Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 27

Angugalukiya Yehova

Angugalukiya Yehova

Pati pajumpha nyengu Ayisraele ŵe muchipululu, Kora, Datani, Abiramu ndi ŵanthu anyaki 250 angugalukiya Mozesi. Yiwu angumukambiya kuti: ‘Tavuka nawi! Ntchifukwa wuli utitilongozga kweniso Aroni ngwasembi mura? Yehova we ndi iwi ndi Aroni pe cha kweni we ndi tosi.’ Ivi vingumukondwesa cha Yehova ndipu wanguwona kuti ŵanthu ŵenaŵa angumugalukiya!

Mozesi wangukambiya Kora ndi ŵanthu wo ŵenga ku chigaŵa chaku Kora kuti: ‘Mawa muzi ku chihema, muto mbali zakotchiyamu vakununkhira ndipu muyikemu libani. Yehova wazakutilongo yo wasankha.’

Mawa laki, Kora ndi anthurumi 250, anguluta kuchikumana ndi Mozesi ku chihema. Yiwu anguwotcha libani nge kuti nawu ŵenga a sembi. Yehova wangukambiya Mozesi ndi Aroni kuti: ‘Jipatuweni kwaku Kora ndi anthurumi wo wenawu.’

Chinanga kuti Kora wanguluta kwaku Mozesi kuchihema kweni Datani, Abiramu ndipuso mabanja ngawu angukana kuluta. Yehova wangukambiya Ayisraele kuti atuweku ku mahema ngaku Kora, Datani ndi Abiramu. Nyengu yeniyo, Ayisraele angutuwaku. Datani, Abiramu ndipuso mabanja ngawu anguma kubwalu kwa mahema ngawu.  Mwamabuchibuchi charu chingugaŵikana ndipu chinguŵameza. Nanga ntchinthu wuli cho chinguchitikiya Kora ndi anthurumi 250 wo ŵenga pa chihema? Motu ungutuwa kuchanya ndipu unguŵawotcha.

Pavuli paki, Yehova wangukambiya Mozesi kuti: ‘Uto nthonga ku mulongozgi wa fuku lelosi ndipu ulembepu zina laki. Pa nthonga ya fuku la Levi ulembepu zina laku Aroni. Nthonga zosi uziyiki muchihema ndipu nthonga ya munthu yo ndasankha yimengi maluŵa.’

Mawa laki, Mozesi wangutuza nthonga zosi ndipu wangulongo alongozgi wo. Nthonga yaku Aroni yingume maluŵa kweniso yenga ndi vipasu vakufya va alimondi. Yehova wangulongo kuti Aroni ndiyu wenga wasembi mura yo iyu wangusankha.

“Muvwiyengi ŵanthu wo alongozga pakati pinu ndipuso mujithereskengi kwaku yiwu.”—Ŵahebere 13:17