Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 15

Yehova Wangumuluwa Cha Yosefe

Yehova Wangumuluwa Cha Yosefe

Pa nyengu yo Yosefe wenga mujeri, Farawo Fumu ya ku Egipiti wangulota malotu ngo pengavi yo waziŵanga vo ngang’anamuwanga. Yumoza mwa ateŵeti ŵaki wangukambiya Farawo kuti Yosefe wangafwatuliya malotu ngo. Farawo wangutuma munthu mwaliŵi kuti wakamudani.

Farawo wangufumba Yosefe kuti: ‘Kumbi ungafwatuliya malotu ngangu?’ Yosefe wangukambiya Farawo kuti: ‘Kwa vyaka 7, mu Egipiti muŵengi vakurya vinandi ndipu vyaka 7 vapanthazi kuŵengi nja. Sankhani munthu wazeru kuti wasungi vakurya kuti ŵanthu ŵinu azileki kufwa ndi nja.’ Farawo wangumuka kuti: ‘Ndasankha iwi! Iwi ujengi wachiŵi ku munthu wanthazi ukongwa mu Egipiti!’ Kumbi Yosefe wanguziŵa wuli vo malotu ngaku Farawo ngang’anamuwanga? Yehova ndiyu wanguwovya Yosefe.

Yosefe wangusunga vakurya kwa vyaka 7. Pavuli paki, mucharu chosi mwenga nja nge mo Yosefe wangukambiya. Ŵanthu atuwanga muvyaru vakupambanapambana kuti aziguli vakurya kwaku Yosefe. Awisi a Yakobe ŵati ŵavwa kuti ku Egipiti kwe vakurya, angutuma ŵana ŵawu 10 anthurumi kuti akaguli vakurya.

Ŵana aku Yakobe anguluta kwaku Yosefe ndipu iyu wanguŵaziŵa nyengu yeniyo kweni aku ŵaki angumuziŵa cha. Yiwu angumugwadiya mwakukoliyana ndi vo wangulota weche munamana. Yosefe wakhumbanga kuziŵa asani aku ŵaki ŵenga ŵeche ndi mtima uheni. Iyu wangukamba kuti: ‘Mwaza kuzifufuza charu chidu. Mwaza kuziwona asani charu chidu ntchambula nthazi.’ Yiwu angumuka kuti: ‘Awa! Tengapu ŵana anthurumi 12 a ku Kanani. Mubali widu yumoza wakutayika ndipu mumana ukongwa we ndi ada.’ Pavuli paki, Yosefe wanguti: ‘Mukazi nayu kunu muvurwa winu  ndipu ndazakukugomezani.’ Mwaviyo, anguwere kunyumba kwa awisewu.

Chakurya chati chamala so, Yakobe wangutuma ŵana ŵaki kuti aluti ku Egipiti. Pa nyengu iyi anguluta ndi Benjamini yo wenga mumana ukongwa paku wosi. Kuti wayesi abali ŵaki, Yosefe wangubisa kapu yasiliva muthumba laku Benjamini. Pavuli paki wangukamba kuti ŵaba. Aku ŵaki anguzizwa ukongwa ateŵeti aku Yosefe ŵati asaniya kapu muthumba laku Benjamini. Yiwu angupempha Yosefe kuti m’malu mwakulanga Benjamini, walangi yiwu.

Yosefe wanguziŵa kuti aku ŵaki akusintha. Iyu wangutondeka kulutiriza kujibisa. Mwaviyo, wanguliya ndipu wanguŵakambiya kuti: ‘Ndini mubali winu, Yosefe. Kumbi ada ŵeche amoyu?’ Abali ŵaki anguzizwa ukongwa. Iyu wanguti: ‘Mungadandawulanga cha chifukwa cha vo mungundichitiya. Chiuta ndiyu wakundituma kunu kuti ndizitaski umoyu winu. Yendesani, mukato ada muzi nawu kunu.’

Yiwu anguluta kunyumba kuchikambiya awisewu nkhani yamampha yeniyi ndipu pavuli paki anguŵato ndi kuza nawu ku Egipiti. Chinanga kuti pangujumpha vyaka vinandi, Yosefe ndi awisi angukumana so.

“Asani muleka kugowo ke anyinu maubudi ngawu, Awusemwi nawu akugowokiyeningi cha maubudi nginu.”—Mateyu 6:15