Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Kumbi Tingasambiranji m’Bayibolu?

 MUTU 5

Sembi Yaku Yesu ndi Mphasu Yapade Yakutuliya Kwaku Chiuta

Sembi Yaku Yesu ndi Mphasu Yapade Yakutuliya Kwaku Chiuta

1, 2. (a) Ntchinthu wuli cho chichitisa kuti mphasu yije yamampha ukongwa? (b) Ntchifukwa wuli sembi yaku Yesu ndi mphasu yapade yakutuliya kwaku Chiuta?

KUMBI ndi mphasu yamampha ukongwa niyi yo mukulondiyapu? Kuti mphasu yije yamampha ukongwa, yikhumbika kuja yakudula pe cha. Muwonga asani mphasu yo mwalonde yakukondwesani pamwenga asani mwalonde chinthu cho mwachikhumbanga ukongwa.

2 Pa mphasu zosi zo Chiuta wakutipasa, pe mphasu yimoza yakukhumbika ukongwa kuphara chechosi. Mu nkhani iyi, tisambirengi kuti Yehova wangutuma Mwana waki Yesu Khristu kuti tizisaniyi umoyu wamuyaya. Yeniyi ndi mphasu yapade yo wakupasa ŵanthu. (Ŵerengani Mateyu 20:28.) Yehova wakulongo kuti watitiyanja ukongwa pakutitumiya Yesu pacharu chapasi kuti wazitifwiyi.

KUMBI TIKHUMBIKA KUWOMBOLEKA KU VINTHU WULI?

3. Ntchifukwa wuli titufwa?

3 Sembi yaku Yesu ndi nthowa yo Yehova wakugwirisiya ntchitu kuti wawombo ŵanthu ku ubudi ndi nyifwa. (Ŵaefesu 1:7) Kuti tivwisi chifukwa cho ŵanthu akhumbikiyanga sembi yaku Yesu, tikhumbika kuziŵa vo vinguchitika mumunda wa Edene, vyaka masawuzandi nganandi vajumpha. Apapi ŵidu akwamba, Adamu ndi Eva angubuda. Mwaviyo, yiwu akufwa. Nasi titufwa chifukwa chakuti tikutore ubudi kwaku Adamu ndi Eva.—Wonani Fundu Yakukumaliya ya nambala 9.

4. Kumbi Adamu wenga yani nanga Yehova wangumupasanji?

 4 Yehova wati walenga munthu wakwamba Adamu, wangumupasa chinthu chinyaki chapachanya. Wangumupasa umoyu wambula kumala. Maŵanaŵanu ngaki kweniso liŵavu laki venga vambula ubudi. Iyu watingi watamengi cha, watingi wakotengi cha ndipuso watingi wafwengi cha. Yehova wenga nge ada ŵaki chifukwa ndiyu wangumulenga. (Luka 3:38) Iyu wakambanga ndi Adamu kaŵikaŵi. Chiuta wangukambiya Adamu vo wakhumbikanga kuchita ndipu wangumupasa ntchitu yamampha yakuti wagwirengi.Chiyambo 1:28-30; 2:16, 17.

5. Kumbi Bayibolu ling’anamuwanji po likamba kuti Adamu wangulengeka “mu chikozgu chaku Chiuta”?

5 Adamu wangulengeka “mu chikozgu chaku Chiuta.” (Chiyambo 1:27) Yehova wangumulenga ndi mijalidu yo iyu we nayu nge chanju, zeru, urunji ndi nthazi. Wangumupasa wanangwa wakusankha vinthu. Adamu wangulengeka nge roboti cha. Chiuta wangumulenga mu nthowa yakuti wasankhengi yija chamampha pamwenga chiheni. Asani Adamu wangusankha kuvwiya Chiuta, watingi wajengi mu Paradayisu kwamuyaya.

