Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Kumbi Tingasambiranji m’Bayibolu?

 MUTU 12

Kumbi Mungachita Wuli Kuti Muje Bwezi Laku Chiuta?

Kumbi Mungachita Wuli Kuti Muje Bwezi Laku Chiuta?

1, 2. Kumbi ndi ŵanthu naŵa wo ŵenga mabwezi ngaku Yehova?

KUMBI ndi munthu wa mtundu wuli yo mungayanja kuti waje mubwezi winu? Wangaja munthu yo mutanja, yo mukoliyana nayu ndipu nayu wakoliyana namwi. Munthu yo wachitiya lisungu ŵanthu ndipuso we ndi mijalidu yo yitikukondwesani.

2 Yehova Chiuta wasankha ŵanthu anyaki kuti aje mabwezi ngaki. Mwakuyeruziyapu, Abrahamu wenga bwezi laku Yehova. (Yesaya 41:8; Yakobe 2:23) Yehova wayanjanga so Davidi. Iyu wangukamba kuti Davidi wenga ‘munthu wapamtima paki.’ (Machitidu 13:22) Ndipu mchimi Danyele nayu wenga munthu “wakwanjiwa ukongwa” kwaku Yehova.Danyele 9:23.

3. Kumbi Abrahamu, Davidi ndi Danyele anguchita wuli kuti aje mabwezi ngaku Yehova?

3 Kumbi Abrahamu, Davidi ndi Danyele anguchita wuli kuti aje mabwezi ngaku Yehova? Yehova wangukambiya Abrahamu kuti: “Wavwiya mazu ngangu.” (Chiyambo 22:18) Yehova waja bwezi la ŵanthu wo atimuvwiya. Kaya pangaŵa mtundu unyaki wa ŵanthu, ungaja bwezi laku Chiuta nge mo venge ndi mtundu wa Ayisraele. Yehova wangukambiya mtundu wenuwu kuti: “Vwiyani mazu ngangu ndipu ini ndijengi Chiuta winu, imwi mujengi ŵanthu ŵangu.” (Yeremiya 7:23) Mwaviyo, asani namwi mukhumbisisa kuja bwezi laku Yehova, mukhumbika kumuvwiya.

YEHOVA WAVIKILIYA MABWEZI NGAKI

4, 5. Kumbi Yehova watingavikiliya wuli mabwezi ngaki?

4 Bayibolu likamba kuti Yehova wakhumba “kulongo  nthazi zaki ku ŵanthu wo atimuvwiya ndi mtima wosi.” (2 Mikoka 16:9) Pa lemba la Sumu 32:8, Yehova walayiza mabwezi ngaki kuti: ‘Ndazakukupasani zeru ndi kukulongoni nthowa yo mutenere kwendamu. Ndazakukupasani ulongozi ndipu ndazakukuvikiliyani.’

5 Te ndi murwani wanthazi yo wakhumba cha kuti tije mabwezi ngaku Chiuta. Kweni Yehova ngwakunozeka kutivikiliya. (Ŵerengani Sumu 55:22.) Chifukwa chakuti te mabwezi ngaku Yehova, titimuteŵete ndi mtima wosi. Tija akugomezeka kwaku iyu chinanga tingakumana ndi masuzu ngakulu. Ndipu te ndi chigomezu nge cho wakulemba sumu wenga nachu. Iyu wangulemba zaku Yehova kuti: “Chifukwa chakuti we ku janja langu lamaryi, ndisukunyikengi cha.” (Sumu 16:8; 63:8) Kumbi Satana wachita wuli kuti watilekesi kuja mabwezi ngaku Chiuta?

VO SATANA WANGUKAMBA VAKUKWASANA NDI ŴANTHU

6. Kumbi Satana wangukambanji vakukwasana ndi ŵanthu?

6 Mu Mutu 11, tikusambira kuti Satana wangususa Yehova kuti ngwaboza ndipu wachita vinthu mwambula urunji chifukwa wanguzomereza cha kuti Adamu ndi Eva asankhengi ŵija chamampha ndi chiheni. Buku la Jobu lititisambiza kuti Satana wasusa so ŵanthu wo akhumba kuja mabwezi ngaku Chiuta. Satana wangukamba kuti ŵanthu ateŵete Chiuta chifukwa chakuti atimuyanja cha kweni chifukwa cha vinthu vo watiŵapasa. Iyu wangukamba so kuti wangachitisa weyosi kuti waleki kuvwiya Chiuta. Tiyeni tiwoni vo tingasambira kwaku Jobu kweniso vo Yehova wanguchita kuti wamuvikiliyi.

