki ngatimbanyizga wuli nchitu yidu yakupharazga?

17 Mwakulingana ndi Akhristu akali, ateŵeti aku Yehova mazuŵa nganu ‘akazuzga [‘achita malonda ndi,’ NW] mazu ngaku Chiuta’ cha. (Ŵerengani 2 Ŵakorinte 2:17.) Kweni pe maboma nganyaki ngo ngatimbanyizga nchitu yidu mwakujalikiska marangu ngakukwaskana ndi malonda. Tiyeni tikambiskani nkhani ziŵi zo zinguyeruzgika kumakhoti zo zilongo asani Akaboni achita malonda pamwenga apharazga ŵaka Ufumu waku Chiuta.

18, 19. Kumbi ŵanthu amaudindu ku Denmark anguchita wuli kuti akanizgi nchitu yakupharazga?

18 Denmark. Pa 1 October 1932, pangujalikiskika dangu lakuti weyosi yo waguliska mabuku watenere kuja ndi chikalata chakuzomerezgeka. Kweni abali ŵidu anguto cha vimakalata venivi. Mawa laki, apharazgi 5 anguluta kuchipharzga kutawuni inyaki yo ye pamtunda wa makilomita 30, kuzambwi kwa msumba wa Copenhagen. Lumwi lichisere, August Lehmann yumoza wa apharazgi yawa wangusoŵa. Iyu wangumangika chifukwa chakuguliska katundu kwambula chikalata chakuzomerezgeka.

19 Pa 19 December 1932, M’bali August Lehmann wangwamba kuluta kukhoti kwachimuka mlandu. Iyu wangukambiya khoti kuti wagaŵiyanga nadi ŵanthu mabuku ngakukonkhoska Bayibolo kweni waŵaguliskanga cha. Khoti ili linguzomerezga vo iyu wangukamba ndipu lingukamba kuti: “Munthu uyu . . . ngwakukhupuka kali, ndipu wangulondiyapu ndalama yeyosi cha, wengavi maŵanaŵanu ngakulonde ndalama kweni iyu wangugwiriskiya nchitu ndalama zaki pa nchitu yo wachitanga.” Khoti linguzomerezga Akaboni aku Yehova kuti Lehmann wachitanga “malonda” cha. Ŵanthu wo atinkhanga ŵanthu aku Chiuta ŵenga ndi chilatu chakukanizga nchitu yakupharazga m’charu chosi cha Denmark. (Sumu 94:20) Loya wa boma wangutole mlandu uwu ku Khoti Likulu Ukongwa. Kumbi abali ŵidu anguchita wuli?

20. Kumbi Khoti Likulu Ukongwa la ku Denmark linguyeruzga wuli, nanga abali anguchita wuli?

20 Kwati kwaja sabata yimoza kuti mlandu uwu ukayeruzgiki kukhoti, Akaboni aku Yehova ku Denmark angusazgiyaku phamphu lawu pa nchitu yakupharazga. Pa Chiŵi, 3 October 1933, Khoti Likulu Ukongwa lingupereka cheruzgu chaki. Cheruzgu chaki chingukoliyana ndi vo khoti limana lingukamba kuti August Lehmann wengavi mlandu wewosi. Ivi vingulongo kuti Akaboni aku Yehova ŵe ndi wanangwa wakupharazga. Abali ndi azichi angusazgiyaku ukongwa phamphu lawu pa nchitu yakupharazga pakuwonga vo Yehova wanguŵachitiya kuti apundi mlandu wenuwu. Kutuliya pa nyengu yeniyi, abali ŵidu ku Denmark apharazga mwambula kutimbanyizgika ndi boma.

Akaboni achiganga ku Denmark, cha m’ma 1930

21, 22. Kumbi Khoti Likulu Ukongwa la ku America linguyeruzga wuli mlandu wa M’bali Murdock?

