Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 44

Nyumba Yakusopiyamu Yehova

Nyumba Yakusopiyamu Yehova

Solomoni wati waja fumu ya Yisraele, Yehova wangumufumba kuti: ‘Ukhumba kuti ndikupasenji?’ Solomoni wanguti: ‘Ndeche munamana ndipu ndiziŵa cha vo ndichita. Chondi mundipasi zeru kuti ndilongozgi umampha ŵanthu ŵinu.’ Yehova wangukamba kuti: ‘Chifukwa chakuti wapempha zeru, ujengi munthu wazeru ukongwa kuluska weyosi pacharu chapasi. Ndikuchitisengi so kuti uje wakukhupuka ukongwa. Asani undivwiyengi, ujengi ndi umoyu utali.’

Solomoni wangwamba kuzenga nyumba yakusopiyamu. Iyu wangugwirisiya ntchitu golidi wamampha ukongwa, siliva, vimiti kweniso mya. Anthurumi ndi anthukazi masawuzandi nganandi alusu angugwira ntchitu yakuzenga nyumba yakusopiyamu. Pati pajumpha vyaka 7, nyumba yakusopiyamu anguyipereka kwaku Yehova. Nyumba iyi yenga ndi guŵa la sembi ndipu pa guŵa lo anguŵikapu sembi. Solomoni wangugwada panthazi pa guŵa lo ndipu wangupemphera kuti: ‘Yehova, nyumba yakusopiyamu iyi njimana ndipuso njambula kutowa ukongwa kwaku imwi kweni londiyani kusopa kwidu ndipu vwisiyani mapempheru ngidu.’ Kumbi nyumba yakusopiyamu ndipuso pempheru laku Solomoni, wanguviwona wuli Yehova? Solomoni wati wamaliza ŵaka kupemphera, motu ungutuwa kuchanya ndi kotcha sembi zo zenga paguŵa. Yehova wanguyilonde nyumba yakusopiyamu. Ayisraele ŵati awona ivi, angukondwa.

Fumu Solomoni yaziŵikanga ukongwa mu Yisraele kweniso muvigaŵa vinyaki vakutali chifukwa cha zeru zaki. Ŵanthu azanga kwaku Solomoni kuzipempha chovyu pa masuzgu ngawu. Fumukazi ya ku Sheba yinguza kwaku Solomoni kuti yimuyesi ndi mafumbu ngakusuzga. Yati yavwa vo wangumuka, yinguti: ‘Ndinguvwana cha vo ŵanthu andikambiyanga vakukwasana ndi yiwi kweni sonu ndajiwone ndija kuti we ndi zeru ukongwa kuluska mo ŵanthu akambiyanga. Yehova Chiuta waku, wakutumbika.’ Pa nyengu iyi, vinthu vaŵayendiyanga umampha Ayisraele ndipu akondwanga kweni venga pafupi kusintha.

“Awonani! munthu munyaki wakuluska Solomoni we panu.”—Mateyu 12:42

1 Ŵakaronga 2:12; 3:4-28; 4:29–5:18; 6:37, 38; 7:15–8:66; 10:1-13; 2 Mikoka 7:1; 9:22