Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambizani Ŵana Ŵinu

 SAMBIRU 7

Kumbi Nyengu Zinyaki Uchita Phukwa Kweniso Mantha?

Kumbi Nyengu Zinyaki Uchita Phukwa Kweniso Mantha?

Wona mwana yo we pachithuzi yapa. Wawoneka kuti wachita phukwa kweniso we ndi mantha, anthu? Kumbi nawi uchita phukwa kweniso mantha nyengu zinyaki?— Weyosi wachita phukwa kweniso mantha nyengu zinyaki. Bayibolo likamba so vakukwaskana ndi mabwezi ngaku Yehova ngo ngachitanga phukwa kweniso mantha. Munyaki mwa ŵanthu yaŵa wenga Eliya. Tiyi tikambiskani vakukwaskana ndi iyu.

Yezebelu wakhumbanga kubaya Eliya

Eliya wajanga mu Yisraele, Yesu wechendaweku. Ahabu, yo wenga karonga wa Yisraele wasopanga Yehova Chiuta cha. Ahabu ndi muwolu waki Yezebelu asopanga Bala, chiuta waboza. Mwaviyo, ŵanthu anandi mu Yisraele angwamba kusopa Bala. Fumukazi Yezebelu wenga wankhaza ndipu wakhumbanga kubaya ŵanthu wosi wo asopanga Yehova, kusazgapu Eliya. Kumbi uziŵa cho Eliya wanguchita?—

Eliya wanguthaŵa! Wanguthaŵiya mubozwa ndipu wanguchibisama mumphaku.  Uŵanaŵana kuti nchifukwa wuli wanguchita venivi?— Hinya, wenga ndi mantha. Kweni Eliya wakhumbikanga cha kuchita mantha. Chifukwa wuli? Iyu waziŵanga kuti Yehova wangamuwovya. Yapa ndipu Yehova walongopu kali nthazi kwaku Eliya. Nyengu yinyaki wangumuka rombu laku Eliya mwakutumiza motu kutuwa kuchanya. Sonu yapa napu Yehova watingi watondekengi cha kumuwovya!

Kumbi Yehova wangumuwovya wuli Eliya?

Pa nyengu yo Eliya wenga mumphaku, Yehova wangumufumba kuti: “Uchitanji kunu?” Eliya Wanguti: ‘Ini pe ndini ndeche kusopa imwi. Ndaja ndija, ndipu nditopa kuti andibayengi.’ Eliya waŵanaŵananga kuti ŵanthu wosi wo asopanga Yehova abayika. Kweni Yehova wangukambiya Eliya kuti: ‘Awa, ndiviyo cha. Peche so ŵanthu 7000 wo ŵeche kundisopa. Khwima mtima. Ndeche ndi nchitu yikulu yakuti undigwiriyi!’ Kumbi uŵanaŵana kuti Eliya wangukondwa po wanguvwiya mazu yanga?—

Kumbi wasambiranji pa vo vinguchitikiya Eliya?— Ukhumbika cha kuchita phukwa kweniso mantha. We ndi mabwezi ngo ngatanja Yehova kweniso ngo ngatikuyanja. Yehova wakuwovyengi nyengu zosi chifukwa iyu we ndi nthazi zinandi. Kumbi wakondwa kuziŵa kuti we ndi anyaku?—

ŴERENGA M’BAYIBOLO LAKU