Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 32

Mulongozgi Wasonu ndi Anthukazi Ŵaŵi Ambula Mantha

Mulongozgi Wasonu ndi Anthukazi Ŵaŵi Ambula Mantha

Wati walongozga ŵanthu aku Yehova kwa vyaka vinandi, Yoswa wangufwa we ndi vyaka 110. Pa nyengu yo wenga ndi umoyu, Ayisraele asopanga Yehova. Kweni Yoswa wati wafwa, yiwu angwamba kusopa angoza nge mo ŵanthu aku Kanani achitiyanga. Chifukwa chakuti Ayisraele anguleka kuvwiya Yehova, iyu wanguzomereza kuti fumu ya Akanani zina laki Yabini yiŵasuzgengi. Ayisraele angupempha Yehova kuti waŵawovyi. Mwaviyo, Yehova wanguŵapasa mulongozgi wasonu zina laki Baraki. Iyu wanguŵawovya kuti aje so pa ubwezi ndi Yehova.

Debora yo wenga muchimi munthukazi, wangudana Baraki. Debora wenga ndi uthenga wakutuliya kwaku Yehova wakuti: ‘Uto anthurumi 10,000 ndipu ukakumani ndi asilikali aku Yabini ku Msinji wa Kishoni. Kweniko, wakumuthereska Sisera, yo ndi mura wa asilikali aku Yabini.’ Baraki wangukambiya Debora kuti: ‘Ndilutengi pijapija asani nawi ulutengi nani.’ Iyu wanguti: ‘Ndilutengi nawi kweni uziŵi kuti ndiwi cha wamubaya Sisera. Yehova wakamba kuti munthukazi ndiyu wakumubaya.’

Baraki ndi gulu laki la nkhondu anguluta limoza ndi Debora ku Phiri la Taboro kuti akanozgeke nkhondu. Sisera wati wavwa ŵaka, wanguwunganisa magareta nga nkhondu ndi asilikali ŵaki mudambu.  Debora wangukambiya Baraki kuti: ‘Msanawale ndi zuŵa lo Yehova wakuwovyengi kuti uphari nkhondu.’ Baraki ndi anthurumi ŵaki 10,000 angusika muphiri kuti akakumani ndi gulu lanthazi la asilikali aku Sisera.

Yehova wanguchitisa kuti maji nga mumsinji wa Kishoni ngasapaliyi. Magareta ngankhondu ngaku Sisera ngangutitimiya mu ulambwi. Sisera wangutuwamu mugareta laki ndipu wangwamba kutchimbiya. Baraki ndi asilikali ŵaki anguthereska asilikali aku Sisera kweni iyu wanguthaŵa. Sisera wanguchibisama muhema la munthukazi munyaki zina laki Jaelu. Iyu wangumupasa mkaka kuti wamwi ndipu pavuli paki wangumudika bulangeti. Sisera wangugona tulu chifukwa cha kuvuka. Pavuli paki, Jaelu wangupinga chisulu chakukhome hema ndipu wangwenda mwakunyanyamiya ndi kumukhoma nachu kumutu. Sisera wangufwa.

Baraki wanguza kuzipenja Sisera. Jaelu wangutuwa muhema waki ndipu wanguti: ‘Sereni ndikulongoni munthu yo mupenja.’ Baraki wati wasere, wanguwona kuti Sisera wafwa. Baraki ndi Debora angumba sumu yakulumba Yehova chifukwa chakovya Ayisraele kuthereska arwani ŵawu. Ayisraele anguja mwachimangu kwa vyaka 40.

“Anthukazi wo apharazga uthenga wamampha ndi gulu likulu.”—Sumu 68:11

Ziŵani Vinandi

CHIGONGWI CHA ALINDA

“Ndinguyuka nge Ma mu Yisraele”

Kumbi tisambiranji pa chivwanu ndi chiganga chaku Debora?