Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Kumbi Tingasambiranji m’Bayibolu?

 MUTU 19

Lutirizani Kuja pa Ubwezi ndi Yehova

Lutirizani Kuja pa Ubwezi ndi Yehova

1, 2. Ndiyani yo wangativikiriya mazuŵa nganu?

TIYERUZIYI kuti mutenda pamsewu ndipu kutuza vuwa ya chimphepu chikulu. Mitambu yafipa ukongwa. Malimphezi ngatamba kung’anima kweniso ngadilirisa. Pambula kuswera vuwa yitamba kuwa ndipu mupenja malu ngakuti mubisamepu. Pakumaliya, mukondwa ukongwa chifukwa mwasaniya malu ngamampha ngakuti mubisamepu.

2 Mazuŵa nganu, vinthu vo vichitika mucharu tingaviyeruziya ndi vuwa ya chimphepu. Vinthu vilutiriya kunangika. Mwaviyo, mungajifumba kuti, ‘Kumbi ndiyani wangandivikiriya?’ Munthu munyaki yo wakulembaku buku la Sumu wangulemba kuti: “Ndikambiyengi Yehova kuti: ‘Imwi ndimwi malu ngangu ngakuthaŵiyapu ndipuso linga langu. Chiuta wangu yo nditimuthemba.’” (Sumu 91:2) Yehova wangatiwovya pa masuzu ngo tikumana nangu, ndipu watichitiyengi vinthu vamampha munthazi.

3. Kumbi tingachita wuli kuti Yehova wativikiriyengi?

3 Kumbi Yehova wangativikiriya wuli? Iyu wangatiwovya kumalana ndi suzu yeyosi yo takumana nayu. Chiuta ngwanthazi kuphara munthu weyosi yo wangakhumba kutipweteka. Chinanga kuti vinthu viheni vingatichitikiya, titenere kugomeza kuti Yehova wanozengi vinthu vosi munthazi. Bayibolu lititikambiya kuti: “Lutirizani kuchita vinthu vo vingachitisa kuti Chiuta wakuyanjeningi.” (Yuda 21) Asani tikhumba kuti Yehova watiwovyengi pa nyengu ya masuzu, titenere kuja nayu pa ubwezi. Kumbi tingachita wuli kuti tije pa ubwezi ndi Yehova?

 MUWONGENGI CHANJU CHAKU CHIUTA

4, 5. Kumbi Yehova walongo wuli kuti watitiyanja?

4 Kuti tije pa ubwezi ndi Yehova, tikhumbika kuziŵa kuti iyu watitiyanja ukongwa. Ŵanaŵaniyani vinthu vosi vo Yehova watichitiya. Iyu wakutipasa charu chakutowa cho mwe vakume ndipuso nyama zakupambanapambana. Watitipasa so chakurya chamampha kweniso maji ngamampha ngo titumwa. Mwakugwirisiya ntchitu Bayibolu, Yehova watitikambiya zina laki ndipuso mijalidu yaki yamampha. Kuluska vosi, iyu wakulongo kuti watitiyanja ukongwa pakutuma Mwana waki Yesu kuti wazitifwiyi pacharu chapasi. (Yohane 3:16) Chifukwa cha sembi yo Yesu wakupereka, tilindiza kuzija ndi umoyu wamampha kunthazi.

5 Yehova wakujalikisa Ufumu wo Yesu ndiyu walamuliya. Ufumu wenuwu, ndi boma lakuchanya lo lituzengepu masuzu ngosi pambula kuswera yapa. Ufumu wenuwu, uchitisengi charu chapasi kuja paradayisu, weyosi wazamuja mwachimangu ndipuso mwalikondwa kwamuyaya. (Sumu 37:29) Yehova walongo so kuti watitiyanja chifukwa watitisambiza vo tingachita kuti tije ndi umoyu wamampha. Watitikambiya kuti tipempherengi kwaku iyu ndipu nyengu zosi ngwakunozeka kuvwa mapempheru ngidu. Venivi vilongo kuti Yehova watitiyanja tosi.