7, 8. (a) Kumbi Jobu wenga yani? (b) Kumbi Satana wangukambanji vakukwasana ndi Jobu?

7 Kumbi Jobu wenga yani? Iyu wenga munthu wamampha yo wengaku vyaka pafupifupi 3,600 vajumpha. Yehova wangukamba kuti pa nyengu yo pengavi munthu  wakuyanana nayu pacharu chapasi. Jobu watumbikanga Chiuta ndipu watinkhanga vinthu viheni. (Jobu 1:8) Iyu wenga nadi bwezi laku Yehova.

8 Satana wangukamba kuti Jobu wateŵetiyanga Chiuta pa vifukwa vamampha cha. Iyu wangukambiya Yehova kuti: “Asi imwi mwamuŵikiya mpanda wakumuvikiliya limoza ndi nyumba yaki kweniso vosi vo wenavu? Mwatumbika ntchitu ya manja ngaki, ndipu viŵetu vaki vayandana ukongwa pacharu chapasi. Kweni tambasuwani janja linu sonu ndi kunanga vosi vo wenavu, ndipu muwonengi, wakutukeningi muchiwona.”Jobu 1:10, 11.

9. Kumbi Yehova wanguzomereza Satana kuchitanji?

9 Satana wangukamba kuti Jobu wateŵetiyanga Yehova chifukwa cha vinthu vamampha vo wapasikanga. Iyu wangukamba so kuti wangalekesa Jobu kuteŵete Yehova. Yehova wangususa Satana kweni wangumuzomereza kuti wayesi Jobu. Iyu wanguchita venivi kuti Satana wawoni asani Jobu wateŵetiyanga nadi Yehova chifukwa chakuti wamuyanjanga.

SATANA WAYUKIYA JOBU

10. Kumbi Satana wangumuyukiya wuli Jobu, nanga Jobu wanguchita wuli?

10 Chakwamba, Satana wangubaya viŵetu vosi vaku Jobu. Pavuli paki wangubaya antchitu ŵaki wosi. Jobu wanguja ndi chechosi cha. Pakumaliya, Satana wangubaya ŵana 10 aku Jobu ndi chimphepu. Kweni Jobu wangulutiriza kuteŵete Yehova mwakugomezeka. “Pa vakuchitika vosi venivi, Jobu wangubuda cha pamwenga kukamba kuti Chiuta wachita vinthu viheni.”Jobu 1:12-19, 22.

Yehova wangutumbika Jobu chifukwa wenga wakugomezeka

11. (a) Ntchinthu wuli chinyaki cho Satana wanguchitiya Jobu? (b) Nanga Jobu wanguchita wuli?

11 Satana wanguleke penapa cha. Iyu wangukambiya Chiuta kuti: ‘Nangani chiwanga kweniso liŵavu laki, ndipu muwonengi, wakutukeningi muchiwona.’ Pavuli paki, Satana wanguchitisa kuti Jobu watami matenda ngakulu.  (Jobu 2:5, 7) Chinanga kuti venga viyo, Jobu wangulutiriza mbwenu kuteŵete Yehova mwakugomezeka. Iyu wanguti: “Mpaka nyifwa yangu, ndilekengi cha kuja wakugomezeka!”Jobu 27:5.

12. Kumbi Jobu wangulongo wuli kuti vo Satana wakambanga venga vaboza?

12 Jobu waziŵanga cha vo Satana wangumupusikiya kweniso chifukwa cho wasuzikiyanga. Iyu waŵanaŵananga kuti ndi Yehova yo wachitisanga masuzu ngaki. (Jobu 6:4; 16:11-14) Chinanga kuti venga viyo, Jobu wanguleka cha kuteŵete Yehova. Venivi vingulongore limu kuti iyu wateŵetiyanga Yehova chifukwa cha vinthu vo wapasikanga cha kweni chifukwa chakuti wamuyanjanga. Vo Satana wangukamba venga vaboza.

13. Ntchinthu wuli chinguchitika chifukwa chakugomezeka kwaku Jobu?

13 Chinanga kuti Jobu waziŵanga cha vo vachitikanga kuchanya, iyu wangulutiriza kuteŵete Chiuta ndipu wangulongo kuti Satana ngwaboza. Yehova wangutumbika Jobu chifukwa chakumuteŵete mwakugomezeka.Jobu 42:12-17.

BOZA LO SATANA WAKAMBA LAKUKWASANA NDI IMWI

14, 15. Kumbi Satana wakamba boza wuli?

