Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Kumbi Tingasambiranji m’Bayibolu?

 MUTU 18

Kumbi Ndikhumbika Kujipatuliya Kwaku Chiuta ndi Kubatizika?

Kumbi Ndikhumbika Kujipatuliya Kwaku Chiuta ndi Kubatizika?

1. Kumbi mungajifumba fumbu wuli pavuli pakusambira buku ili?

KUSAMBIRA buku ili, kwakuwovyani kuziŵa unenesa wa m’Bayibolu pa nkhani ya umoyu wamuyaya wo Chiuta wakulayiza, vo vichitika asani munthu wafwa ndipuso kuti kwazamuja chiyuka. (Wakutaula 9:5; Luka 23:43; Yohane 5:28, 29; Chivumbuzi 21:3, 4) Panyaki mukwamba kuwungana ndi Akaboni aku Yehova ndipu mugomeza kuti asopa mu nthowa yo Chiuta wazomereza. (Yohane 13:35) Chifukwa chakuti ubwezi winu ndi Yehova wayamba kukho, vingachitika kuti mukusankha kuti mumuteŵetiyengi. Mwaviyo, mungajifumba kuti, ‘Ndingachita wuli kuti ndiyambi kuteŵete Chiuta?’

2. Ntchifukwa wuli munthu wa ku Etiopia wakhumbanga kubatizika?

 2 Munthu munyaki wa ku Etiopia yo wengaku mu nyengu yaku Yesu nayu wenga ndi maŵanaŵanu ngakuti wateŵete Chiuta. Pati pajumpha nyengu kutuliya po Yesu wanguyusikiya, Filipu yo wenga wakusambira waku Yesu wangupharaziya munthu mwenuyu. Filipu wangumulongo maukaboni ngakuti Yesu wenga nadi Mesiya. Vo munthu yo wangusambira vingumufika pa mtima mwakuti wangukamba kuti: “Awonani! Si yanga maji. Ntchinthu wuli cho chinditondekesengi kubatizika?”Machitidu 8:26-36.

3. (a) Kumbi Yesu wanguŵalamulanji akusambira ŵaki? (b) Kumbi munthu watenere kubatizika wuli?

3 Bayibolu lilongo kuti asani munthu wakhumba kuteŵete Yehova, watenere kubatizika. Yesu wangukambiya akusambira ŵaki kuti: “Kasambizeni ŵanthu a mitundu yosi kuti aje akusambira ŵangu, mukaŵabatizengi.” (Mateyu 28:19) Yesu wangulongo chakuwoniyapu chamampha pa nkhani yeniyi chifukwa nayu wangubatizika. Iyu wangubizika liŵavu losi m’maji m’malu mwakuwazika ŵaka maji pamutu. (Mateyu 3:16) Mazuŵa nganu nangu, asani Mkhristu wabatizika watenere kubizika liŵavu losi m’maji.

4. Kumbi mulongonji asani mwabatizika?

4 Asani mwabatizika, mulongo ŵanthu kuti mukhumba nadi kuja bwezi laku Chiuta ndipuso mukhumba kumuteŵete. (Sumu 40:7, 8) Mwaviyo, mungajifumba kuti, ‘Kumbi ndingachita wuli kuti ndibatiziki?’

KUZIŴA YEHOVA KWENISO KUJA NDI CHIVWANU

5. (a) Ntchinthu wuli cho mukhumbika dankha kuchita mwechendabatiziki? (b) Ntchifukwa wuli mukhumbika kuwungana ndi Akaboni aku Yehova?

5 Mwechendabatiziki, mukhumbika dankha kuziŵa Yehova kweniso Yesu. Mwayamba kali kuchita venivi chifukwa  musambira Bayibolu. (Ŵerengani Yohane 17:3.) Pe so vinthu vinyaki vo mutenere kuchita. Bayibolu likamba kuti tikhumbika “kuliziŵa umampha” khumbu laku Yehova. (Ŵakolose 1:9) Maunganu nga Akaboni aku Yehova, ngakuwovyeningi kuja pa ubwezi wamampha ndi Yehova. Ndichu chifukwa chaki mukhumbika kusanirika pa maunganu ngenanga nyengu zosi.Ŵahebere 10:24, 25.

Mwechendabatiziki mukhumbika kusambira Bayibolu

6. Kumbi mukhumbika kuziŵa vinthu vinandi wuli m’Bayibolu mwechendabatiziki?

6 Yehova wakhumba kuti muziŵi vosi cha vo ve m’Bayibolu mwechendabatiziki. Iyu wanguzomereza kuti munthu wa ku Etiopia wabatiziki chinanga kuti waziŵanga vinthu vimanavi. (Machitidu 8:30, 31) Tilutirizengi kusambira vakukwasana ndi Chiuta mpaka muyaya. (Wakutaula 3:11) Kuti mubatiziki, mukhumbika dankha kuziŵa visambizu va m’Bayibolu vo munthu wasambira pakwamba ndipuso kuvigomeza.Ŵahebere 5:12.

