Julani

Lutani pa vo ve mukati

 MUTU 17

Mupempherengi Kwaku Yehova

Mupempherengi Kwaku Yehova

“Yo wakupanga kuchanya ndi charu chapasi” wakhumba kuti wavwisiyengi mapempheru ngidu.Sumu 115:15

1, 2. Ntchifukwa wuli muŵanaŵana kuti pempheru ndi mphasu yapade, nanga ntchifukwa wuli tikhumbika kuziŵa vo Bayibolu lisambiza pa nkhani ya pempheru?

CHARU chapasi ntchimana ukongwa asani tingachiyeruziya ndi chilengedu chosi. Asani Yehova waleresa pacharu chapasi, ŵanthu wosi ŵe nge kadonthu kamaji kakutuwa mundowu. (Sumu 115:15; Yesaya 40:15) Chinanga kuti ŵanthu awoneka amana ukongwa kuyeruziya ndi chilengedu chosi, lemba la Sumu 145:18, 19 likamba kuti: “Yehova we pafupi ndi wosi wo atimudana, wosi wo atimudana mu unenesa. Wo atimuwopa watiŵapasa vo akhumba, watiŵavwa asani apempha chovyu mwakuŵeyere ndipu watiŵatasa.” Te ndi mwaŵi ukulu ukongwa. Yehova Mulengi wanthazizosi, wakhumba kuti tije nayu pa ubwezi ndipuso wakhumba kuti wavwisiyengi mapempheru ngidu. Kukamba unenesa, pempheru ndi mphasu yapade yo Yehova wakupasa munthu weyosi.

2 Yehova wangavwisiya mapempheru ngidu asani tipemphera mu nthowa yo iyu wazomereza. Kumbi tingachita wuli venivi? Tiyeni tiwoni vo Bayibolu likamba pa nkhani ya pempheru.

NTCHIFUKWA WULI TIKHUMBIKA KUPEMPHERA KWAKU YEHOVA?

3. Ntchifukwa wuli mukhumbika kupemphera kwaku Yehova?

3 Yehova wakhumba kuti mupempherengi pamwenga kuti mukambengi nayu. Tiziŵa wuli venivi? Ŵerengani Ŵafilipi 4:6, 7Aŵanaŵaniyani mo iyu wakambiya pa lemba lenili. Mulengi wachilengedu chosi wakhumbisisa kuziŵa chechosi cho chitikuchitikiyani ndipu wakhumba kuti mumukambiyengi vo mukhumba kweniso masuzu nginu.

4. Kumbi kupemphera kaŵikaŵi kutovya wuli kuti ubwezi winu ndi Yehova uje wakukho?

 4 Kupemphera kutitiwovya kuja pa ubwezi wakukho ndi Yehova. Ŵanthu wo atanjana akambisana kaŵikaŵi vo aŵanaŵana, vo vitiŵasuza ndipuso mo avwiya mumtima. Kuchita viyo kutovya kuti ubwezi wawu uje wakukho. Venivi viyanana ŵaka ndi kupemphera kwaku Yehova. Kuziya m’Bayibolu, iyu watitikambiya maŵanaŵanu ngaki, mo wawone vinthu kweniso vo wazamuchita kunthazi. Mwaviyo, mungamukambiya vinthu vo ve mumtima mwinu asani mukambisana nayu kaŵikaŵi. Asani muchitengi venivi, ubwezi winu ndi Yehova ujengi wakukho.Yakobe 4:8.

VO TINGACHITA KUTI CHIUTA WAVWISIYENGI MAPEMPHERU NGIDU

5. Kumbi tiziŵa wuli kuti Yehova wavwisiya mapempheru ngosi cha?

5 Kumbi Yehova wavwisiya mapempheru ngosi? Awa. Mu nyengu ya mchimi Yesaya, Yehova wangukambiya Ayisraele kuti: “Chinanga mupemphera mapempheru nganandi, nditikuvwisiyani cha. Chifukwa manja nginu ngazaza ndopa.” (Yesaya 1:15) Asani tingaleka kuphwere, tingachita vinthu  vo Yehova watinkha vo vingachitisa kuti waleki kuvwisiya mapempheru ngidu.