14 Tingasambirapu vinandi pa vo vinguchitikiya Jobu. Mazuŵa nganu, Satana wakamba so kuti titeŵete Yehova chifukwa chakuti watitipasa vinthu vamampha. Pa lemba la Jobu 2:4, Satana wakukamba kuti: “Munthu waperekengi chechosi cho wenachu kuti watasi umoyu waki.” Viwoneke limu kuti pa lemba ili, Satana wakambanga Jobu pe cha kweni taŵanthu tosi. Pati pajumpha vyaka vinandi kutuliya po Jobu wangufwiya, Satana wangulutiriza kunyoza Yehova ndipuso kukamba kuti taŵanthu titimuteŵete chifukwa cha vo watitipasa. Mwakuyeruziyapu, pa lemba la Nthanthi 27:11 pakamba kuti: “Mwana wangu ja wazeru ndipu ukondwesi mtima wangu, kuti ndimumuki yo watindinyoza.”

15 Mungasankha kuvwiya Yehova kweniso kuja  akugomezeka kwaku iyu ndipu mungalongo kuti Satana ngwaboza. Kuja bwezi laku Chiuta ndichu chinthu chakukhumbika ukongwa cho mutenere kuchita. Kweni kuti muje bwezi laki mukhumbika kusintha vinthu vinyaki pa umoyu winu. Kuja bwezi laku Chiuta ndi nkhani yikulu ukongwa chifukwa Satana wakamba kuti mungalutiriza cha kuja akugomezeka kwaku Yehova asani mwakumana ndi masuzu. Iyu wayesesa kugwirisiya ntchitu nthowa zinandi kuti tileki kuja akugomezeka kwaku Chiuta. Kumbi wachita wuli venivi?

16. (a) Kumbi Satana wagwirisiya ntchitu nthowa nizi kuti walekesi ŵanthu kuteŵete Yehova? (b) Nanga wangachita wuli kuti wakulekeseni kuteŵete Yehova?

16 Satana wagwirisiya ntchitu nthowa zinandi kuti tileki kuja bwezi laku Chiuta. Iyu watitiyukiya ‘nge nkharamu yakukoloma ndipu wakhumbisisa kuti wamezi munyaki.’ (1 Petro 5:8) Mungazizwanga cha asani anyinu, ŵanthu a mubanja linu ndipuso ŵanthu anyaki atikukambiyani kuti muleki kusambira Bayibolu ndipuso kuchita vinthu vamampha. Mungawona nge kuti akuyukiyani. * (Yohane 15:19, 20) Nyengu zinyaki, Satana watijilongo “nge mungelu wa ukweru.” Mwaviyo, iyu wangatipusisa kuti tileki kuvwiya Yehova. (2 Ŵakorinte 11:14) Satana watitipangisa kuŵanaŵana kuti te akwenere cha kuteŵete Yehova chifukwa wakhumba kuti tileki kuteŵete Chiuta.Nthanthi 24:10.

MUVWIYENGI MARANGU NGAKU YEHOVA

17. Ntchifukwa wuli tivwiya Yehova?

17 Asani tivwiya Yehova, tilongo kuti Satana ngwaboza.  Ntchinthu wuli cho chingatiwovya kuti tije akugomezeka? Bayibolu likamba kuti: “Uyanjengi Yehova Chiuta waku ndi mtima waku wosi, umoyu waku wosi ndi nthazi zaku zosi.” (Marangu 6:5) Tivwiya Yehova chifukwa chakuti titimuyanja. Asani tilutiriza kwanja Yehova, tichitengi chechosi cho wakhumba kuti tichiti. Wakutumika Yohane wakulemba kuti: “Kwanja Chiuta kung’anamuwa kusunga marangu ngaki, ndipu marangu ngaki ngazitu cha.”1 Yohane 5:3.

18, 19. (a) Ndi vinthu nivi vo Yehova watinkhana navu? (b) Kumbi tiziŵa wuli kuti Yehova wangatipempha cha kuti tichiti vinthu vo isi tingatondeka kufisa?

18 Kumbi ndi vinthu nivi vo Yehova watinkhana navu? Vinyaki valembeka mukabokosi kakuti, “ Mutinkhengi Vinthu vo Yehova Watinkha.” Pakwamba, mungaŵanaŵana kuti vinyaki mwa vinthu venivi viheni ukongwa cha. Asani mwaŵerenga mavesi nga m’Bayibolu ndi kungaŵanaŵaniya, muziŵengi umampha wakuvwiya marangu ngaku Yehova.  Muwonengi so kuti mukhumbika kusintha vinthu vinyaki pa umoyu winu. Chinanga kuti nkhwakusuza kuchita viyo, kweni asani mungasintha mukondwengi kweniso muŵengi ndi chimangu chifukwa chakuja bwezi lakugomezeka laku Chiuta. (Yesaya 48:17, 18) Kumbi tiziŵa wuli kuti munthu wangafisa kusintha vinthu vinyaki pa umoyu?

