Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 18

Chivwati cho Chakoliyanga Motu

Chivwati cho Chakoliyanga Motu

Mozesi wanguja mucharu cha Midiani kwa vyaka 40. Iyu wanguto munthukazi ndipu wangubala ŵana. Zuŵa linyaki wachiliska mbereri za asibweni ŵaki a Yetero pafupi ndi Phiri la Sinai, wanguwona chinthu chakuziziswa. Chivwati chaminga chakoliyanga motu kweni chafyanga cha. Mozesi wati waluta pafupi kuti wakawoni vo vachitikanga, wanguvwa mazu kutuliya muchivwati ngakuti: ‘Mozesi! Ungazanga pafupi cha. Zuwa sapatu zaku chifukwa wama pamalu ngakupaturika.’ Wenga Yehova yo wakambanga mazu yanga kuporote mwa mungelu.

Mozesi wanguchita mantha, mwaviyo, wangujala chisku chaki. Yehova wangukamba kuti: ‘Ndawona mo Ayisraele asuzgikiya. Ndiŵatasengi ku Egipiti ndipu ndizengi nawu mucharu chamampha. Iwi ndiwi uŵalongozengi pakutuwa mu Egipiti.’ Kumbi uŵanaŵana kuti Mozesi wanguzizwa cha?

Mozesi wangufumba kuti: ‘Kumbi ndamukambanji asani ŵanthu achindifumba kuti ndiyani wandituma?’ Chiuta wangumuka kuti: ‘Ukaŵakambiyi kuti Yehova, Chiuta waku Abrahamu, Chiuta waku Yisaki ndi Chiuta waku Yakobe, ndiyu wandituma.’ Pavuli paki, Mozesi wangufumba so kuti: ‘Ndamuchita wuli asani ŵanthu achindivwiya cha?’ Yehova wangulongo Mozesi ukaboni wakuti wakumuwovya. Iyu wangukambiya Mozesi kuti waponyi nthonga yaki pasi. Nthonga yo yingusambuka njoka! Mozesi wati wako njoka yo kumuchiya, yingusambuka so nthonga. Yehova wanguti: ‘Asani wachichita venivi, amuziŵa kuti ndini ndakutuma.’

Mozesi wanguti: ‘Nditondeka kulongoro umampha.’ Yehova wangumulayizga kuti: ‘Ndazakukukambiya vakuti ukakambi ndipu ndazakukutumiya muku waku Aroni kuti wakakuwovyi.’ Mozesi wanguziŵa kuti Yehova we nayu. Mwaviyo, wanguto muwolu waki ndi ŵana ŵaki ndipu wanguluta ku Egipiti.

“Mungafipanga mtima cha kuti mwamukambanji pamwenga mwamukamba wuli chifukwa mwazamupasika nyengu yeniyo vakuti mukambi.”—Mateyu 10:19