Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 98

Chikhristu Chifika Muvyaru Vinandi

Chikhristu Chifika Muvyaru Vinandi

Akutumika anguvwiya dangu laku Yesu lakuti apharazgi uthenga wamampha pacharu chosi chapasi. Mu 47 C.E., abali a ku Antioke angutuma Paulo ndi Barnaba kuti akapharazgi. Apharazgi a phamphu ŵenaŵa anguchipharazga ku Asia Minor muchigaŵa cha Derbe, Lustra ndi Ikonio.

Paulo ndi Barnaba apharazgiyanga weyosi, wakukhupuka, mukavu, mwana pamwenga wakukota. Ŵanthu anandi anguzomera kusambira uneneska wakukwaskana ndi Khristu. Paulo ndi Barnaba ŵati apharazgiya Sergio Paulo, yo wenga nduna ya ku Kupro, munthu munyaki yo wachitanga vamasenga wakhumbanga kuŵakaniza. Paulo wangukambiya wamasenga kuti: ‘Yehova wakulangengi.’ Nyengu yeniyo, wamasenga yo wanguleka kuwona. Sergio Paulo wati wawona venivi, wanguja wakusambira.

Paulo ndi Barnaba apharazganga kwekosi, ku nyumba ndi nyumba, mumisika, mumisewu ndipuso mumasinagoge. Yiwu ŵati achizga munthu wakupunduka ku Lustra, ŵanthu wo anguwona venivi awonanga kuti yiwu mbachiuta ndipu akhumbanga kuŵasopa. Kweni Paulo ndi Barnaba anguŵakaniza ndipu angukamba kuti: ‘Musopengi Chiuta pe! Isi te ŵanthu.’ Pavuli paki, kunguza Ayuda anyaki ndipu anguchitisa kuti chigulu cho chiyukiyi Paulo. Ŵanthu ŵenaŵa, angumuponya mya, angumuguziya kubwalu kwa tawuni ndipu angumuleka kweniko chifukwa aŵanaŵananga kuti wafwa. Chinanga kuti anguchita venivi, Paulo wenga weche wamoyu! Abali anguza mwaliŵi kuzimutaska ndipu anguluta nayu so mutawuni. Pavuli paki, Paulo wanguwere ku Antioke.

Mu 49 C.E., Paulo wanguluta so kuchipharazga. Wati wawe kuchiwona abali ku Asia Minor, wanguluta kuchipharazga uthenga wamampha ku vigaŵa vakutali va ku Europe. Iyu wanguluta ku Filipi, ku Atesalonika, ku  Athene ndi ku vigaŵa vinyaki. Pati pajumpha nyengu, wanguchipharazga ku Efesu kosi ndipu pavuli paki wanguwere ku Antioke. Sila, Luka ndipuso Timote yo wenga wachinyamata, anguluta limoza ndi Paulo pa ulendu uwu. Yiwu angujalikiska mipingu ndi kuyiwovya kuti yije yakukho. Paulo wanguja ku Korinte kwa chaka ndi hafu kuti wachiski abali. Iyu wapharazganga, wasambizanga kweniso kulemba makalata ngakuluta ku mipingu yinandi. Paulo wagwiranga so ntchitu yakupanga mahema. Pavuli paki, wanguwere ku Antioke.

Mu chaka cha 52 C.E., pa ulendu waki wachitatu wakuchipharazga, Paulo wangwambiya ku Asia Minor. Iyu wangujaku vyaka vinandi ku Efesu ndipu wasambizanga, wachizanga ŵanthu ndi kovya mpingu. Zuŵa lelosi, wakambanga nkhani muholu ya sukulu. Ŵanthu anandi avwisiyanga ndipu angusintha mijalidu yawu. Iyu wanguchifika mpaka kunkhondi kwa Filipi ndipu pavuli paki, wanguluta ku Korinte. Paulo wati wapharazga uthenga wamampha muvyaru vinandi, pakumaliya wanguluta ku Yerusalemu.

“Mwaviyo, lutani mukasambizengi ŵanthu amitundu yosi kuti aje akusambira ŵangu.”—Mateyu 28:19