6. Ntchinthu wuli cho mukhumbika kuchita chifukwa chakuti Yehova watikuyanjani?

6 Ntchinthu wuli cho mukhumbika kuchita chifukwa chakuti Yehova watikuyanjani? Mukhumbika kumulongo kuti muwonga vinthu vosi vo wakuchitiyani. Ntchachitima kuti ŵanthu anandi mazuŵa nganu awonga cha. Venivi ndivu so vachitikanga mu nyengu yaku Yesu. Zuŵa linyaki Yesu wanguchiza ŵanthu amakhati akukwana 10, kweni yumoza pe ndiyu wanguwonga. (Luka 17:12-17) Tikhumbika kuja nge munthu yo wanguwonga Yesu. Nyengu zosi timuwongengi Yehova.

7. Kumbi tikhumbika kumuyanja wuli Yehova?

 7 Tikhumbika so kulongo kuti titanja Yehova. Yesu wangukambiya akusambira ŵaki kuti atenere kwanja Yehova ndi mtima wawu wosi, umoyu wawu wosi ndipuso maŵanaŵanu ngawu ngosi. (Ŵerengani Mateyu 22:37.) Kumbi venivi ving’anamuwanji?

8, 9. Kumbi tingalongo wuli kuti titanja Yehova?

8 Kukamba ŵaka kuti titanja Yehova nkhwakukwana cha. Vakuchita vidu vitenere kulongo kuti titanja nadi Yehova ndi mtima widu wosi, umoyu widu wosi ndipuso maŵanaŵanu ngidu ngosi. (Mateyu 7:16-20) Bayibolu likamba kuti, asani titanja Chiuta tikhumbika kuvwiya marangu ngaki. Kuvwiya marangu ngaku Yehova nkhwambula kusuza chifukwa “ngazitu cha.”Ŵerengani 1 Yohane 5:3.

9 Asani tivwiya Yehova tija ndi umoyu wamampha kweniso walikondwa. (Yesaya 48:17, 18) Tiyeni tiwoni vinthu vo vingatiwovya kuti tilutirizi kuja pa ubwezi ndi Yehova.

LUTIRIZANI KUJA PA UBWEZI NDI YEHOVA

10. Ntchifukwa wuli tikhumbika kulutiriza kusambira zaku Yehova?

10 Kumbi munguchita wuli kuti muje bwezi laku Yehova? Kusambira Bayibolu kwakuwovyani kuti mumuziŵi umampha Yehova kweniso muje nayu pa ubwezi. Ubwezi wenuwu we nge motu wo imwi mukhumba cha kuti uzimwi. Kuti motu uleki kuzimwa mukhumbika kusonkhaku nkhuni. Mwakuyanana ŵaka, mukhumbika kulutiriza kusambira zaku Yehova kuti ubwezi winu ndi iyu uje wakukho.Nthanthi 2:1-5.

Mwakuyanana ndi motu wo ukhumbika kusonkhaku, mukhumbika kulutiriza kusambira zaku Yehova kuti ubwezi winu ndi iyu uje wakukho

11. Kumbi kusambira Bayibolu kukuwovyeningi wuli?

11 Po mulutiriza kusambira Bayibolu, mukondwengi ndi vo musambirengi. Wonani mo akusambira ŵaŵi aku Yesu anguvwiya, Yesu wachiŵakonkhose mauchimi nga m’Bayibolu. Yiwu angukamba kuti: “Asi mitima yidu yingukwasika ukongwa wachikambisana nasi pamusewu, ndipuso  wachitikonkhose Malemba mwakuvwika umampha?”Luka 24:32.

12, 13. (a) Ntchinthu wuli cho mukhumbengi cha kuchita? (b) Kumbi tingachita wuli kuti tilutirizi kwanja Yehova?

12 Akusambira angukwasika ukongwa ŵati avwisa Malemba. Namwiso mwati mwayamba kuvwisa vo Bayibolu likamba mutenere kuti mungukwasika ndipu mwakhumbisisanga kuziŵa vinandi. Venivi vingukuwovyani kuti mumuziŵi Yehova ndipuso mumuyanjengi. Mwaviyo, mukhumbengi cha kuti muleki kumuyanja Yehova.Mateyu 24:12.