6. Ntchinthu wuli cho chinguchitika Adamu wati waleka kuvwiya Chiuta?

6 Adamu wati wasankha kuleka kuvwiya Chiuta, wangupasika chilangu cha nyifwa. Iyu wangutaya umoyu waki. Ubwezi waki ndi Yehova ungumala, wengavi mwaŵi wakuja ndi umoyu wamuyaya ndipuso kuja mu Paradayisu. (Chiyambo 3:17-19) Adamu ndi Eva angusankha kuleka kuvwiya Chiuta. Mwaviyo, pengavi chamampha cho atingi asaniyengi.

7, 8. Kumbi ubudi waku Adamu utitikwasa wuli?

7 Chifukwa cha vo Adamu wanguchita, “ubudi ukusere mucharu ndipu nyifwa yikuza chifukwa cha ubudi, mwaviyo nyifwa yikusapaliya ku ŵanthu wosi chifukwa  wosi akubuda.” (Ŵaroma 5:12) Adamu wati wabuda, wangujigulisa ndipuso ‘wakutigulisa’ ku ukapolu wa ubudi ndi nyifwa. (Ŵaroma 7:14) Kumbi tingawomboleka ku ukapolu wenuwu? Hinya.

8 Palivi munthu yo wangaweziyapu vinthu vosi vo Adamu wakutaya wati wabuda ndi kutizisiya nyifwa. Kweni Yehova wangupereka sembi yaku Yesu kuti yitiwombo ku ubudi ndi nyifwa. Tiyeni tiwoni mo sembi yeniyi yigwiriya ntchitu ndipuso mo yititiwovye.

VO YEHOVA WANGUCHITA KUTI WATIWOMBO

9. Kumbi ndi sembi ya mtundu wuli yo yakhumbikanga kuperekeka?

9 Taŵanthu tatingi tiweziyengepu cha umoyu wamuyaya wo Adamu wangutaya. Chifukwa wuli? Chifukwa chakuti tosi te akubuda. (Sumu 49:7, 8) Sembi yo yakhumbikanga yenga umoyu wa munthu wambula kubuda. Ndichu chifukwa chaki yidanika kuti “sembi yakuyanana.” (1 Timote 2:6) Sembi yeniyi yakhumbikanga kuja yakuyanana ndi umoyu wo Adamu wangutaya.

10. Kumbi Yehova wanguchitanji kuti watiwombo?

10 Kumbi Yehova wanguchitanji kuti watiwombo? Iyu wangutuma Mwana waki wakwanjiwa kuti wazi pacharu chapasi. Mwana mwenuyu, ndiyu Yehova wangwamba kulenga. (1 Yohane 4:9, 10) Yesu wenga wakunozeka kusiya Awisi ndipuso kutuwaku kuchanya ko wajanga. (Ŵafilipi 2:7) Yehova wangusamusa umoyu waku Yesu kutuwa kuchanya ndipu wanguzibalika pacharu chapasi nge munthu wambula ubudi.Luka 1:35.

Yehova wakupereka Mwana waki wakwanjiwa kuti watiwombo

11. Kumbi vinguchitika wuli kuti munthu yumoza wapereki sembi yakuwombo ŵanthu wosi?

11 Adamu wati waleka kuvwiya Yehova, wanguchitisa kuti ŵanthu wosi aleki kuja ndi umoyu wamuyaya. Kumbi penga munthu munyaki yo watingi wachitisengi kuti ŵana wosi aku Adamu aleki kufwa? Hinya.  (Ŵerengani Ŵaroma 5:19.) Yesu, yo wenga wambula kubuda, wangupereka umoyu waki nge sembi yakutiwombo. (1 Ŵakorinte 15:45) Umoyu waki wambula ubudi, unguchitisa kuti ŵana aku Adamu afwatuki ku nyifwa.—1 Ŵakorinte 15:21, 22.