7. Kumbi kusambira Bayibolu kwakuwovyani wuli?

7 Bayibolu likamba kuti: “Kwambula chivwanu tingamukondwesa cha Chiuta.” (Ŵahebere 11:6) Mwaviyo, mukhumbika kuja ndi chivwanu mwechendabatiziki. Bayibolu lititikambiya kuti ŵanthu anyaki mutawuni ya ku Korinte avwisiyanga vo akusambira aku Yesu asambizanga. Yiwu “angwamba kuvwana ndipu angubatizika.” (Machitidu 18:8) Mwakuyanana ŵaka, kusambira Bayibolu kwakuwovyani kuja ndi chivwanu mu malayizu ngaku Chiuta ndipuso musembi yaku Yesu, kuti ye ndi nthazi yakutitasa ku ubudi ndi nyifwa.Yoswa 23:14; Machitidu 4:12; 2 Timote 3:16, 17.

MUKAMBIYENGEKU ŴANTHU UNENESA WA M’BAYIBOLU

8. Ntchinthu wuli cho chikuchitiseningi kuti mukambiyengeku ŵanthu vo musambira?

8 Po mulutiriza kusambira Bayibolu kweniso kuwona  mo litikuwovyiyani pa umoyu winu, chivwanu chinu chijengi chakukho. Mukhumbengi kukambiyaku ŵanthu vo musambira. (Yeremiya 20:9; 2 Ŵakorinte 4:13) Kumbi mbayani wo mukhumbika kuŵakambiyaku?

Chivwanu chikuchitiseningi kuti mukambiyengeku ŵanthu vo mugomeza

9, 10. (a) Kumbi mbayani wo mungayamba kuŵakambiyaku vo musambira? (b) Kumbi mutenere kuchitanji asani mukhumba kwamba kupharaza ndi mpingu?

9 Mungakambiyaku abali ŵinu, anyinu, wo muja nawu pafupi, pamwenga wo mugwira nawu ntchitu. Kuchita venivi nkhwamampha kweni nyengu zosi muŵakambiyengi mwaulemu kweniso mwachanju. Pavuli paki, muyambengi kupharaza ndi mpingu. Asani muwona kuti mungafiska kupharaza, kambiyani munthu yo watikusambizani Bayibolu kuti mukhumba kwamba kupharaza ndi mpingu. Asani iyu wawona kuti mungafiska kupharaza ndipuso muchita vinthu mwakukoliyana ndi fundu za m’Bayibolu, wangachikulindani kuti mukakumani ndi ŵara ŵaŵi a mumpingu winu.

10 Ntchinthu wuli cho ŵara ŵenaŵa amukambisana namwi? Yiwu akambisanengi namwi kuti awoni asani mukuvwisa visambizu va m’Bayibolu vo munthu wasambira pakwamba kweniso asani mutivigomeza. Yiwu awonengi so asani mugwirisiya ntchitu vo Bayibolu likamba pa umoyu winu ndipuso asani mukhumba nadi kuja Kaboni waku Yehova. Kumbukani kuti ŵara aphwere ŵanthu wosi wo ŵe mumpingu kusazapu imwi ndipu mungawopanga cha kukambisana nawu. (Machitidu 20:28; 1 Petro 5:2, 3) Pavuli pakuti akumana namwi, ŵara angakukambiyani kuti mungayamba kupharaza ndi mpingu.

11. Ntchifukwa wuli kusintha vinthu vinyaki mwechendayambi kupharaza ndi mpingu nkhwakukhumbika ukongwa?

11 Ŵara angakukambiyani kuti mukhumbika dankha kusintha vinthu vinyaki mwechendayambi kupharaza ndi mpingu. Ntchifukwa wuli kuchita viyo nkhwakukhumbika  ukongwa? Chifukwa chakuti asani tikambiya ŵanthu vakukwasana ndi Yehova, timiya iyu ndipu vo tichita vikhumbika kulongo kuti titimutumbika.1 Ŵakorinte 6:9, 10; Ŵagalatia 5:19-21.

