Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 101

Paulo Wangutumizika ku Roma

Paulo Wangutumizika ku Roma

Ulendu wachitatu wakuchipharazga waku Paulo ungumaliya ku Yerusalemu. We kwenuku angumumanga ndi kumuŵika mujeri. Ndi usiku muchiwona, Yesu wangumukambiya kuti: ‘Ulutengi ku Roma ndipu ukapharazgi kweniko.’ Paulo angumutuzgaku ku Yerusalemu ndipu anguluta nayu ku Kaisarea ko wanguja mujeri kwa vyaka viŵi. Pa nyengu yo amumbanga mulandu pamasu paku Festo yo wenga nduna, Paulo wangukamba kuti: ‘Ndizomerezeni kuti nkhayeruzgiki ndi Kaisare, ku Roma.’ Festo wangumuka kuti: “Pakuti wapempha kuti uluti kwaku Kaisare, ulutengi nadi kwaku Kaisare.” Paulo angumumanga ndi kumuŵika musitima yo yalutanga ku Roma ndipu abali ŵaŵi, Luka ndi Aristarko, anguluta nayu.

Ŵe panyanja, kungwamba chimphepu chikulu ndipu chinguputa kwa mazuŵa nganandi. Weyosi waŵanaŵananga kuti afwengi. Kweni Paulo wangukamba kuti: ‘Mwaŵanthu, kumalotu mungelu wandikambiya kuti: “Ungawopanga cha Paulo. Wamufika ku Roma ndipu weyosi yo we musitima yeniyi wafwengi cha.” Lekani kuchita mantha! Tifwengi cha.’

Mphepu yo yinguputa kwa mazuŵa 14. Pavuli paki, angwamba kuwona mtunda. Mtunda wenuwu wenga chilwa cha Malta. Sitima yichiyenda yingufika pasi pa muchenga ndipu yingusweka kweni ŵanthu wosi 276 wo ŵenga musitima yo angufwa cha. Anyaki angusambira penipo anyaki angukwera pa vimathabwa va sitima ndipu ayanjamanga mpaka kuchifika ku mtunda. Ŵati afika ku mtunda, ŵanthu a ku Malta anguŵaphwere ndipu anguŵapembe motu kuti awothi.

Pati pajumpha myezi yitatu, asilikali anguto Paulo ndi kukwera nayu sitima yinyaki kuluta ku Roma. Paulo wati wafika, abali anguza kuzimulonde. Iyu wati waŵawona wanguwonga Yehova ndipu wanguchiskika. Chinanga kuti Paulo wangumangika, angumuzomereza kuti wajengi munyumba ya lenti ndipu penga msilikali yo wamuwoneriyanga. Iyu wanguja kwenuku kwa vyaka viŵi. Ŵanthu wo azanga kuzimuwona waŵapharazgiyanga vakukwaskana ndi Ufumu waku Chiuta ndipuso waŵasambizanga zaku Yesu. Paulo wangulembe so kalata mipingu ya ku Asia Minor ndi ku Yuda. Yehova wangugwirisiya ntchitu Paulo kuti wapharazgi uthenga wamampha ku ŵanthu a mitundu yinyaki.

“Mu nthowa yeyosi titijisimikiziya taŵeni kuti te ateŵeti aku Chiuta. Tichita venivi mwakukunthiyapu vinthu vinandi, mwakukumana ndi masuzgu, mwakusoŵa vakukhumbika pa umoyu, mwakukumana ndi mawunononu”—2 Ŵakorinte 6:4