19 Yehova wangatikambiya cha kuti tichiti chinthu cho tingatondeka kufiska. (Marangu 30:11-14) Nge bwezi lidu, iyu watitiziŵa umampha kuluska mo taŵeni titijiziŵiya. Waziŵa vo tingafisa kweniso vo tingafisa cha. (Sumu 103:14) Wakutumika Paulo wangukamba kuti: “Chiuta ngwakugomezeka, ndipu wazomerezengi cha kuti imwi muyeseki mpaka kutondeka kukunthiyapu, asani muyeseka iyu waperekengi nthowa kuti mufisi kukunthiyapu.” (1 Ŵakorinte 10:13) Titenere kuja ndi chigomezu kuti Yehova watiwovyengi kuti tichitengi vinthu vamampha. Iyu wakupaseningi “nthazi yo yiluska yo tikuwa nayu” kuti  yikuwovyeni kukunthiyapu masuzu. (2 Ŵakorinte 4:7) Paulo wati wawona mo Yehova wangumuwovye pa nyengu yo wakumananga ndi masuzu, wangukamba kuti: “Mu vinthu vosi ndisaniya nthazi kutuwa kwaku yo watindipasa nthazi.”Ŵafilipi 4:13.

MUYANJENGI VO CHIUTA WATANJA

20. Kumbi ndi mijalidu niyi yo mukhumbika kutoliyaku, nanga ntchifukwa wuli?

20 Asani tikhumba kuja bwezi laku Yehova, titenere cha kuchita vo iyu watinkha kweni pe so vinthu vinyaki vo tikhumbika kuchita. (Ŵaroma 12:9) Mabwezi ngaku Chiuta ngatanja vo iyu watanja. Yingu ngakonkhoseka pa lemba la Sumu 15:1-5. (Ŵerengani.) Mabwezi ngaku Yehova ngatoliyaku mijalidu yaki nge “chanju, likondwa, chimangu, kuzizipiza, lisungu, umampha, chivwanu, kufwasa ndipuso kujikaniza.”Ŵagalatia 5:22, 23.

21. Kumbi mungachita wuli kuti muje ndi mijalidu yo Chiuta watanja?

21 Kumbi mungachita wuli kuti muje ndi mijalidu yeniyi? Mukhumbika kuziŵa vo Yehova watanja mwakuŵerenga ndipuso kusambira Bayibolu. (Yesaya 30:20, 21) Asani muchitengi venivi, mumuyanjengi ukongwa Yehova ndipu mumuvwiyengi.

22. Ntchinthu wuli chingachitika asani muvwiya Yehova?

22 Kusintha vinthu vinyaki pa umoyu winu kungayanana ŵaka ndi kuzuwa malaya ngakali ndi kuvwala ngasonu. Bayibolu likamba kuti “zuwani umunthu wakali” ndipu vwalani “umunthu wasonu.” (Ŵakolose 3:9, 10) Chinanga kuti kuchita venivi nkhwakusuza, kweni asani tasintha ndipu tivwiya Yehova, iyu watitilayiza kuti watipasengi “mphotu yikulu.” (Sumu 19:11) Sankhani kuvwiya Yehova kuti mulongo kuti Satana ngwaboza. Mungateŵetiyanga Yehova chifukwa cha vo watilayiza munthazi cha kweni chifukwa chakuti mutimuyanja. Asani muchitengi venivi mujengi bwezi laki!

^ ndimi 16 Ivi ving’anamuwa kuti Satana wachita kuŵakambiya cha ŵanthu kuti akukanizeni kusambira Bayibolu. Chinanga kuti ve viyo, iyu ndi “chiuta wa nyengu yinu” ndipu “charu chosi che mu nthazi [yaki].” Mwaviyo, tingazizwanga cha asani ŵanthu anyaki akhumba kuti tileki kuteŵete Yehova.2 Ŵakorinte 4:4; 1 Yohane 5:19.

Ziŵani Vinandi

CHIGONGWI CHA ALINDA—CHAKUSAMBIRA

Kumbi Tingalongo Wuli Kuti Titanja Yehova?

Kwanja Chiuta kusazgapu vinthu vinandi.