 21 United States. Pa Sabata, 25 February 1940, M’bali Robert Murdock, Jr., yo wenga mpayiniya kweniso Akaboni anyaki 7 angumangika achipharazga m’msumba wa Jeannette, wo we kufupi ndi Pittsburgh, ku Pennsylvania. Yiwu angumangika chifukwa chakuleka kugula chikalata chakuŵazomerezga kugaŵiya mabuku. Ŵati atole mlandu uwu ku Khoti Likulu Ukongwa la ku America, Khoti ili linguzomera kweruzga so mlandu uwu.

22 Pa 3 May 1943, Khoti Likulu Ukongwa lingupereka cheruzgu chaki cho chingulongo kuti Akaboni mbambula kunanga. Khoti ili lingukamba kuti dangu lakuti ŵanthu atongi dankha chikalata chakuŵazomerezga lisuskana ndi “wanangwa wo Marangu nga Boma ngapereka.” Khoti ili lingukamba so kuti dangu lo msumba wa Jeannette ungujalikiska “latimbanyizganga wanangwa wakupharazga nkhani kweniso wakusopa.” Pakupereka cheruzgu cha Khoti, Mweruzgi William O. Douglas wangukamba kuti Akaboni aku Yehova “Achita vosi viŵi, apharazga kweniso agaŵiya mabuku ngachisopa.” Wangukamba so kuti: “Nchitu yawu yitenere kuvikilirika ukongwa . . . mwakuyanana ndi kusopa kweniso kupharazga pagomi ko matchalitchi nganyaki ngachita.”

23. Nchifukwa wuli mazuŵa nganu tiyanduwa ndi vyeruzgu vo khoti lingupereka mu 1943?

23 Ŵanthu aku Chiuta angupunda ndi cheruzgu cho Khoti Likulu Ukongwa lingupereka. Cheruzgu ichi chingulongo kuti isi  tichita malonda cha kweni tipharazga ŵaka Ufumu. Pa zuŵa lambula kuluwika lenili, Akaboni aku Yehova angupunda milandu 12 pa milandu 13 yo ŵenga nayu kukhoti ili, kusazgiyapu mlandu wa M’bali Murdock. Vyeruzgu venivi vawovya ukongwa pa milandu ya pambula kuswera yapa, yo arwani ŵidu akhumbanga kutimbanyizgiya wanangwa widu wakupharazga uthenga wa Ufumu kumalu ngo kusanirika ŵanthu anandi kweniso kunyumba ndi nyumba.

‘Titenere Kuvwiya Chiuta Kuluska Ŵanthu’

24. Kumbi tichita wuli asani boma lakanizga nchitu yidu yakupharazga?

24 Isi nge ateŵeti aku Yehova, tiwonga ukongwa asani maboma ngatitipaska wanangwa wakuti tipharazgengi uthenga wa Ufumu. Kweni asani boma lakanizga nchitu yidu yakupharazga, tisintha nthowa zakupharazgiya kuti tilutirizgi kugwira nchitu yidu. Mwakuyanana ndi akutumika, ‘titenere kuvwiya Chiuta kuluska ŵanthu.’ (Mac. 5:29; Mat. 28:19, 20) Kweniso titole nkhani za mtundu uwu kumakhoti kuti ngatiwovyi kuti boma lileki kukanizga nchitu yidu. Wonani vakuyeruzgiyapu viŵi ivi.

25, 26. Kumbi ndi vinthu wuli vo vinguchitika ku Nicaragua vo vinguchitiska kuti paje mlandu ku Khoti Likulu Ukongwa, nanga nkhani iyi yingumala wuli?

25 Nicaragua. Pa 19 November 1952, Donovan Munsterman yo wenga m’mishonale kweniso mteŵeti wa nthambi wanguluta ku ofesi yo yiwonere ŵanthu wo atuwa ndipuso kusere m’charu yo yenga m’msumba ukulu, wa Managua. Iyu wangudanika kuti wakawonani ndi Arnoldo García, yo wenga mura wa ofesi yeniyi. García wangukambiya Donovan kuti Akaboni aku Yehova wosi ku Nicaragua “akanizgika kulutirizga kupharazga visambizu vawu ndipuso kulutiska panthazi nchitu zawu.” Wati wafumbika kuti nchifukwa wuli, García wangukonkhoska kuti Akaboni anguzomerezgeka cha ndi nduna ya boma kuchita uteŵeti wawu ndipuso kuti ŵenga ŵanthu akuyukiya boma. Kumbi mbayani wo anguchitipusikiya boza lenili? Mbaraŵara achisopa cha Katolika.