6. Ntchifukwa wuli tikhumbika kuja ndi chivwanu? Kumbi tingalongo wuli kuti te ndi chivwanu?

6 Asani tikhumba kuti Yehova wavwisiyengi mapempheru ngidu, tikhumbika kuja ndi chivwanu mwaku iyu. (Marko 11:24) Wakutumika Paulo wakulemba kuti: “Kwambula chivwanu tingamukondwesa cha Chiuta, chifukwa weyosi yo wakhumba kupempha kanthu kwaku Chiuta watenere kuvwana kuti iyu waliku nadi ndipu wapereka mphasu kwaku wo atimupenja ndi mtima wosi.” (Ŵahebere 11:6) Kweni kukamba ŵaka kuti te ndi chivwanu nkhwakukwana cha. Zuŵa lelosi tikhumbika kuvwiya Yehova kuti tilongo kuti te ndi chivwanu.Ŵerengani Yakobe 2:26.

7. (a) Ntchifukwa wuli titenere kupemphera mwakujiyuyuwa kweniso mwaulemu kwaku Yehova? (b) Kumbi tingalongo wuli kuti vo tipempha titivikhumba nadi?

7 Titenere kupemphera kwaku Yehova mwakujiyuyuwa ndipuso mwaulemu. Chifukwa wuli? Tiyeruziyi kuti tikhumba kukambisana ndi fumu pamwenga pulezidenti. Mwambula kukayika, tingakambisana nayu mwaulemu kweniso mwakujiyuyuwa. Chifukwa chakuti Yehova ndi Chiuta Wanthazizosi, tikhumbika kukambisana nayu mwakujiyuyuwa ndipuso mwaulemu ukongwa, kuphara fumu pamwenga pulezidenti. (Chiyambo 17:1; Sumu 138:6) Tikhumbika kupemphera kwaku Yehova ndi mtima wosi kuti tilongo kuti vo tipempha titivikhumba nadi ndipu tingawerezangawerezanga mazu cha.—Mateyu 6:7, 8.

8. Kumbi tikhumbika kuchitanji asani tipempha Yehova kuti watiwovyi pa chinthu chinyaki?

8 Asani tipempha chinthu, titenere kuyesesa kuchitapu kanthu kuti tisaniyi vo tapempha. Mwakuyeruziyapu, asani tipempha Yehova kuti watipasi vo tikhumbika zuŵa lelosi, titenere cha kuja alesi tichiŵanaŵana kuti Yehova watipasengi chechosi, penipo asani tingagwira ntchitu tingasaniya chinthu cho tipenja. Tikhumbika kuyesesa ndipuso kugwira  ntchitu yeyosi yo tingafisa. (Mateyu 6:11; 2 Ŵatesalonika 3:10) Asani tipempha Yehova kuti watiwovyi kuti tileki kuchita vinthu viheni, titenere kukhwecha chinthu chechosi cho chingatiyesa kuti tichiti vinthu venivo. (Ŵakolose 3:5) Sonu, tiyeni tikambisani mafumbu ngakukwasana ndi pempheru.

