Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambizani Ŵana Ŵinu

 SAMBIRU 4

Wangukondweska Awiski Ndipuso Yehova

Wangukondweska Awiski Ndipuso Yehova

Kumbi Jefta watimulayizganji Yehova?

Mwana waku Jefta wangufiska vo awiski angulayizga chinanga kuti venga vakusuzga

Kumbi wamuwona msungwana yo we pa chithuzi yapa?— Ndi mwana waku Jefta. Bayibolo lititikambiya cha zina laki kweni tiziŵa kuti wangukondweska awiski ndipuso Yehova. Tiyi tisambiri vakukwaskana ndi msungwana mwenuyu kweniso awiski a Jefta.

Jefta wenga munthu wamampha ndipu kanandi wasambizanga mwana waki vakukwaskana ndi Yehova. Wenga wanthazi kweniso mulongozgi wamampha. Mwaviyo, Ayisraele angumupempha kuti waŵalongozgi pakuchipumana ndi arwani ŵawu.

Jefta wangupempha chovyu kwaku Chiuta kuti wapundi. Iyu wangulayizga kuti asani wapunda, waperekengi kwaku Yehova munthu weyosi yo wayamba kutuwa munyumba yaki asani iyu wawe ku nkhondu.  Munthu uyu wakhumbikanga kuchija kweniso kuteŵete pachihema chaku Chiuta kwa umoyu waki wosi. Chihema ndi malu ngo kali ŵanthu asopiyangamu Yehova. Sonu Jefta wangupunda nadi! Kumbi utimuziŵa yo wangwamba kutuwa munyumba yaku Jefta iyu wati wawere kunyumba?—

Wenga mwana waku Jefta! Mwana waku Jefta wenga mwenuyu pe, kweni sonu wakhumbikanga kuti wasami panyumba. Mwaviyo, Jefta wangudandawula ukongwa. Kweni kumbuka kuti iyu wangulayizga. Sonu mwana waki wangukamba kuti: ‘Ada, asani mwalayizga kwaku Yehova, mufiski layizgu linu.’

Chaka chechosi, anyaki a mwana waku Jefta alutanga kuchimuwona

Mwana waku Jefta nayu wangudandawula. Kuchihema kwengavi kuyirwa ndi kubala ŵana. Kweni wakhumbisiskanga kufiska vo awiski angulayizga kweniso kukondweska Yehova. Iyu wawonanga kuti venivi ndivu vakukhumbika ukongwa kuluska kuyirwa ndi kubala ŵana. Mwaviyo, wangusama panyumba ndi kuchija kuchihema kwa umoyu waki wosi.

Kumbi uŵanaŵana kuti vo wanguchita vingukondweska awiski ndipuso Yehova?— Hinya, vinguŵakondweska nadi! Asani nawi uvwiyengi Yehova nge mo wanguchitiya mwana waku Jefta, ukondweskengi apapi ŵaku kweniso Yehova.

ŴERENGA M’BAYIBOLO LAKU

  • Marangu 6:4-6

  • Ŵeruzgi 11:30-40

  • 1 Ŵakorinte 7:37, 38