Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 55

Mungelu Waku Yehova Wanguvikiliya Hezekiya

Mungelu Waku Yehova Wanguvikiliya Hezekiya

Ufumu wa Asiriya ungulonda ufumu wa mafuku 10 wa Ayisraele. Sonu Senakeribu fumu ya Asiriya yakhumbanga kulonda so ufumu wa mafuku ngaŵi wa Yuda. Iyu wangwamba kulonda misumba ya Yuda umoza ndi umoza. Kweni msumba wo wawukhumbisisanga wenga wa Yerusalemu. Vo Senakeribu walekanga kuziŵa venga vakuti, Yehova wavikiliyanga msumba wa Yerusalemu.

Hezekiya fumu ya Yuda, yingupasa Senakeribu ndalama zinandi kuti waleki kulonda msumba wa Yerusalemu. Chinanga kuti Senakeribu wangulonda ndalama, wangutuma mbwenu asilikali ŵaki anthazi kuti akalondi msumba wenuwu. Ŵanthu a mumsumba uwu anguchita mantha chifukwa Asiriya ŵenga pafupi kufika ku Yerusalemu. Pavuli paki, Hezekiya wanguŵakambiya kuti: ‘Mungachitanga mantha cha. Asilikali a Asiriya mbanthazi kweni Yehova wachitisengi kuti tije anthazi ukongwa kuluska yiwu.’

Senakeribu wangutuma Rabishake kuti waluti ku Yerusalemu ndi kuchiwofyeza ŵanthu. Rabishake wanguma kubwalu kwa msumba ndipu wangudaniriza kuti: ‘Yehova wangakuwovyani cha. Mungazomerezanga cha kuti Hezekiya wakupusiseni. Palivi chiuta yo wangakutaskani kwaku isi.’

Hezekiya wangufumba Yehova cho wangachita. Yehova wangumuka kuti: ‘Ungachitanga mantha cha ndi vo Rabishake wakamba. Senakeribu walondengi cha msumba wa Yerusalemu.’ Pavuli paki, Hezekiya wangulonde kalata kutuwa kwaku Senakeribu. Mukalata yo wangulembamu kuti: ‘Utheri ŵaka. Yehova wakutasengi cha.’ Hezekiya wanguromba kuti: ‘Chondi Yehova, titaskeni kuti weyosi waziŵi kuti imwi mwija ndimwi Chiuta wauneneska.’ Yehova wangumukambiya kuti: ‘Fumu ya Asiriya yizengi cha mumsumba wa Yerusalemu. Ini ndivikiliyengi msumba wangu.’

Senakeribu wenga ndi chigomezu kuti pambula kuswera walondengi Yerusalemu. Yehova wangutuma mungelu ndi usiku kuluta kumusasa wa asilikali a Asiriya, wo anguzenga kubwalu kwa msumba wa Yerusalemu. Mungelu wangubaya asilikali 185 sawuzandi! Asilikali anthazi ukongwa  a ku Senakeribu angubayika. Iyu watingi wachitengi kanthu cha chifukwa wanguthereskeka. Mwaviyo, wanguwere kwawu. Yehova wanguvikiliya Hezekiya ndi msumba wa Yerusalemu nge mo wangulayizgiya. Kumbi iwi watingi ugomezengi Yehova asani wengaku ku Yerusalemu?

“Mungelu waku Yehova wavikiliya ŵanthu wosi wo atopa Chiuta ndipu watiŵataska.”—Sumu 34:7

Ziŵani Vinandi

MAVIDIYO

‘Yehova, . . . Ndigomeza Yimwi’

Kumbi mungasambiranji kwaku Hezekiya pa nkhani yakugomeza Yehova Chiuta?