MAFUMBU NGAKUKWASANA NDI PEMPHERU

9. Kumbi tipempherengi kwaku yani, nanga lemba la Yohane 14:6 lititisambizanji pa nkhani ya pempheru?

9 Kumbi tipempherengi kwaku yani? Yesu wangukambiya akusambira ŵaki kuti apempherengi kwa “Ada . . . akuchanya.” (Mateyu 6:9) Ndipu wanguti: “Ini ndini nthowa, unenesa kweniso umoyu. Palivi yo wangaza kwa Ada kwambula kuziya mwaku ini.” (Yohane 14:6) Mwaviyo, tikhumbika kupemphera kwaku Yehova pe kuziya mwaku Yesu. Kumbi kupemphera kuziya mwaku Yesu kung’anamuwanji? Kuti Yehova wavwisiyi mapempheru ngidu, tikhumbika kutumbika udindu wapade wo iyu wakupasa Yesu. Nge mo tikusambiriya, Yesu wanguza pacharu chapasi kuzitiwombo ku ubudi ndi nyifwa. (Yohane 3:16; Ŵaroma 5:12) Yehova wakusankha so Yesu kuti waje Wasembi Mula ndipuso Wakuyeruza.Yohane 5:22; Ŵahebere 6:20.

Mungapemphera nyengu yeyosi

10. Kumbi tikhumbika kugwada, kuja pasi pamwenga kuma asani tipemphera? Konkhosani.

10 Kumbi tikhumbika kugwada, kuja pasi pamwenga kuma asani tipemphera? Bayibolu lititisambiza kuti tingakambisana ndi Yehova mu nthowa yeyosi kweni tichitengi viyo mwaulemu. (1 Mikoka 17:16; Nehemiya 8:6; Danyele 6:10; Marko 11:25) Chinthu chakukhumbika ukongwa kwaku Yehova nkhuja ndi maŵanaŵanu ngakwenere asani tilongoro nayu mwambula kuphwere kuti taja pasi, tama pamwenga tagwada. Tingapemphera mwakukweza mazu pamwenga chamumtima kwekosi ko tingaŵa ndipuso pa nyengu yeyosi, kaya ndi msana pamwenga usiku. Asani tipemphera kwaku Yehova, tikhumbika kugomeza kuti wavwengi mapempheru  ngidu chinanga kuti ŵanthu anyaki angavwa cha.Nehemiya 2:1-6.

11. Ndi vinthu nivi vo tingapempha Yehova?

11 Ndi vinthu nivi vo tingakamba asani tipemphera? Tingapempha chechosi cho chikoliyana ndi khumbu laku Yehova. Bayibolu likamba kuti: “Chechosi cho tingapempha mwakukoliyana ndi khumbu laki, watitivwa.” (1 Yohane 5:14) Kumbi tingamupempha vo isi tikhumba? Hinya. Asani tipemphera kwaku Yehova, tijengi nge kuti tikambisana ndi munyidu. Tingakambiya Yehova vo tiŵanaŵana ndipuso vo ve mumtima widu. (Sumu 62:8) Tingamupempha kuti watipasi mzimu waki wakupaturika wo ngwanthazi, kuti utiwovyi kuchita vinthu vamampha. (Luka 11:13) Tingamupempha so kuti watipasi zeru zo zingatiwovya kusankha umampha vinthu ndipuso kuti watipasi nthazi kuti tikunthiyepu masuzu. (Yakobe 1:5) Tingapempha Yehova kuti watigowoke maubudi ngidu. (Ŵaefesu 1:3, 7) Tipempheriyengi so ŵanthu anyaki, ŵanthu a mubanja lidu kweniso abali ndi azichi mumpingu.Machitidu 12:5; Ŵakolose 4:12.

12. Kumbi ndi vinthu vakukhumbika ukongwa nivi vo titenere kuvizumbuwa asani tipemphera?

12 Ndi vinthu vakukhumbika ukongwa nivi vo titenere kuvizumbuwa asani tipemphera? Asani tipemphera, titenere kukamba zaku Yehova ndipuso khumbu laki. Tikhumbika kumuwonga kutuliya pasi pa mtima pa chechosi cho watichitiya. (1 Mikoka 29:10-13) Tiziŵa venivi chifukwa pa nyengu yo Yesu wenga pacharu chapasi, wangusambiza akusambira ŵaki mo angapemphere. (Ŵerengani Mateyu 6:9-13.) Iyu wanguŵakambiya kuti chakwamba akhumbika kupemphera kuti zina laku Chiuta lipaturiki, kung’anamuwa kuti litoweseki. Pavuli paki, Yesu wangulongo kuti tikhumbika kupempha kuti Ufumu waku Chiuta uzi kweniso khumbu laki lichitiki pacharu chapasi. Titenere kupempha dankha vinthu vakukhumbika ukongwa vo Yesu wangukamba ndipu pavuli paki tipemphengi vo tikhumba. Asani pakupemphera titamba kukamba  zaku Yehova ndipuso khumbu laki, tilongo kuti vinthu venivi vakukhumbika ukongwa kwaku isi.