Abali ku Nicaragua, pa nyengu yo nchitu yidu yingukanizgika

 26 M’bali Munsterman wangutole nkhani iyi mwaliŵiliŵi ku Unduna Wakuwonere Nchitu za Boma ndi Visopa ndipuso kwaku Anastasio Somoza García, pulezidenti wa charu cho, kweni wosi anguchitapu kanthu cha. Mwaviyo, abali angusintha mo achitiyanga vinthu. Yiwu angujala Nyumba za Ufumu, angwamba kuwungana m’timagulu, anguleka kupharazga m’misewu kweni angulutirizga kupharazga uthenga wa Ufumu. Angutole so nkhani iyi ku Khoti Likulu Ukongwa la ku Nicaragua ndipu angulipempha kuti boma lileki kukanizga nchitu yidu. Manyuzipepala ngangulemba ukongwa vakukwaskana ndi kukanizgika kwa nchitu yidu kweniso pemphu lidu ku Khoti Likulu Ukongwa, ndipu Khoti ili linguzomera kuyeruzga mlandu uwu. Kumbi nchinthu wuli cho chinguchitika? Pa 19 June 1953, Khoti ili lingupereka cheruzgu chaki cho chingulongo kuti Akaboni ŵengavi mlandu. Lingusaniya kuti vo boma linguchita venga vakususkana ndi wanangwa wakukamba maŵanaŵanu, wakugomezga kweniso wakusopa wo marangu ngapereka. Lingukamba so kuti ubali wo wengapu pakati pa Akaboni ndi boma la Nicaragua uweliyepu.

27. Nchifukwa wuli ŵanthu a ku Nicaragua anguzizwa ndi cheruzgu cha Khoti, nanga abali ŵidu anguchiwona wuli?

27 Ŵanthu a ku Nicaragua anguzizwa kuwona kuti Khoti Likulu Ukongwa linguyeruzga kuti Akaboni alivi mlandu. Chifukwa pa nyengu iyi alongozgi avisopa ŵenga ndi nthazi ukongwa mwakuti Khoti layeruzganga nkhani mwakuŵakondweska. Kweniso alongozgi a boma ŵenga ndi nthazi ukongwa mwakuti Khoti layeruzganga mwakukoliyana ndi vo iwu akhumbanga. Abali ŵidu anguziŵa kuti apunda pa mlandu uwu chifukwa Fumu yawu yinguŵavikiriya ndipu angulutirizga kupharazga.Mac. 1:8.

28, 29. Kumbi vinthu vingusintha wuli ku Zaire cha m’ma 1980?

28 Zaire. M’vyaka va m’ma 1980, ku Zaire ko sonu kuziŵika kuti Democratic Republic of Congo kwenga Akaboni 35,000. Chifukwa cha kukwera kwa chiŵerengeru, ofesi ya nthambi yazenganga nyumba zinyaki. Mu December 1985, m’msumba wa Kinshasa, likulu la charu ichi munguchitika unganu wavyaru ndipu ŵanthu 32,000 a m’vyaru vakupambanapambana anguzaza sitediyamu ya m’msumba uwu. Kweni vinthu vingwamba kuŵasinthiya ateŵeti aku Yehova. Nchinthu wuli chinguchitika?

29 Pa nyengu iyi M’bali Marcel Filteau m’mishonale wa ku Quebec, Canada, yo wangutombozgeka m’nyengu ya muwusu waku Duplessis, wateŵetiyanga ku Zaire. Iyu wangukonkhoska vo vinguchitika: “Pa 12 March 1986, abali wo alongozganga nchitu yidu ku Zaire angupaskika kalata yo yingukamba kuti wupu wa Akaboni aku Yehova ku Zaire wakanizgika.” Pulezidenti wa charu ichi Mobutu Sese Seko ndiyu wangusayina kalata iyi.

