Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 97

Kornelio Walonde Mzimu Utuŵa

Kornelio Walonde Mzimu Utuŵa

Ku Kaisarea kwenga musilikali munyaki wa Aroma zina laki Kornelio ndipu wachitanga vinthu vamampha. Chinanga kuti wenga Myuda cha, Ayuda amutumbikanga. Iyu waŵovyanga akavu. Kornelio wagomezanga Yehova ndipu wapempheranga nyengu zosi. Zuŵa linyaki mungelu wanguwoneke kwaku Kornelio ndi kumukambiya kuti: ‘Chiuta wavwa mapempheru ngaku. Mwaviyo, tumiza anthurumi ku tawuni ya Yopa ko kwe Petro ndipu akamudani kuti wazi kwaku iwi.’ Nyengu yeniyo, Kornelio wangutuma anthurumi atatu kuti aluti ku Yopa. Tawuni iyi yenga pa mtunda wa makilomita 50 chakumwera.

Petro we ku Yopa, wanguwona chiwona. Iyu wanguwona nyama zo Ayuda azomerezekanga cha kurya ndipu wanguvwa mazu ngakumukambiya kuti waryi. Petro wangukana ndipu wangukamba kuti: ‘Ndechendaryepu nyama zakufipisika pa umoyu wangu.’ Pavuli paki, wanguvwa mazu ngakuti: ‘Ungakambanga cha kuti nyama izi zakufipisika. Chiuta wazitowesa.’ Angumukambiya so kuti: ‘Pa khomu pe ŵanthu atatu. Uluti nawu.’ Petro wanguluta pa khomu ndipu wangufumba anthurumi wo chifukwa cho anguziya. Yiwu angumuka kuti: ‘Tatumika ndi Kornelio, musilikali wa Aroma. Muluti kunyumba kwaki ku Kaisarea.’ Petro wangupempha ŵanthu wo kuti agoni kunyumba kwaki. Mawa laki, wanguluta nawu ku Kaisarea limoza ndi abali anyaki a ku Yopa.

Kornelio wati wawona Petro, wangugwada. Kweni Petro wangukamba kuti: ‘Soka! Nani nde munthu nge yiwi. Chiuta wandikambiya kuti ndizi ku nyumba kwaku chinanga kuti Ayuda asere cha munyumba za ŵanthu amitundu yinyaki. Sonu ndikambiyi chifukwa cho wandidaniya.’

Kornelio wangukambiya Petro kuti: ‘Mazuŵa nganayi ngo ngajumpha, ndapempheranga kwaku Chiuta ndipu mungelu wangundikambiya kuti ndikudani. Chondi, tisambizi mazu ngaku Yehova.’ Petro wangukamba kuti: ‘Ndaziŵa kuti Chiuta walivi sankhu. Iyu walonde weyosi yo wakhumba kumusopa.’ Petro wanguŵasambiza vinthu vinandi vakukwaskana ndi Yesu. Pavuli paki, mzimu utuŵa unguza paku Kornelio ndi wosi wo wenga nawu ndipu wosi angubatizika.

“[Chiuta] walondere munthu wakutuliya mumtundu wewosi yo watimuwopa ndi kuchita urunji.”—Machitidu 10:35