12. Ntchifukwa wuli Yesu wangusuzika ukongwa?

12 Bayibolu likonkhosa masuzu ngo Yesu wangukumana nangu wechendafwi. Angumukhwechuwa mwankhaza, angumukhoma pachimiti chakutombozekiyapu ndipuso wangufwa mwakamanakamana, yo yenga nyifwa yakuŵaŵa ukongwa. (Yohane 19:1, 16-18, 30) Ntchifukwa wuli Yesu wangusuzika viyo? Chifukwa chakuti Satana wangukamba kuti palivi munthu yo wangaja wakugomezeka kwaku Chiuta asani wangakumana ndi masuzu ngakulu. Yesu wangulongo kuti munthu wambula ubudi wangaja wakugomezeka kwaku Chiuta chinanga wangasuzika ukongwa. Ŵanaŵaniyani mo Yehova wangukondwe wati wawona kugomezeka kwaku Yesu!Nthanthi 27:11; wonani Fundu Yakukumaliya ya nambala 15.

13. Kumbi sembi yaku Yesu yinguperekeka wuli?

13 Kumbi sembi yaku Yesu yinguperekeka wuli? Pa Nisani 14, mu chaka cha 33 C.E, Yehova wanguzomereza kuti Yesu wabayiki ndi arwani ŵaki. (Ŵahebere 10:10) Pati pajumpha mazuŵa ngatatu, Yehova wangumuyusa nge mungelu. Yesu wati wawere kuchanya, wangupereka kwaku Yehova sembi ya umoyu waki wambula ubudi wo wenga nawu pacharu chapasi. (Ŵahebere 9:24) Chifukwa chakuti sembi yikuperekeka, tikufwatulika ku ubudi ndi nyifwa.Ŵerengani Ŵaroma 3:23, 24.

KUMBI SEMBI YAKU YESU YINGAKUWOVYANI WULI?

14, 15. Kumbi tingachitanji kuti tigowokereki maubudi ngidu?

14 Tikwamba kwali kuyanduwa ndi mphasu yapade  yo Chiuta wakutipasa. Tiyeni tiwoni mo mphasu yeniyi yititiwovye mazuŵa nganu ndipuso mo yazakutiwovye kunthazi.

15 Tigowokereka maubudi ngidu. Nkhwakusuza kuchita vinthu vamampha pe nyengu zosi. Nyengu zinandi tinangisa, tikamba ndipuso tichita vinthu viheni. (Ŵakolose 1:13, 14) Kumbi tingachitanji kuti tigowokereki? Tikhumbika kuzomereza vo tanangisa ndipuso kupempha Yehova mwakujiyuyuwa kuti watigowoke. Asani tichita viyo, tija ndi chigomezu kuti watigowokiyengi.1 Yohane 1:8, 9.

16. Kumbi tingachita wuli kuti tije ndi njuŵi yamampha?

16 Tija ndi njuŵi yamampha. Asani njuŵi yidu yititisusa pa vo tachita, titijimba mulandu ndipu nyengu zinyaki tingaŵanaŵana kuti palivi cho tingachita kweniso tingajiwona kuti ndisi ambula kwenere. Kweni tikhumbika cha kuwere vuli. Asani tipempha Yehova kuti watigowoke, tija ndi chigomezu chakuti watitivwa ndipuso watigowokiyengi. (Ŵahebere 9:13, 14) Yehova wakhumba kuti timukambiyengi masuzu ngosi ngo tikumana nangu kweniso vo titondeka kufiska. (Ŵahebere 4:14-16) Kuchita venivi, kungatiwovya kuti tije pa ubwezi wamampha ndi Chiuta.

17. Ndi vitumbiku wuli vo tazamulonde chifukwa chakuti Yesu wakupereka umoyu waki?

17 Tilindiza kuzija ndi umoyu wamuyaya. “Mphotu ya ubudi ndi nyifwa, kweni mphasu yo Chiuta wapereka mbumoyu wamuyaya kuziya mwaku Yesu Khristu Ambuyafwi.” (Ŵaroma 6:23) Pakuti Yesu wakupereka umoyu waki chifukwa chaku isi, tazamuja ndi umoyu wamuyaya ndipuso wambula masuzu. (Chivumbuzi 21:3, 4) Kumbi tikhumbika kuchitanji kuti tizilonde vitumbiku venivi?

 KUMBI MUWONGA SEMBI YAKU YESU?

