Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 22

Chakuziziswa cho Chinguchitika pa Nyanja Yiyera

Chakuziziswa cho Chinguchitika pa Nyanja Yiyera

Farawo wati wavwa ŵaka kuti Ayisraele atuwamu mu Egipiti, wangusintha maŵanaŵanu ngaki ngakuti Ayisraele akengi. Iyu wangulamula asilikali ŵaki kuti: ‘Toni magaleta ngangu ngosi ngankhondu ndipu tiyeni tiŵalondo! Mphanyi tinguŵazomereza cha kuti aluti.’ Iyu ndi asilikali ŵaki angwamba kulondo Ayisraele.

Yehova walongozganga ŵanthu ŵaki mwakugwirisiya ntchitu mutambu ndimusana kweniso motu ndi usiku. Iyu wanguŵalongozge ku Nyanja Yiyera ndipu wanguŵakambiya kuti azengi misasa.

Pavuli paki, Ayisraele anguwona kuti Farawo ndi asilikali ŵaki atiŵalondo. Yiwu ŵenga pakati pa Asilikali a ku Egipiti ndi nyanja. Ayisraele angwamba kuliliya Mozesi kuti: ‘Tifwengi! Mphanyi ungutileka ku Egipiti.’ Mozesi wanguti: ‘Mungawopanga cha. Lindizani kuti muwoni mo Yehova watitaskiyengi.’ Mozesi wangugomeza ukongwa Yehova, asi viyo?

Yehova wangukambiya Ayisraele kuti ajinthuwi mahema ngawu. Usiku wenuwu, Yehova wangundereza mtambu ndipu unguma pakati pa Ayisraele ndi Aegipiti. Ko ŵenga Aegipiti kwenga mudima kweni ko ŵenga Ayisraele kwenga ukweru.

Yehova wangukambiya Mozesi kuti watambasuliyi janja laki panyanja. Pavuli paki Yehova wanguchitisa kuti panyanja paputi chimphepu chikulu  usiku wosi. Nyanja yingugaŵikana paŵi ndipu pakati pangupangika nthowa. Ayisraele angwenda pamalu ngakumila kuluta kusirya linyaki.

Asilikali aku Farawo angulondo Ayisraele wo ŵenga mamiliyoni. Yiwu angusere munyanja ndipu nawu ayendanga pamalu ngakumila. Pavuli paki Yehova wanguchitisa kuti asilikali wo atimbanyizgiki. Vingelengeli va magaleta ngawu vingwamba kukhwetuka. Asilikali angudaniriza kuti: ‘Tiyeni tituwemu! Yehova watiŵarwiya nkhondu.’

Yehova wangukambiya Mozesi kuti: ‘Tambasuliya janja laku panyanja.’ Nyengu yeniyo, maji nga munyanja ngangukumana so pakati ndipu nganguŵabiza. Farawo ndi asilikali ŵaki wosi angufwa. Pengavi yo wangupona.

Kusirya linyaki la nyanja, chigulu cha Ayisraele chingwamba kulumba Yehova ndi sumu yakuti: “Mbiyani Yehova chifukwa wakwezeka ukongwa. Iyu waponya munyanja mahachi ndi akukwerapu ŵaki.” Po ŵanthu ambanga, anthukazi avinanga ndipuso ambanga ting’oma. Weyosi wangukondwa ukongwa kuti ataskika.

“Kuti tije achiganga ndi kukamba kuti; ‘Yehova ndiyu watindiwovya, ndichitengi mantha cha. Munthu wangachitanji nani?’”—Ŵahebere 13:6