30. Kumbi Komiti ya Nthambi yakhumbikanga kusankha pa nkhani yikulu ukongwa niyi, nanga yingusankhanji?

30 Mawa laki, wayilesi ya boma yingupharazga kuti: “Kwamba msanawale tivwengi so cha vakukwaskana ndi Akaboni aku Yehova kunu ku [Zaire].” Zuŵa lenilo Akaboni angwamba kumangika. Nyumba za Ufumu zingubwangandulika ndipu abali ŵidu anguphangika katundu, kumangika kweniso kupumika. Ŵana ŵa Akaboni nawu angumangika ndi kuŵikika mujeri. Pa 12 October 1988, boma linguphanga katundu wa gulu laku Yehova, ndipu  asilikali a boma angulonda ndi kwamba kugwiriskiya nchitu ofesi ya nthambi. Abali wo alongozganga angupempha kuti akawonani ndi Pulezidenti Mobutu kweni angumukika cha. Pa nyengu iyi Komiti ya Nthambi yakhumbikanga kusankha pa nkhani yikulu ukongwa, “Kumbi titole nkhani iyi ku Khoti Likulu Ukongwa, pamwenga tilindizgepu dankha?” Timothy Holmes yo pa nyengu iyi wenga m’mishonale kweniso wakukumaniska nchitu za Komiti ya Nthambi wangukamba kuti, “Tingupempha Yehova kuti watipaski zeru kweniso watilongozgi.” Pavuli pakuromba ndi kukambiskana, komiti iyi yinguwona kuti pa nyengu iyi atingi achitengi umampha cha kuchimangala kukhoti. M’malu mwaki anguŵika mtima wawu pa nchitu yakuphwere abali kweniso kusaniya nthowa zakulutirizgiya kugwira nchitu yakupharazga.

“Pa nyengu ya suzgu iyi, tinguwona mo Yehova wasinthiya vinthu”

31, 32. Kumbi Khoti Likulu Ukongwa la ku Zaire lingupereka cheruzgu wuli chakukondweska, nanga abali ŵidu angukwaskika wuli ndi cheruzgu chenichi?

31 Pati pajumpha vyaka vinandi, vinthu vingwamba kuŵayendiyaku umampha Akaboni ndipuso ŵanthu angwamba kuja ndi wanangwa. Komiti ya Nthambi yinguwona kuti iyi yenga nyengu yakwenere kuti nkhani yakukanizgika kwa ntchitu yidu yikayeruzgiki ku Khoti Likulu Ukongwa la ku Zaire. Chakukondweska nchakuti, Khoti ili linguzomera kuyeruzga nkhani iyi. Pa 8 January 1993, Khoti ili linguyeruzga kuti vo boma linguchita pakukanizga nchitu ya Akaboni vikoliyana cha ndi marangu ndipu lingutizomerezga kuti tiyambi so nchitu yidu. Yapa ndipu pajumpha vyaka 7 kutuliya po pulezidenti wa charu ichi wangukanizgiya nchitu yidu. Ivi vilongo kuti akweruzga anguŵika umoyu wawu pangozi chifukwa anguyeruzga kuti dangu laku pulezidenti lenga lambula kwenere. M’bali Holmes wangukamba kuti: “Pa nyengu ya suzgu iyi, tinguwona mo Yehova wasinthiya vinthu.” (Dan. 2:21) Chivwanu cha abali ŵidu chingukho chifukwa chakupunda  kwenuku. Yiwu anguziŵa kuti Yesu yo ndi Fumu watovya ŵanthu ŵaki pa nyengu yakwenere kuti aziŵi vo angachita.

Akaboni aku Yehova ku Democratic Republic of Congo akondwa chifukwa cha wanangwa wakusopa

32 Nchitu yidu yati yazomerezgeka, ofesi ya nthambi yinguzomerezgeka kuzenga so ofesi yasonu, kudaniska mabuku ndipuso amishonale. * Ateŵeti aku Chiuta pacharu chosi akondwa ukongwa kuwona mo Yehova wavikiriya ŵanthu ŵaki mwauzimu!Yes. 52:10.