LAPANI NDIPUSO NG’ANAMUKANI

12. Ntchifukwa wuli ŵanthu wosi akhumbika kulapa?

12 Pe so chinthu chinyaki cho mukhumbika kuchita mwechendabatiziki. Wakutumika Petro wangukamba kuti: “Lapani ndipu ng’anamukani kuti maubudi nginu ngasisitiki.” (Machitidu 3:19) Kumbi kulapa kung’anamuwanji? Kung’anamuwa kujivwiya lisungu ukongwa pa chinthu chiheni cho tachita. Mwakuyeruziyapu, asani mwenga ndi jalidu la ureŵi mukhumbika kulapa. Chinanga kuti pa umoyu winu wosi mwayesesa kuchita vinthu vamampha, mukhumbika mbwenu kulapa chifukwa tosi tibuda ndipu tikhumbika kupempha Chiuta kuti watigowoke.Ŵaroma 3:23; 5:1.

13. Kumbi ‘kung’anamuka’ kung’anamuwanji?

13 Kujivwiya ŵaka lisungu pa vinthu vo wanangisa nkhwakukwana cha. Wakutumika Petro wangukamba so kuti mukhumbika ‘kung’anamuka.’ Venivi ving’anamuwa kuti, mukhumbika kuleka kuchita vinthu vosi viheni vo mwachitanga kali ndi kwamba kuchita vinthu vamampha. Tiyeruziyi kuti, muluta kumalu nganyaki ngo nkhakwamba kulutaku. Mwati mwafika malu nganyaki muwona kuti nthowa yo mwaziya njakwenere cha. Kumbi mungachita wuli? Mwambula kukayika, muweleriyengi ndipu muziyengi nthowa yakwenere. Mwakuyanana ŵaka, muchisambira Bayibolu panyaki mwawona kuti mwe ndi mijalidu yinyaki pamwenga pe vinthu vinyaki vo mukhumbika kusintha. Yesesani ‘kung’anamuka’ pamwenga kuti kuleka kuchita vinthu viheni ndi kwamba kuchita vinthu vamampha.

 JIPATULIYENI KWAKU YEHOVA

Kumbi mwamulayiza Yehova kuti mumuteŵetiyengi?

14. Kumbi kujipatuliya kwaku Yehova kung’anamuwanji?

14 Chinthu chinyaki so chakukhumbika cho mutenere kuchita mwechendabatiziki ndichu kujipatuliya kwaku Yehova. Kujipatuliya kwaku Yehova kung’anamuwa kupemphera kwaku iyu. Pa nyengu iyi mutimulayiza kuti musopengi iyu pe kweniso muchitengi khumbu laki ndipu venivi ndivu vakukhumbika ukongwa pa umoyu winu.Marangu 6:15.

15, 16. Ntchinthu wuli cho chingachitisa munthu kuti wajipatuliyi kwaku Yehova?

15 Kulayiza kuti muteŵetiyengi Yehova pe, kuyanana ndi kulayiza munthu yo mutimuyanja kuti mwazamuja nayu limoza kwa umoyu winu wosi. Tiyeruziyi kuti munthurumi we pa chibwezi ndi munthukazi. Asani munthurumi wawona kuti munthukazi yo we ndi nkharu yamampha, watimuyanja ndipu pavuli paki waŵanaŵana kumuto. Chinanga kuti nkhani yakuto, ndi nkhani yikulu ukongwa kweni munthurumi wazomera udindu wenuwu chifukwa chakuti watimuyanja munthukazi yo.

16 Pa nyengu yo musambira zaku Yehova, mutamba kumuyanja ndipu mukhumba kuti muyesesi kumuteŵete. Venivi vikuchitiseningi kuti mupempheri kwaku iyu ndi kumulayiza kuti mumuteŵetiyengi. Bayibolu likamba kuti weyosi yo wakhumba kulondo Yesu wakhumbika ‘kujikana yija.’ (Marko 8:34) Kumbi venivi ving’anamuwanji? Ving’anamuwa kuti, tidanjizengi kuvwiya Yehova pa umoyu widu. Vo Yehova wakhumba ndivu vakukhumbika ukongwa kuphara vakukhumba vidu.Ŵerengani 1 Petro 4:2.

MUNGAWOPANGA CHA KUTI MUTONDEKENGI

17. Ntchifukwa wuli ŵanthu anyaki atijipatuliya cha kwaku Yehova?

17 Ŵanthu anyaki atondeka kujipatuliya kwaku Yehova  chifukwa atopa kuti angafiska cha vo angamulayiza kuti ateŵetiyengi iyu pe. Yiwu akhumba cha kuguŵisa Yehova ndipuso angaŵanaŵana kuti asani angaleka kujipatuliya kwaku Yehova, wazakuŵamba mulandu cha pa vo anangisa.

18. Ntchinthu wuli cho chingakuwovyani kuti muleki kopa kuguŵisa Yehova?

18 Kwanja Yehova kukuwovyeningi kuti muleki kopa kumuguŵisa. Chifukwa chakuti mutimuyanja, muyesesengi kuti mufiski vo mukumulayiza. (Wakutaula 5:4; Ŵakolose 1:10) Muwonengi kuti kuchita khumbu laku Yehova nkhwakusuza cha. Wakutumika Yohane wangulemba kuti: “Kwanja Chiuta kung’anamuwa kusunga marangu ngaki, ndipu marangu ngaki ngazitu cha.”1 Yohane 5:3.

