Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Ufumu Waku Chiuta Uwusa!

Kalata Yakutuliya Ku Wupu Wakulongozga

Kalata Yakutuliya Ku Wupu Wakulongozga

Akwanjiwa Apharazgi a Ufumu Anyidu:

YERUZGIYANI kuti ndimwi yumoza wa ŵanthu wo ateŵete pa Beteli ku Brooklyn, ndipu mpha Chinkhondi ndimulenji, pa 2 October 1914. Mwaja pampandu wo muja nyengu zosi pa chakurya cha mulenji, ndipu mulindizga M’bali C. T. Russell. Pavuli paki, muwona kuti chisasa cha chipinda chakuryiya chijulika ndipu M’bali Russell wasere. Watuma dankha kamanavi nge mo wachitiya nyengu zosi, ndipu watawuzga banja la Beteli mwakukondwa kuti, “Mwayuka wuli mosi?” Kweni wechendaje pasi, watumba ndankha m’manja ndipu wakamba chipharazgu chakukondweska chakuti: “Nyengu za Amitundu zamala, nyengu ya mafumu ngawu yamala!” Mukondwa ukongwa chifukwa mwaja muchilindizga nyengu yeniyi kwa nyengu yitali! Yimwi limoza ndi banja losi la Beteli mukondwa ukongwa ndi uthenga wenuwu ndipu mutumba manja kwa nyengu yitali.

 Pajumpha vyaka vinandi kutuliya po M’bali Russell wangukambiya mazu ngakukondweska ngenanga. Kumbi Ufumu wafiskanji kutuliya pa nyengu yeniyi? Pe vinthu vinandi! Mwakugwiriskiya nchitu Ufumu, Yehova kamanakamana watowesa kweniso wasambiza ŵanthu ŵaki wo ŵenga amanavi mu 1914, kweni sonu ajumpha 7.5 miliyoni. Kumbi imwi mwayanduwa wuli ndi masambiru ngenanga?

Mazuŵa nganu tituvwa abali ŵidu kanandi achikamba kuti, “gareta lakuchanya laku Yehova litenda!” ndipu ivi vauneneska nadi. Kweni kuŵerenga mwakufwasa buku ili kukuwovyeningi kuziŵa fundu yakuti kutuliya mu 1914, gareta lenili lo limiya gulu lakuchanya laku Yehova, litenda liŵiliŵi ukongwa. Kuti uthenga wa Ufumu upharazgiki pacharu chosi, ŵanthu wo apharazga Ufumu uwu, agwiriskiyapu nchitu nthowa zakupambanapambana nge manyuzipepala, vikwangwani, sinema ya vithuzi, makadi ngakupharazgiya, magilamafoni, wayilesi kweniso Intaneti.

Chifukwa chakuti Yehova watitumbika, sonu tipharazga mabuku ngidu ngakukonkhoska Bayibolo m’vineneru vakujumpha 670, ndipu tigaŵiya ŵanthu kwawezi. Ŵanthu akujipereka atovya pa nchitu yakuzenga Nyumba za Ufumu, Malu Ngakuchitiyapu Unganu kweniso maofesi nga nthambi m’vyaru vakukhupuka kweniso vo vikwera ŵaka sonu pa chuma. Asani pawoneka masoka, abali ndi azichi achanju atesesa so kovya ŵanthu wo akumana ndi suzgu ndipu alongo kuti alipu kuti awovyi pa nyengu ya suzgu.Nthanthi 17:17.

Nyengu zinyaki, alongozgi avisopa kweniso ŵanthu akususka agwiriskiya nchitu “dangu” m’nthowa yambula kwenere kuti atiyambisiyi masuzgu. Kweni vakuchiska ukongwa kuwona kuti vosi vo atesesa kuchita vituwa paŵaka, m’malu mwaki, vitovya ‘kulutiska’ panthazi uthenga wamampha.Sumu 94:20; Ŵaf. 1:12.

Titiwuwona kuti ndi mwaŵi ukulu kugwira nchitu limoza ndi imwi ‘amunyumba yaki’ anyidu. Ziŵani kuti titikuyanjani ukongwa mosi. Rombu lidu ndakuti buku ili likuwovyeni kuwona kuti chihara chinu chauzimu nchakukhumbika ukongwa kuluska po mwachiwoniyanga kali.Mat. 24:45.

Titikukhumbiyani vamampha vosi,

Ndisi abali ŵinu,

Wupu Wakulongozga wa Akaboni aku Yehova