Julani

Lutani pa vo ve mukati

 SAMBIRU 37

Yehova Wangulongoro ndi Samuele

Yehova Wangulongoro ndi Samuele

Wasembi Mura Eli wenga ndi ŵana ŵaŵi anthurumi wo ateŵetiyanga nge asembi pachihema. Mazina ngawu ngenga Hofini ndi Finehasi. Yiwu avwiyanga cha marangu ngaku Yehova ndipu achitiyanga ŵanthu vinthu viheni ukongwa. Asani Ayisraele ŵaza kuzipereka sembi kwaku Yehova, Hofini ndi Finehasi, atonga nyama yamampha ukongwa kuti yije yawu. Eli wavwanga vo ŵana ŵaki achitanga kweni pengavi cho wachitangapu. Kumbi Yehova watingi wazomerezengi kuti venivi vilutirizi kuchitika?

Chinanga kuti Samuele wenga munamana kwaku Hofini ndi Finehasi kweni wangutoliyaku cha mijalidu yawu. Yehova wakondwanga ndi vo Samuele wachitanga. Zuŵa linyaki usiku Samuele wati wagona, wanguvwa kudana. Iyu wanguyuka ndi kuluta kwaku Eli ndipu wangukamba kuti: ‘Ndaza!’ Kweni Eli wanguti: ‘Ndakudana cha. Luta kagoni.’ Samuele wanguluta kuchigona. Pavuli paki, wanguvwa so kudana. Samuele wati wadanika kachitatu, Eli wanguziŵa kuti Yehova ndiyu wadananga Samuele. Iyu wangukambiya Samuele kuti asani wavwa so kudana, umuki kuti: ‘Longoroni, Yehova. Muteŵeti winu watuvwa.’

Samuele wanguluta so kuchigona. Pavuli paki wanguvwa kudana kuti: ‘Samuele! Samuele!’ Iyu wangumuka kuti: ‘Longoroni, chifukwa muteŵeti winu watuvwa.’ Yehova wangumukambiya kuti: ‘Umukambiyi Eli kuti ndimulangengi pamoza ndi banja laki. Iyu waziŵa kuti ŵana ŵaki achita  vinthu viheni muchihema changu kweni palivi cho wachitapu.’ Ndimulenji waki, Samuele wangujula visasa va chihema, nge mo wachitiyanga nyengu zosi. Iyu wachitanga mantha kukambiya wasembi mura vo Yehova wangukamba. Kweni Eli wangumudana ndi kumufumba kuti: ‘Wamwana wangu, Yehova wakukambiyanji? Ndikambiyi vosi.’ Mwaviyo, Samuele wangukambiya Eli vosi vo Yehova wangukamba.

Samuele wachikuwa, Yehova wangulutiriza kumulongozga. Mucharu chosi cho Ayisraele ajanga, wosi anguziŵa kuti Yehova wasankha Samuele kuti waje mchimi kweniso wakuyeruzga.

“Kumbuka Mulengi waku Mura mu mazuŵa nga unyamata waku.”—Wakutaula 12:1