13. Kumbi mapempheru ngidu ngakhumbika kuja ngatali wuli?

13 Kumbi mapempheru ngidu ngakhumbika kuja ngatali wuli? Bayibolu likamba cha. Mapempheru ngidu ngangaja ngatali pamwenga ngafupi mwakukoliyana ndi mo vinthu viliri pa nyengu yo. Mwakuyeruziyapu, tingapemphera pempheru lifupi asani tipenja kurya chakurya, kweni tingapemphera pempheru litali asani tikhumba kuwonga Yehova  pamwenga kumukambiya masuzu ngidu. (1 Samuele 1:12, 15) Tikhumbika cha kupemphera mapempheru ngatali kuti tijiwonesi kwa anyidu kuti tiziŵa kupemphera nge mo ŵanthu anyaki achitiyanga mu nyengu yaku Yesu. (Luka 20:46, 47) Mapempheru ngaviyo ngatimukondwesa cha Yehova. Iyu wakhumba kuti tipempherengi mwakutuliya pasi pa mtima.

14. Kumbi titenere kupemphera kalinga, ndipu venivi vititisambizanji zaku Yehova?

14 Kumbi titenere kupemphera kalinga? Yehova watitikambiya kuti tipempherengi kaŵikaŵi. Bayibolu likamba kuti titenere ‘kulutiriza kupemphera,’ ‘tingalekanga cha kupemphera’ kweniso ‘tipempherengi nyengu zosi.’ (Mateyu 26:41; Ŵaroma 12:12; 1 Ŵatesalonika 5:17) Nyengu zosi Yehova ngwakunozeka kuvwisiya mapempheru ngidu. Tikhumbika  kumuwonga zuŵa lelosi chifukwa chakuti watitiyanja kweniso watitipasa vinthu vinandi. Tingamupempha kuti watilongozi, watipasi nthazi ndipuso watipembuzi. Asani tiwona kuti kupemphera kwaku Yehova ndi mwaŵi wapade, tiyesesengi kusaniya mpata wakuti tipempherengi.

15. Ntchifukwa wuli tikhumbika kukamba kuti “ameni” kukumaliya kwa pempheru?

15 Ntchifukwa wuli tikhumbika kukamba kuti “ameni” kukumaliya kwa pempheru? Mazu ngakuti “ameni” ngang’anamuwa kuti, “mbunenesa nadi” pamwenga kuti “vije viyo.” Asani tikamba mazu yanga, tilongo kuti vo takamba tichipemphera vaunenesa kung’anamuwa kuti ndivu tikhumba nadi. (Sumu 41:13) Bayibolu lititisambiza kuti asani munthu munyaki wapemphera pa gulu, ŵanthu wo alipu akhumbika kukamba kuti “ameni” mwakukweza mazu pamwenga chamumtima, kulongo kuti azomereza vo vakambika mu pempheru.1 Mikoka 16:36; 1 Ŵakorinte 14:16.

MO CHIUTA WAMUKIYA MAPEMPHERU NGIDU

16. Kumbi Yehova wamuka nadi mapempheru ngidu? Konkhosani.

16 Kumbi Yehova wamuka mapempheru ngidu? Iyu wamuka nadi. Bayibolu likamba kuti iyu ‘watuvwa mapempheru.’ (Sumu 65:2) Yehova watuvwa ndipuso wamuka mapempheru nga ŵanthu mamiliyoni nganandi wo atimupempha ndi mtima wosi ndipu wamuka mu nthowa zakupambanapambana.

