Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 26

Anthurumi 12 Angutumika Kuchiwona Charu cha Kanani

Anthurumi 12 Angutumika Kuchiwona Charu cha Kanani

Ayisraele angutuwaku ku Phiri la Sinai, ndipu angwenda muchipululu cha Parana ndi kuchifika kumalu ngo ngadanikanga kuti Kadeshe. Ŵe kweniko, Yehova wangukambiya Mozesi kuti: ‘Tuma anthurumi 12, mu fuku lelosi mutuwi munthurumi yumoza kuti akawoni charu cha Kanani, charu cho ndipasengi Ayisraele.’ Mwaviyo, Mozesi wangusankha anthurumi 12 ndipu wanguŵakambiya kuti: ‘Lutani ku Kanani ndipu mukafufuzi asani charu cho ntchamampha kulimamu vakurya. Mukawoni asani ŵanthu wo alivi nthazi pamwenga ŵe ndi nthazi ndipuso asani aja mumahema pamwenga mumatawuni.’ Mwaviyo, anthurumi 12 wo angutumika, anguluta ku Kanani. Pakati pawu penga Yoswa ndi Kalebe.

Pati pajumpha mazuŵa 40, anguweku ndipu angupinga nkhuyu, makangaza ndi mphereska. Anthurumi 12 yaŵa angukamba kuti: ‘Charu cho ntchamampha kweni ŵanthu wo aja mwenimo mbanthazi ndipu matawuni ngawu nge ndi mipanda yitaliyitali.’ Pavuli paki Kalebe wanguti: ‘Tingaŵaphara nkhondu. Tiyeni tiluti, sonu viyo!’ Kumbi wachiziŵa chifukwa cho Kalebe wangukambiya viyo? Ntchifukwa chakuti iyu ndi Yoswa athembanga Yehova. Kweni anthurumi 10 angukamba kuti: ‘Tingalutanga cha! Ŵanthu a kweniko mbanthazi ukongwa ndipu ndi vinkhara. Isi tawonekanga nge azombi.’

Venivi vinguchitisa kuti Ayisraele achiti mantha. Yiwu angwamba kudandawula ndipu akambiyananga kuti: ‘Tiyeni tisankhi mulongozgi  munyaki, tiwere ku Egipiti. Tilutiyengenji kucharu ichi ndi kuchifwiya kweniko?’ Yoswa ndi Kalebe angukamba kuti: ‘Mungalekanga cha kuvwiya Yehova ndipu mungawopanga cha. Yehova wativikiliyengi.’ Ayisraele anguvwiya cha. Yiwu akhumbanga kubaya Yoswa ndi Kalebe.

Kumbi Yehova wanguchitanji? Iyu wangukambiya Mozesi kuti: ‘Chinanga kuti ndaŵachitiya vinthu vinandi Ayisraele kweni atindivwiya mbwenu cha. Mwaviyo, ajengi muchipululu kwa vyaka 40 ndipu afwiyengi mwenimo. Ŵana ŵawu pe kweniso Yoswa ndi Kalebe ndiwu amuja mucharu cho ndingulayizga kuti ndiŵapasengi.’

“Ntchifukwa wuli muchita mantha mwaŵanthu achivwanu chimana yimwi?”—Mateyu 8:26