Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambizani Ŵana Ŵinu

 SAMBIRU 6

Davidi Wengavi Mantha

Davidi Wengavi Mantha

Kumbi uchita wuli asani wachita mantha?— Akhumba uluta kwa ama ŵaku pamwenga kwa ada ŵaku kuti akuwovyi. Kweni pe munthu munyaki so yo wangakuwovya. Iyu we ndi nthazi kuluska weyosi. Kumbi utimuziŵa?— Hinya, ndi Yehova Chiuta. Tiyi tikambiskani vakukwaskana ndi Davidi, mnyamata yo wazumbulika m’Bayibolo. Iyu wengavi mantha chifukwa waziŵanga kuti nyengu zosi Yehova wamuwovyengi.

Kutuliya pa unamana waki, apapi ŵaki angumusambiza kuti wayanjengi Yehova. Ivi vinguwovya Davidi kuti waleki kuchita mantha chinanga kuti wangakumana ndi vinthu vakofya. Iyu waziŵanga kuti Yehova ndi Mubwezi waki ndipuso kuti wamuwovyengi. Zuŵa linyaki, Davidi wachiliska mbereri kunguza nkharamu yikulu yo yinguko mbereri ndi mulomu waki! Kumbi uziŵa vo Davidi wanguchita? Iyu wangutchimbizga nkharamu yo ndipu wanguyibaya ndi manja pe kwambula chidya! Ndipu pavuli paki, Davidi wangubaya chikoku cho chinguko mbereri! Kumbi uŵanaŵana kuti ndiyani yo wanguwovya Davidi?— Hinya, wenga Yehova.

Penga so nyengu yinyaki yo Davidi wangulongo chiganga. Ayisraele achitanga nkhondu ndi Afilisti. Msilikali munyaki wa Afilisti wenga mtali ukongwa ndipuso chenga chinkhara chanthazi. Iyu wadanikanga kuti Goliati. Chinkhara chenichi chanyozanga asilikali a Yisraele ndipuso Yehova. Goliati wawofyanga asilikali a Yisraele kuti ŵazi kuzipumana nayu. Kweni Ayisraele wosi awopanga kupumana nayu. Davidi wati wavwa wangukambiya Goliati kuti: ‘Ini ndikupumengi! Yehova wandiwovyengi ndipu ndipundengi!’ Kumbi uŵanaŵana kuti Davidi wenga ndi chiganga?— Hinya, wenga ndi chiganga ukongwa. Kumbi ungayanja kuziŵa vo vinguchitika pavuli paki?

Davidi wanguto chakuponye ndi mya yinkhondi yankhurungu ndipu wanguluta kuchipumana ndi chinkhara. Goliati wati wawona kuti Davidi ndi mwana, wangwamba kumunyoza! Kweni Davidi wangumukambiya kuti: ‘Iwi utuza kwaku ini ndi lipanga kweni ini ndituza kwaku iwi mu zina laku Yehova!’ Pavuli paki wanguŵika mwa mukachingwi, wangutchimbiriya kwaku Goliati ndipu wanguwuponya. Mwa wo ungufikiya pachisku chaku Goliati. Chinkhara cho chinguwa pasi ndi kufwiya penipo!  Ŵati awona ivi, Afilisti wosi anguchita mantha ndipu anguthaŵa. Kumbi Davidi yo wenga mwanamana wangufiska wuli kubaya chinkhara?— Iyu wanguwovyeka ndi Yehova yo wenga ndi nthazi kuluska chinkhara cho.

Davidi wengavi mantha chifukwa waziŵanga kuti Yehova wamuwovyengi

Kumbi tingasambiranji pa nkhani yaku Davidi?— Yehova ngwanthazi kuluska weyosi. Ndipu iyu ndi Mubwezi waku. Sonu asani nyengu yinyaki wazichita mantha, uzikumbuki kuti Yehova wangakuwovya kuti uje ndi chiganga!

ŴERENGA M’BAYIBOLO LAKU

  • Sumu 56:3, 4

  • 1 Samuele 17:20-54