19. Ntchifukwa wuli mukhumbika cha kopa kujipatuliya kwaku Yehova?

19 Chinanga kuti ndimwi akubuda kweni mungajipatuliya mbwenu kwaku Yehova. Iyu wakhumba kuti tichitengi vinthu vo tingafiska. (Sumu 103:14) Wakuwovyeningi kuti muchitengi vinthu vamampha. (Yesaya 41:10) Gomezani Yehova ndi mtima winu wosi ndipu ‘iyu wanyorosengi nthowa yinu.’Nthanthi 3:5, 6.

KULONGO PAKWERU KUTI MUKUJIPATULIYA

20. Ntchinthu wuli chinyaki cho mutenere kuchita asani mwajipatuliya kwaku Yehova?

20 Kumbi muwona kuti ndimwi akunozeka kujipatuliya kwaku Yehova? Asani mwajipatuliya, pe so chinthu chinyaki cho mungachita. Mukhumbika kubatizika.

21, 22. Kumbi ‘mungalongo wuli pakweru’ chivwanu chinu?

21 Kambiyani wakukumanisa ntchitu za wupu wa ŵara mumpingu winu kuti mukujipatuliya kwaku Yehova ndipu mukhumba kubatizika. Iyu wakambiyengi ŵara anyaki kuti akambisani namwi so visambizu va m’Bayibolu vo  munthu wasambira pakwamba. Asani awona kuti ndimwi akwenere kubatizika, akukambiyeningi kuti mwamubatizika pa unganu wadera pamwenga wachigaŵa wo utuza wa Akaboni aku Yehova. Pa unganu wenuwu, pamukambika nkhani yakukonkhosa vo ubatizu ung’anamuwa. Mubali yo wamukamba nkhani yeniyi, wamufumba wo akhumba kuchibatizika mafumbu ngaŵi  ngapusu. Asani mwamumuka mafumbu ngenanga ‘mwamulongo pakweru’ chivwanu chinu.Ŵaroma 10:10.

22 Pavuli paki mwamubatizika, mwamubizika m’maji liŵavu linu losi. Pa nyengu iyi weyosi wamuziŵa kuti  mukujipatuliya kwaku Yehova ndipu sonu ndimwi Kaboni waki.

CHO UBATIZU WINU UNG’ANAMUWA

23. Kumbi kubatizika “mu zina la Ada, la Mwana ndipuso la mzimu utuŵa” kung’anamuwanji?

23 Yesu wangukamba kuti akusambira ŵaki atenere kubatizika “mu zina la Ada, la Mwana ndipuso la mzimu utuŵa.” (Ŵerengani Mateyu 28:19.) Kumbi venivi ving’anamuwanji? Ving’anamuwa kuti muziŵa udindu waku Yehova, vo Yesu wakuchita ndi vo wazamuchita pakufiska khumbu laku Chiuta kweniso mo Chiuta wagwirisiya ntchitu mzimu utuŵa kuti wafiski khumbu laki.Sumu 83:18; Mateyu 28:18; Ŵagalatia 5:22, 23; 2 Petro 1:21.

Asani mwabatizika, mulongo kuti mukhumba kuchita khumbu laku Chiuta

24, 25. (a) Kumbi ubatizu umiyanji? (b) Kumbi tikambisanengenji mumutu wakumaliya?

24 Ubatizu umiya chinthu chakukhumbika ukongwa. Asani akubizani m’maji, ving’anamuwa kuti mwaleka vinthu viheni vo mwachitanga kali. Asani akuzuwuwani, ving’anamuwa kuti mwayamba kuchita khumbu laku Chiuta. Vilongo kuti mulutirizengi kuteŵete Yehova. Kumbukani kuti mukujipatuliya ku munthu cha, gulu pamwenga ntchitu kweni mukujipatuliya kwaku Yehova.

25 Kujipatuliya kukuwovyeningi kwamba kuja pa ubwezi wakukho ndi Chiuta. (Sumu 25:14) Venivi ving’anamuwa kuti, ndi ubatizu pe cha wo wazamuchitisa kuti munthu wazitasiki. Wakutumika Paulo wakulemba kuti: “Lutirizani kunoza utasi winu mwamantha ndipuso mwakunjenjeme.” (Ŵafilipi 2:12) Ubatizu nkhwamba ŵaka. Kumbi mungachita wuli kuti muje pa ubwezi wakukho ndi Yehova? Mutu wakumaliya umukengi fumbu lenili.