Yehova Ndiyu Watindovya

33. Kumbi tisambiranji pa milandu yimanavi yo takambiskana?

33 Milandu yinyaki yo tapunda kumakhoti yilongo kuti Yesu wafiska layizgu laki lakuti: “Ndikupaskeningi mlomu ndi zeru, yeniyo zosi mphindikwa zinu kuti ziziŵengi cha kwamukaku chinanga nkhumikirana namwi.” (Ŵerengani Luka 21:12-15.) Nyengu zinyaki Yehova wavikiriya ŵanthu ŵaki mwakugwiriskiya nchitu ŵanthu ange Gamaliele kweniso maloya pamwenga ŵeruzgi achiganga. Yehova wabumphiska vidya va arwani ŵidu. (Ŵerengani Yesaya 54:17.) Ŵanthu akususka angayimika cha nchitu yaku Chiuta.

34. Nchifukwa wuli tingakamba kuti kupunda kwidu pa milandu nchinthu chapade, nanga venivi vilongonji? (Wonani so bokosi lakuti, “ Milandu yo Yinguwovya uti Nchitu Yakupharazga fumu Yiluti Panthazi.”)

34 Nchifukwa wuli tingakamba kuti kupunda kwidu pa milandu kumakhoti nchinthu chapade? Ŵanaŵaniyani fundu iyi: Isi Akaboni aku Yehova te ŵanthu akutchuka cha, tivota cha, ndipuso tichitiya vinthu limoza ndi alongozgi andali cha. Kweniso Akaboni wo ambika milandu kumakhoti ngakulungakulu awoneka nge kuti mbanthu ‘ambula kusambira ndi aŵaka.’ (Mac. 4:13) Mwaviyo, ŵanthu angawona nge kuti makhoti ngataya ŵaka nyengu pakuyeruzga milandu ya pakati paku isi ndi alongozgi avisopa kweniso andali wo mbakuziŵika umampha. Kweni pa milandu yinandi makhoti ngasaniya kuti tilivi mlandu! Milandu yo tapunda yilongo kuti titenda ndi Chiuta limoza ndi Khristu. (2 Ŵakor. 2:17) Mwakuyanana ndi wakutumika Paulo, nasi tikamba kuti: Yehova ndiyu watindovya, “ndiwopengi cha.”Ŵah. 13:6.

^ ndimi 9 Mlandu uwu wa banja la M’bali Cantwell ndi boma la Connecticut, wenga wakwamba pa milandu 43 yo M’bali Hayden Covington yo wenga loya, wangumiya Akaboni mu Khoti Likulu Ukongwa la ku America. Iyu wakufwa mu 1978. Dorothy wavyaka 90, yo wenga muwolu waki weche kulutirizga kuteŵete mwakugomezgeka nge mpayiniya.

^ ndimi 12 Mlandu uwu wakoliyananga ndi dangu lo lingujalikiskika mu 1606. Dangu ili lakambanga kuti munthu wangayeruzgika kuti ngwakunanga asani atimuŵanaŵaniya kuti vo wangulongolo vingayambisa viwawa chinanga kuti wangakamba vauneneska.

^ ndimi 14 Mu 1950, ku Quebec kwenga ateŵeti anyengu zosi 164, kusazgiyapu 63 wo angumaliza sukulu ya Giliyadi wo angujipereka kuchiteŵete kwenuku chinanga kuti aziŵanga kuti amukumana ndi masuzgu.

^ ndimi 15 M’bali W. Glen How wenga loya wachiganga, ndipu kutuliya mu 1943 mpaka mu 2003, wangumiya Akaboni aku Yehova pa milandu yinandi ku Canada kweniso kuvyaru vinyaki.

^ ndimi 16 Kuti muziŵi vinandi pa mlandu uwu wonani nkhani yamutu wakuti, “The Battle Is Not Yours, but God’s” mu Awake! ya April 22, 2000, peji 18-24.

^ ndimi 32 Pati pajumpha nyengu asilikali a boma angusama m’nyumba yo yenga ofesi ya nthambi. Kweni ofesi yasonu ndipu yazengeka so kali ku chigaŵa chinyaki.