Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 50

Yehova Wanguvikiliya Yehosafati

Yehova Wanguvikiliya Yehosafati

Yehosafati fumu ya Yuda wanguphwanya maguŵa nga Bala ndipuso angoza a mucharu cho. Yehosafati wakhumbanga kuti ŵanthu aziŵi marangu ngaku Yehova. Mwaviyo, wangutuma alongozgi ndi Alevi ku Yuda kuti akasambizi ŵanthu marangu ngaku Yehova.

Mitundu yo yenga pafupi, yawopanga kuchita nkhondu ndi Ayuda chifukwa yaziŵanga kuti Yehova wenga ndi ŵanthu ŵaki. Mitundu iyi yinguza ndi mphasu kwa Fumu Yehosafati. Kweni Amoabu, a Amoni ndi ŵanthu wo ajanga muchigaŵa cha Seiri, anguza kuzichita nkhondu ndi Ayuda. Yehosafati wanguziŵa kuti wakhumbikanga Yehova kuti wamuwovyi. Iyu wangudana anthurumi, anthukazi ndi ŵana kuti wosi ŵazi ku Yerusalemu. Yehosafati wanguma panthazi pawu ndipu wangupemphera kuti: ‘Yehova kwambula yimwi, tingaphara cha. Chondi tikambiyeni vo titenere kuchita.’

Yehova wangumuka rombu lawu kuti: ‘Mungawopanga cha. Ndikuwovyeningi. Jani pamalu nginu, mani ŵaka ndipu muwoni mo ndikutaskiyeningi.’ Kumbi Yehova wanguŵataska wuli?

Ndi mulenji, Yehosafati wangusankha akumba ndipu wanguŵakambiya kuti agubengi panthazi pa gulu la asilikali. Yiwu anguguba kutuwa ku Yerusalemu mpaka kumalu ngo kunguchitikiya nkhondu ngo ngadanikanga kuti Tekoa.

Yehova wangurwiya nkhondu ŵanthu ŵaki pa nyengu yo ŵanthu akumba sumu ambiyanga Yehova mwakukondwa kweniso mwakudaniriza. Iyu wanguchitisa kuti a Amoni ndi Amoabu atimbanyizgiki ndipu angwamba kubayana ŵijaŵija mwakuti pengavi yo wangupona. Yehova wanguvikiliya ŵanthu a ku Yuda, asilikali ndi asembi. Ŵanthu wosi a muvyaru vapafupi, anguvwa vo Yehova wanguchita ndipu anguziŵa kuti iyu weche kuvikiriya ŵanthu ŵaki. Kumbi Yehova watiŵataska wuli ŵanthu ŵaki? Iyu wagwirisiya ntchitu nthowa zinandi. Iyu wakhumbika ŵanthu cha kuti amuwovyi.

“Mukhumbika kuchita nkhondu cha. Jani pamalu nginu, mani ŵaka ndipu muwoni mo Yehova wakutaskiyeningi.”—2 Mikoka 20:17