Julani

Lutani pa vo ve mukati

Kalata Yakutuwa ku Wupu Wakulongozga

Kalata Yakutuwa ku Wupu Wakulongozga

Akwanjiwa Akhristu Anyidu:

Chifukwa chakuti ndisi ateŵeti aku Yehova, titanja Mazu ngaki ngo ndi Bayibolu. Tigomeza kuti Bayibolu likonkhosa vinthu mwauneneska, ulongozgi waki ngwakovya pa umoyu ndipu le ndi ukaboni wakulongo kuti Yehova watanja ukongwa ŵanthu. (Sumu 119:105; Luka 1:3; 1 Yohane 4:19) Tikhumbisisa kuti ŵanthu asambiri uneneska wo we m’Mazu ngaku Chiuta. Mwaviyo, ndisi akukondwa kulemba buku ili lakuti, Sambirani Nkhani za m’Bayibolu. Sonu, tikukonkhosiyeningi kamanavi za buku lenili.

Buku ili ukongwa alembe ŵana. Chinanga kuti ve viyo, lingagwirisikiya so ntchitu pakuwovya arara wo akhumba kuziŵa vinandi vakukwaskana ndi Bayibolu. Chifukwa chakuti Bayibolu lingawovya weyosi, mwambula kukayika tosi tiyanduwengi asani tisambirengi nkhani zenizi zo zingatiwovya kuja alikondwa.

Nkhani zo ze m’buku ili zatuliya m’Bayibolu ndipu zikonkhosa mo Chiuta wangwambiya kulenga vinthu. Nkhani zenizi zakonkhoseka mwakuvwika umampha kweniso mu nthowa yipusu ndipu zakonkhoseka mwakukoliyana ndi nyengu yo zinguchitikiya.

Buku ili likonkhosa ŵaka nkhani za m’Bayibolu pe cha kweni le ndi vinandi. Mo alembe buku ili ndipuso vithuzi vo vilimu, vosi vanozgeka mu nthowa yakuti nkhani zo zikulembeka m’Bayibolu zivwikengi nge kuti zichitika sonu kweniso zilongongi mo ŵanthu wo akonkhoseka avwiyanga.

Buku ili litiwovyengi kuziŵa kuti Bayibolu likonkhosa za ŵanthu wo avwiyanga Yehova kweniso wo amuvwiyanga cha. Lititichiska kuti tisambirepu kanthu pa vo achitanga. (Ŵaroma 15:4; 1 Ŵakorinte 10:6)  Buku lenili lagaŵika mu vigaŵa 14. Kukwambiriya kwa chigaŵa chechosi akonkhosaku fundu zo tisambira pa nkhani yo.

Asani ndimwi mpapi, mungaŵerenga nkhani yosi ndi mwana winu ndipu mungakambisana vithuzi va munkhani yo. Pavuli paki, imwi ndi mwana winu mungaŵerenga malemba ngo patuliya nkhani yo. Wovyani mwana winu kuti wawoni kukoliyana kwa vo waŵerenga m’Bayibolu ndi nkhani yo waŵerenga mubuku. Nthowa yeniyi, yingawovya so asani musambira ndi munthu mura kuti waziŵi vo ve m’Bayibolu.

Tigomeza kuti buku ili, liwovyengi ŵanthu wosi a mtima wamampha, anamana ndi ara kuti aziŵi Mazu ngaku Chiuta ndi kungagwirisiya ntchitu pa umoyu wawu. Venivi vingachitisa kuti ayambi kuteŵete Yehova ndipu aje ŵanthu a mu banja laki lo ŵatiliyanja.

Ndisi Abali ŵinu,

Wupu Wakulongozga wa Akaboni aku Yehova