Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 42

Jonafani Wenga Wambula Mantha Kweniso Wakugomezeka

Jonafani Wenga Wambula Mantha Kweniso Wakugomezeka

Jonafani wenga mwana munthurumi wakwamba wa Fumu Sauli ndipu wenga msilikali wambula mantha. Davidi wangukamba kuti Jonafani watchimbiyanga ukongwa kuluska nombu ndipu wenga wanthazi kuluska nkharamu. Zuŵa linyaki, Jonafani wanguwona asilikali a Afilisti paphiri. Iyu wangukambiya munthu yo wangumupingiya vidya kuti: ‘Tiŵayukiyengi asani Yehova watilongo chisimikizu. Asani Afilisti atikambiya kuti tiluti ko kwe yiwu, tiziŵengi kuti tikhumbika kuŵayukiya.’ Afilisti angudaniriza kuti: ‘Zani kunu, tipumani!’ Mwaviyo, Jonafani ndi munthu yo wenga nayu, angukwera paphiri ndi kubaya asilikali 20.

Chifukwa chakuti Jonafani wenga mwana wakwamba, wenga wakwenere kuja fumu pavuli paku Sauli. Jonafani waziŵanga kuti Yehova wakusankha Davidi kuti ndiyu waje fumu yachiŵi ya Yisraele kweni iyu wanguchita sanji cha. Jonafani ndi Davidi ayanjananga ukongwa. Yiwu angulayizgana kuti  avikiliyanengi kweniso awovyanengi. Jonafani wangupereka chakuvwala chaki, mkondu, uta kweniso lamba kwaku Davidi kulongo kuti ayanjananga ukongwa.

Pa nyengu yo Davidi wathaŵanga Sauli, Jonafani wanguluta kwaku Davidi ndipu wangumukambiya kuti: ‘Uŵi wanthazi ndipu ukhwimi mtima. Yehova wasankha yiwi kuti uje fumu. Chinanga mbada nawu aziŵa.’ Kumbi ungayanja kuja ndi bwezi nge Jonafani?

Jonafani wanguŵika umoyu waki pangozi mwakuwerezawereza, chifukwa wakhumbanga kuwovya mubwezi waki. Iyu wanguziŵa kuti awisi a Sauli akhumbanga kubaya Davidi ndipu wanguŵakambiya kuti: ‘Munangengi asani mubayengi Davidi chifukwa palivi chiheni cho wachita.’ Sauli wangumukwiyiya ukongwa Jonafani. Pati pajumpha vyaka, Sauli ndi Jonafani angufwiya limoza ku nkhondu.

Jonafani wati wafwa, Davidi wakhumbanga kukumana ndi Mefiboshete yo wenga mwana waku Jonafani. Wati wamusaniya, Davidi wangumukambiya kuti: ‘Chifukwa chakuti ada ŵaku ŵenga anyangu ukongwa, ndikuphweriyengi kwa umoyu waku wosi. Ujengi mu nyumba yangu yachifumu ndipu uryengi pathebulu langu.’ Davidi wangumuluwa cha mubwezi waki Jonafani.

“Muyanjanengi nge mo ini ndakuyanjiyani. Palivi munthu yo we ndi chanju chikulu kuluska ichi, kuti munthu wapereki umoyu waki mumalu mwa anyaki.”—Yohane 15:12, 13