Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 9

Pavuli Paki Angubala Mwana!

Pavuli Paki Angubala Mwana!

Abrahamu ndi Sara anguja vyaka vinandi kutuliya po angutoliyana. Angusiya nyumba yawu yamampha ku Uru ndipu ajanga muhema. Sara wadandawulanga cha chifukwa wagomezanga Yehova.

Sara wakhumbisisanga kuja ndi mwana ndipu wangukambiya Abrahamu kuti: ‘Asani muteŵeti wangu Hagara wangabala mwana, mwana yo wajengi nge wangu.’ Pati pajumpha nyengu, Hagara wangubala mwana munthurumi. Zina laki wenga Yishumaele.

Pati pajumpha vyaka vinandi, Abrahamu wati wafika vyaka 99 ndipuso Sara wati wafika vyaka 89, angulonde alendu atatu. Abrahamu wanguŵakambiya kuti apumuwi pachimiti ndipu wanguŵapasa chakurya. Kumbi uŵanaŵana kuti alendu ŵenaŵa ŵenga ayani? Ŵenga angelu! Yiwu angukambiya Abrahamu kuti: ‘Chaka chamawa, nyengu nge yinu, iwi ndi muwolu waku mwazamuja ndi mwana munthurumi.’ Pa nyengu iyi Sara wenga muhema ndipu wavwisiyanga. Iyu wanguseka ndipu wangulongoro mu mtima mwaki kuti: ‘Kumbi ndingaja ndi mwana, chinanga kuti nde wakukota?’

Chaka chakulondopu, Sara wangubala mwana munthurumi nge mo mungelu waku Yehova wangukambiya. Abrahamu wangudana mwana yo kuti Yisaki. Zina lenili ling’anamuwa, “Kuseka.”

 Yisaki we pafupi kufika vyaka 5, Sara wanguwona kuti Yishumaele wasekanga Yisaki. Sara wakhumbanga kuvikiriya mwana waki ndipu wangukambiya Abrahamu kuti wadikisi Hagara ndi mwana waki Yishumaele. Pakwamba, Abrahamu wakhumbanga cha kuŵadikisa. Kweni Yehova wangukambiya Abrahamu kuti: ‘Vwiya vo Sara wakamba. Ndimuphweriyengi Yishumaele kweni layizgu langu lazamufiskikiya mwaku Yisaki.’

“Chifukwa cha chivwanu, Sara wangulonde nthazi ndipu wenga ndi nthumbu, . . . pakuti wanguwona kuti Mweniyo wangulayizga ngwakugomezgeka.”—Aheberi 11:11