17. Kumbi Yehova watiŵagwirisiya wuli ntchitu angelu ndipuso ateŵeti ŵaki kuti wamuki mapempheru ngidu?

17 Yehova wamuka mapempheru ngidu mwakugwirisiya ntchitu angelu kweniso ateŵeti ŵaki. (Ŵahebere 1:13, 14) Pe ŵanthu anandi wo angupemphera kuti Yehova waŵawovyi kuvwisa fundu za m’Bayibolu ndipu ŵati amala kupemphera, kunguza Kaboni waku Yehova. Bayibolu lilongo kuti angelu agwiraku ntchitu yakupharaza “uthenga wamampha” pacharu chapasi. (Ŵerengani Chivumbuzi 14:6.) Anandi mwaku  isi tikumupemphapu Yehova kuti watiwovyi kumalana ndi suzu linyaki lo tenga nalu pamwenga kuti tisaniyi vinthu vinyaki ndipu pavuli paki mubali pamwenga muzichi munyaki wanguza kuzitiwovya.Nthanthi 12:25; Yakobe 2:16.

Yehova wangamuka mapempheru ngidu mwakugwirisiya ntchitu Akhristu anyidu kuti atiwovyi

18. Kumbi Yehova wagwirisiya wuli ntchitu mzimu wakupaturika kweniso Bayibolu kuti wamuki mapempheru ngidu?

18 Yehova wamuka so mapempheru ngidu mwakugwirisiya ntchitu mzimu wakupaturika. Asani tipemphera kuti Yehova watiwovyi kuzizipiza masuzu ngidu, iyu wangagwirisiya ntchitu mzimu wakupaturika kuti watilongozi ndi kutipasa nthazi. (2 Ŵakorinte 4:7) Yehova wagwirisiya so ntchitu Bayibolu kumuka mapempheru ngidu kweniso kutiwovya kuti tisankhengi umampha vinthu. Asani tiŵerenga Bayibolu tingasaniya malemba ngo ngangatiwovya. Yehova wangachitisa munthu munyaki kuti wamuki fundu pa maunganu yo yingatichisa pamwenga wangagwirisiya ntchitu mura mumpingu widu kuti watikambiyi fundu yinyaki ya m’Bayibolu.Ŵagalatia 6:1.

19. Ntchifukwa wuli nyengu zinyaki tingawona nge kuti Yehova wamuka cha mapempheru ngidu?

19 Nyengu zinyaki tingajifumba kuti, ‘Ntchifukwa wuli Yehova waswera kumuka mapempheru ngangu?’ Kumbukani kuti, iyu waziŵa mo wangamukiya mapempheru ngidu kweniso nyengu yakwenere yo wangamukiya. Yehova waziŵa vo tikhumbika. Titenere kulutiriza kupemphera kwaku iyu ndipu timulongongi kuti tikhumba nadi vo tipempha kweniso kuti titimugomeza. (Luka 11:5-10) Nyengu zinyaki Yehova wangamuka mapempheru ngidu mu nthowa yo isi taŵanaŵananga cha. Mwakuyeruziyapu, tingapemphera chifukwa cha masuzu ngo te nangu kweni m’malu mwakungatuzapu, Yehova wangatipasa nthazi kuti tifiski kuzizipiza.Ŵerengani Ŵafilipi 4:13.

20. Ntchifukwa wuli tikhumbika kupemphera kwaku Yehova kaŵikaŵi?

20 Tiwonga kuti te ndi mwaŵi wakukambisana ndi Yehova! Titenere kugomeza kuti wativwengi asani tipemphera. (Sumu 145:18) Asani tipemphera kaŵikaŵi kwaku Yehova ndi mtima wosi, ubwezi widu ndi iyu ujengi wakukho ukongwa.