13 Chifukwa chakuti sonu ndimwi bwezi laku Chiuta, yesesani kuchita vinthu vo vingakuwovyani kuti mulutirizi kuja nayu pa ubwezi wakukho. Mutenere kulutiriza kusambira zaku Yehova ndi Yesu kweniso kuŵanaŵaniya vo mwasambira ndi kuvigwirisiya ntchitu pa umoyu winu. (Yohane 17:3) Asani muŵerenga pamwenga musambira Bayibolu,  mujifumbengi kuti: ‘Kumbi vo ndisambira vitindisambizanji zaku Yehova? Ntchifukwa wuli ndikhumbika kumuyanja ndi mtima wangu wosi kweniso umoyu wangu wosi?’1 Timote 4:15.

14. Kumbi kupemphera kutitiwovya wuli kuti tije pa ubwezi wakukho ndi Yehova?

14 Asani mwe ndi mubwezi winu, mukambisana nayu nyengu zosi ndipu kuchita viyo kutovya kuti muyanjanengi ukongwa. Mwakuyanana ŵaka, asani tikambisana ndi Yehova nyengu zosi, ubwezi widu ndi iyu uja wakukho. (Ŵerengani 1 Ŵatesalonika 5:17.) Pempheru ndi mphasu yamampha ukongwa yakutuliya kwa Awusefwi akuchanya. Nyengu zosi timukambiyengi vo ve mumtima mwidu. (Sumu 62:8) Mapempheru ngidu ngakhumbika cha kuja ngakuloŵeza kweni titenere kupemphera kutuliya pasi pa mtima. Asani tilutirizengi kusambira Bayibolu ndipuso kupemphera kwaku Yehova, ubwezi widu ndi iyu ujengi wakukho.

KUKAMBIYAKU ANYIDU ZAKU YEHOVA

15, 16. Kumbi ntchitu yakupharaza mutiyiwona wuli?

15 Asani tikhumba kulutiriza kuja pa ubwezi ndi Yehova, titenere kukambiyaku anyidu vo tigomeza. Palivi mwaŵi wakuyanana ndi kukambiyaku anyidu zaku Yehova. (Luka 1:74) Yesu wakukambiya Akhristu aunenesa wosi kuti apharazengi. Mwaviyo, weyosi wakhumbika kupharaza uthenga wamampha wa Ufumu waku Chiuta. Kumbi imwi mukwamba kupharaza?Mateyu 24:14; 28:19, 20.

16 Wakutumika Paulo wawonanga kuti ntchitu yakupharaza njakukhumbika ukongwa ndipu wangukamba kuti yenga “chinthu chakuzirwa.” (2 Ŵakorinte 4:7) Ntchitu yakukhumbika ukongwa yo mutenere kugwira, nkhukambiyaku ŵanthu zaku Yehova ndi vo wakhumba kuchita. Asani mupharaza, muteŵete Yehova ndipu iyu wawona kuti vo  muchita vakukhumbika ukongwa. (Ŵahebere 6:10) Kupharaza kungawovya so imwi ndi ŵanthu wo mutiŵapharaziya kuti muje pa ubwezi ndi Yehova kweniso kuti muzilonde umoyu wamuyaya. (Ŵerengani 1 Ŵakorinte 15:58.) Kumbi pe ntchitu yinyaki yakukondwesa kuphara ntchitu yakupharaza?

17. Ntchifukwa wuli tikhumbika kupharaza mwaliŵi?

17 Ntchitu yakupharaza yikhumbika kugwirika mwaliŵi. Titenere ‘kupharaza mazu’ ndipu tikhumbika ‘kungapharaza mwaliŵi.’ (2 Timote 4:2) Ŵanthu akhumbika kuti aziŵi Ufumu waku Chiuta. Bayibolu likamba kuti: “Zuŵa likulu laku Yehova le pafupi! Le pafupi ndipu lituza mwaliŵi ukongwa!” Kukamba unenesa, umaliru ‘uswerengi cha!’ (Zefaniya 1:14; Habakuku 2:3) Pambula kuswera yapa, Yehova watuzengepu charu chiheni chaku Satana. Ivi vechendachitiki, ŵanthu wosi akhumbika kutcheŵeseka kuti asankhi kuteŵete Yehova.

