Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 49

Fumukazi Yiheni Yingulangika

Fumukazi Yiheni Yingulangika

Pafupi ndi nyumba yachifumu yaku Ahabu ku Yezerele, penga munda wa mphereska. Iyu wawonanga munda uwu kuziya pawindu. Mweneku wa munda wo wenga Naboti. Ahabu wawukhumbanga munda wo ndipu wanguyesesa kuti Naboti wamugulisi. Naboti wangukana kumugulisa chifukwa kuchita viyo, kwenga kuleka kuvwiya Marangu ngaku Yehova ngo ngakanizanga munthu kugulisa malu ngo wahara. Kumbi Ahabu wangumuvwiya Naboti chifukwa chakuti wanguchita chinthu chamampha? Awa. Ahabu wangukwiya ukongwa. Iyu wanguguŵa ndipu wangukana kutuwa muchipinda cho wagonanga ndipuso kurya chakurya.

Fumukazi yiheni Yezebelu yo yenga muwolu waku Ahabu, yingukambiya murumu waki kuti: ‘Ndiwi fumu ya Ayisraele. Ungaja ndi vosi vo ukhumba. Ndilondengi munda wuwa kuti uje waku.’ Yezebelu wangulembe makalata arara a mu musumba wo kuti akambi boza kuti Naboti wanyoza Chiuta ndipu amuponyi mya kuti wafwi. Arara anguchita vo Yezebelu wanguŵakambiya ndipu pavuli paki Yezebelu wangukambiya Ahabu kuti: ‘Naboti wafwa. Sonu munda wuwa ngwaku.’

Yezebelu wangubaya Naboti pe cha. Iyu wangubaya so ŵanthu anandi ambula kunanga wo ayanjanga Yehova. Yezebelu wasopanga achiuta aboza ndipu wanguchita so vinthu vinyaki viheni. Yehova wanguwona vinthu viheni vosi vo wanguchita. Kumbi Yehova watingi wachitengenji nayu Yezebelu?

Ahabu wati wafwa, pangujumpha nyengu ndipu pavuli paki mwana waki Yehoramu wanguja fumu. Yehova wangutuma munthu zina laki Yehu kuti wakalangi Yezebelu ndi banja laki.

Yehu wangukwera gareta laki kuluta ku Yezerele ko Yezebelu wajanga. Yehoramu wanguza ndi galeta laki kuchikumana ndi Yehu ndipu wangumufumba kuti: ‘Kumbi pe chimangu pakati pidu?’ Yehu wangumuka kuti: ‘Palivi chimangu chifukwa cha vinthu viheni vo anyoku  a Yezebelu achita.’ Yehoramu wakhumbanga kung’anamuka ndi gareta laki kuti wathaŵi. Yehu wanguto mkondu waki ndipu wangubaya Yehoramu.

Pavuli paki, Yehu wangwamba ulendu kuluta kunyumba yaku Yezebelu. Iyu wati wavwa kuti Yehu watuza, wangupaka vakujitowese, wangunoza sisi laki ndipu wamulindizanga pa windu la chipinda chamuchanya. Yehu wati wafika, Yezebelu wangumutawuza mwamutafu. Yehu wangukambiya ateŵeti ŵaki wo ŵenga nayu pafupi kuti: “Muponyeni pasi!” Mwaviyo, Yezebelu angumuponya pasi kuziya pa windu ndipu wangufwiya penipo.

Pavuli paki, Yehu wangulamula kuti ŵana anthurumi 70 aku Ahabu abayiki ndipu wangumalisa kusopa Bala mucharu cho. Kumbi wawona kuti Yehova waziŵa vosi ndipu pa nyengu yakwenere walanga ŵanthu wo achita vinthu viheni?

“Chihara cho pakwamba chatoleka mwambunu, pakumaliya chija thumbiku cha.”—Nthanthi 20:21