Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 17

Mozesi Wangusankha Kusopa Yehova

Mozesi Wangusankha Kusopa Yehova

Ŵanthu a mu banja laku Yakobe wo ŵenga ku Egipiti aziŵikanga ndi zina lakuti Ayisraele. Yakobe ndi Yosefe ŵati ŵafwa, Farawo munyaki wangwamba kulamuliya. Iyu wachitanga mantha chifukwa Ayisraele ayandananga kuluska Aegipiti. Mwaviyo, Farawo wanguchitisa kuti Ayisraele aje akapolu. Iyu waŵachichizanga kuti awumbengi vidina kweniso kuti agwirengi ntchitu muminda. Asani Aegipiti atiŵachitiya nkhaza, chiŵerengeru cha Ayisraele chakuwanga ukongwa. Chifukwa chakuti venivi vamukondwesanga cha Farawo, wangulamula kuti asani Muyisraele wabala mwana munthurumi wabayikengi nyengu yeniyo. Kumbi uŵanaŵana kuti Ayisraele anguvwa wuli?

Munthukazi munyaki wachiyisraele zina laki Yokebede, wangubala mwana munthurumi wakutowa. Kuti wavikiliyi mwana waki, iyu wangumuŵika mubasiketi ndipu wanguchiyibisa mumateti mumusinji wa Nile. Miriamu yo wenga muzichi wabonda mwenuyu, wanguja pafupi kuti wawoni vo vichitikengi.

Mwana munthukazi waku Farawo, wanguza kumusinji kuti wazisambi ndipu wanguwona basiketi. Mukati mwa basiketi wangusaniyamu  mwana yo waliyanga ndipu wangumuvwiya lisungu. Miriamu wangumufumba kuti: ‘Nkhakudaniyeni munthukazi kuti wakuleliyeni mwana uyu?’ Mwana waku Farawo wanguzomera ndipu Miriamu wanguchidana anyina a Yokebede. Yiwu ŵati ŵaza wanguŵakambiya kuti: ‘Mutoni mwana uyu, mundilere ndikulipireningi.’

Mwana yo wati wakuwa, Yokebede wanguza nayu ku mwana munthukazi waku Farawo ndipu wangumudana kuti Mozesi. Mwana waku Farawo wangulera Mozesi nge mwana waki chayiyu. Mozesi wangukuwa nge mwana wa Fumu ndipu watingi wachitengi vosi vo watingi wakhumbengi. Kweni Mozesi wangumuluwa cha Yehova. Iyu waziŵanga kuti ndi Muegipiti cha kweni ndi Muyisraele. Mozesi wangusankha kuteŵete Yehova.

Mozesi wati wafika vyaka 40, wakhumbanga kuwovya ŵanthu a mtundu waki. Iyu wanguwona Muegipiti wachipuma kapolu wachiyisraele. Mozesi wangupuma Muegipiti mwenuyu ndipu wangufwa. Pavuli paki, wanguwundiya liŵavu la munthu yo mumuchenga. Farawo wati waziŵa venivi, wanguyesesa kuti wabayi Mozesi. Kweni Mozesi wanguthaŵiya kucharu cha Midiani. We kweniko, Yehova wamuphweriyanga.

“Chifukwa cha chivwanu, Mozesi . . . wangukana kudanika kuti mwana wa mwana munthukazi waku Farawo, ndipu wangusankha kuti wasuzgikiyi limoza ndi ŵanthu aku Chiuta.”—Ŵahebere 11:24, 25