Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 25

Chihema Chakusopiyamu

Chihema Chakusopiyamu

Pa nyengu yo Mozesi wenga paphiri la Sinai, Yehova wangumukambiya kuti wapangi chihema cho Ayisraele atingi amusopiyengemu. Yiwu atingi apingengi chihema chenichi kwekosi ko atingi akengi.

Yehova wangukamba kuti: ‘Kambiya ŵanthu kuti apereki vinthu vo angafiska kuti viwovyi pakupanga chihema.’ Ayisraele angupereka golide, siliva, mkuŵa, mya yakuzirwa ndipuso ndeŵereŵi. Yiwu angupereka so thonji, salu, vikopa va nyama ndi vinthu vinyaki vinandi. Ayisraele angupereka vinthu vinandi mwakuti Mozesi wanguŵakambiya kuti: ‘Mbwenu vakwana! Mungazanga ndi vinyaki so cha.’

Anthurumi ndi anthukazi anandi wo ŵenga ndi lusu, anguwovya pakupanga chihema. Yehova wanguŵapasa zeru zakugwiriya ntchitu yeniyi. Anyaki alukanga salu ndipu anyaki azidyoŵanga. Anyaki asemanga mya, aŵikanga golide ku vinthu ndipuso apanganga vinthu va mathabwa.

Ayisraele angupanga chihema nge mo Yehova wanguŵakambiya. Yiwu angupanga salu yakutowa yo yagaŵanga chihema kuti chije cha vipinda viŵi. Chipinda chinyaki chadanikanga kuti Chakupaturika ndipu chinyaki Chakupaturika Ukongwa. Muchipinda Chakupaturika Ukongwa mwenga bokosi laphanganu. Bokosi ili lingupangika ndi mathabwa nga mlombwa ndi golidi. Muchipinda Chakupaturika mwenga chakuŵikapu nyali chagolidi, thebulu ndipuso guŵa lakuwotchiyapu vinthu vakununkhira. Pabwalu la chihema penga beseni la mkuŵa kweniso guŵa likulu la sembi. Bokosi laphanganu lakumbusanga Ayisraele za vo angulayizga kuti avwiyengi  Yehova. Kumbi phanganu utiliziŵa? Phanganu ndi layizgu lapade.

Yehova wangusankha Aroni ndi ŵana ŵaki kuti ateŵetiyengi pa chihema nge asembi. Yiwu akhumbikanga kuphwere chihema kweniso kupereka sembi kwaku Yehova. Aroni pe yo wenga wasembi mura, ndiyu wazomerezekanga kusere muchipinda Chakupaturika Ukongwa. Waserengamu kamoza pachaka kuti wakapereki sembi chifukwa cha maubudi ngaki, nga banja laki ndipuso nga mtundu wosi wa Ayisraele.

Ayisraele angumaliza kuzenga chihema pati pajumpha chaka chimoza kutuliya po angutaskikiya ku Egipiti. Sonu ŵenga ndi malu ngakusopiyamu Yehova.

Yehova wanguzaza chihema ndi unkhankhu waki ndipu wanguchitisa kuti pachanya pawonekengi mtambu. Asani mtambu we pachanya pa chihema, Ayisraele akhumbikanga kuja pamalu po ŵenga. Asani mtambu wayamba kukwere muchanya, aziŵanga kuti akhumbikanga kutuwapu. Yiwu akhumbikanga kuphwasuwa chihema ndi kulondo ko mtambu walutanga.

“Ndinguvwa mazu nganthazi kutuliya ku mpandu waufumu ngakuti: ‘Awonani! Chihema chaku Chiuta che pakati pa ŵanthu. Iyu wajengi nawu ndipu yiwu aŵengi ŵanthu ŵaki. Ndipu Chiuta iyu mweneku waŵengi nawu.’”—Chivumbuzi 21:3

Chituwa 25:1-9; 31:1-11; 40:33-38; Ŵahebere 9:1-7