18. Ntchifukwa wuli tikhumbika kusopa Yehova limoza ndi Akhristu anyidu?

18 Yehova wakhumba kuti timusopengi limoza ndi Akhristu anyidu. Bayibolu likamba kuti: “Tiyeni tiŵanaŵaniyanengi kuti tichisanengi pa chanju ndi ntchitu zamampha. Tingalekanga cha kuwungana pamoza, nge mo anyaki achitiya. Kweni tichisanengi ndipu tilutirizi kuchita venivi ukongwa po tiwona kuti zuŵa lo le pafupi.” (Ŵahebere 10:24, 25) Titenere kuyesesa kusanirikangapu pa maunganu ngosi. Asani te pa maunganu, tichisana ndi Akhristu anyidu.

19. Ntchinthu wuli cho chingatiwovya kuti tiyanjengi Akhristu anyidu?

19 Ku maunganu, mwamusaniya abali kweniso azichi akupambanapambana wo angakuwovyani kusopa Yehova. Yiwu atesesa kusopa Yehova nge mo imwi muchitiya. Abali ndi azichi ŵenaŵa, anangisa nyengu zinyaki chifukwa chakuti nawu mbakubuda. Mwaviyo, asani akunangiyani muŵagowokiyengi. (Ŵerengani Ŵakolose 3:13.) Nyengu  zosi muwonengi mijalidu yamampha yo Akhristu anyinu ŵe nayu. Asani muchitengi viyo muŵayanjengi ukongwa ndipuso mujengi pa ubwezi wakukho ndi Yehova.

UMOYU WENEKU

20, 21. Kumbi “umoyu weneku” ndi nuwu?

20 Yehova wakhumba kuti mabwezi ngaki ngosi ngakondwengi. Bayibolu lititikambiya kuti kunthazi vinthu vazamukuŵa umampha ukongwa kupambana ndi mo viliri mazuŵa nganu.

Yehova wakhumba kuti muzikondwi ndi “umoyu weneku.” Kumbi imwi mwazakuwusaniya?

21 Muparadayisu, tazamuja kwa vyaka 70 pamwenga 80 pe cha kweni tazamuja ndi “umoyu wamuyaya” ndipu tazamutamanga cha. Tazamuja mwachimangu kweniso mwalikondwa. Bayibolu likamba kuti wenuwu ndiwu “umoyu weneku.” Yehova watitilayiza kuti wazakutipasa umoyu wenuwu kweni tikhumbika ‘kukolesa’ chilindiza cho te nachu.1 Timote 6:12, 19.

22. (a) Kumbi tingachita wuli kuti ‘tikolesi chilindiza cha umoyu weneku’? (b) Ntchifukwa wuli tingajipasa cha umoyu wamuyaya?

22 Kumbi tingachita wuli kuti ‘tikolesi chilindiza cha umoyu weneku’? Tikhumbika ‘kuchitanga vinthu vamampha.’ (1 Timote 6:18) Ivi ving’anamuwa kuti titenere kugwirisiya ntchitu vo tisambira m’Bayibolu. Chinanga kuti ve viyo, kuti tizisaniyi umoyu wamuyaya vithemba pa kuyesesa kwidu cha chifukwa tingajipasa cha umoyu wamuyaya. Umoyu wamuyaya ndi mphasu yo Yehova wazamupereka kwa ateŵeti ŵaki akugomezeka chifukwa cha ‘lisungu laki likulu.’ (Ŵaroma 5:15) Awusefwi akuchanya mbakukhumbisisa kuzipasa mteŵeti wawu weyosi wakugomezeka mphasu yeniyi.

23. Ntchifukwa wuli tikhumbika kusankha umampha?

23 Jifumbeni kuti, ‘Kumbi ndisopa Chiuta mu nthowa yo iyu wazomereza?’ Asani muwona kuti mukhumbika kusintha, sinthani mwaliŵi. Yehova wajengi malu ngidu ngakubisamapu asani titimugomeza ndipuso tichita chechosi cho  tingafiska kuti timuvwiyi. Iyu wavikiriyengi ŵanthu ŵaki mu mazuŵa ngakumaliya nga charu chaku Satana. Pavuli paki, Yehova wazamuwonesesa kuti wafiska layizu laki lakutipasa umoyu wamuyaya m’Paradayisu. Mungazisaniya umoyu weneku asani sonu musankhengi umampha!