18. Tiziŵa wuli kuti Yehova watitiyanja?

18 Ŵanaŵaniyani mo muvwiya asani munthu munyaki wakupasani mphasu yamampha. Sembi yaku Yesu ndi mphasu yamampha ukongwa kuphara zosi ndipu tikhumbika kuwonga Yehova kutuliya pasi pa mtima. Lemba la Yohane 3:16 likamba kuti: “Chiuta wanguchiyanja ukongwa charu mwakuti wangupereka Mwana waki wapade.” Mbunenesa nadi kuti Yehova watitiyanja ukongwa ndichu chifukwa chaki wakupereka Yesu, Mwana waki wakwanjiwa. Tiziŵa kuti Yesu nayu watitiyanja chifukwa wangukana cha kuzitifwiya. (Yohane 15:13) Sembi yaku Yesu yilongo kuti iyu ndi Yehova atitiyanja ukongwa.Ŵagalatia 2:20.

Asani tisambira zaku Yehova, tijengi nayu pa ubwezi ndipuso timuyanjengi ukongwa

19, 20. (a) Kumbi mungachita wuli kuti muje pa ubwezi ndi Yehova? (b) Kumbi mungalongo wuli kuti muvwana mwaku Yesu?

19 Pakuti sonu mwasambira kuti Chiuta watitiyanja, kumbi mungachita wuli kuti muje nayu pa ubwezi? Nkhwakusuza kuja pa ubwezi ndi munthu yo mutimuziŵa cha. Kweni lemba la Yohane 17:3 likamba kuti tingamuziŵa Yehova. Asani mungamuziŵa, mumuyanjengi ukongwa, mumukondwesengi ndipuso wajengi bwezi linu. Mwaviyo, lutirizani kusambira Bayibolu kuti muziŵi Yehova.1 Yohane 5:3.

20 Mulongongi kuti muvwana mwaku Yesu. Bayibolu likamba kuti “yo wavwana mu Mwana we ndi umoyu wamuyaya.” (Yohane 3:36) Kumbi kuvwana mwaku Yesu kung’anamuwanji? Kung’anamuwa kuchita vo Yesu wangukamba kuti tichitengi. (Yohane 13:15) Kukamba ŵaka kuti tivwana mwaku Yesu nkhwakukwana cha. Kweni tikhumbika kuchitapu kanthu kuti tilongo kuti tivwana mwaku iyu. Lemba la Yakobe 2:26 likamba kuti: “Chivwanu chambula ntchitu zaki ntchakufwa.”

21, 22. (a) Ntchifukwa wuli tikhumbika kusanirika pa Chikumbusu cha nyifwa yaku Khristu chaka chechosi? (b) Kumbi tikambisanengenji mu Mutu 6 ndi 7?

 21 Musanirikengi pa Chikumbusu cha nyifwa yaku Khristu. Mazulu ngakuti wafwengi mawa laki, Yesu wangukamba kuti tichitengi mwambu wakukumbukiya nyifwa yaki. Chaka chechosi tichita mwambu wenuwu ndipu udanika kuti Chikumbusu pamwenga kuti “Chakurya Chamazulu cha Ambuya.” (1 Ŵakorinte 11:20; Mateyu 26:26-28) Yesu wakhumba kuti tikumbukengi kuti iyu wakupereka umoyu waki kuti watiwombo. Iyu wangukamba kuti: “Muchitengi venivi kuti mundikumbukengi.” (Ŵerengani Luka 22:19.) Asani musanirika pa Chikumbusu, mulongo kuti muwonga sembi yaku Yesu ndipuso kuti Yehova ndi Yesu atitiyanja.—Wonani Fundu Yakukumaliya ya nambala 16.

22 Sembi yaku Yesu ndi mphasu yikulu ukongwa kuphara mphasu zosi zo tingalonde. (2 Ŵakorinte 9:14, 15) Mphasu yeniyi yazamuwovya so ŵanthu mamiliyoni nganandi wo akufwa. Mutu 6 ndi 7 ukonkhosengi mo venivi vazamuchitikiya.