Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 95

Pengavi cho Chinguŵalekesa Kupharazga

Pengavi cho Chinguŵalekesa Kupharazga

Pageti la nyumba yakusopiyamu, pajanga munthu munyaki yo watondekanga kwenda. Iyu wapemphesanga zuŵa lelosi. Zuŵa linyaki ndi musana, wanguwona Petro ndi Yohane achisere munyumba yakusopiyamu. Iyu wangukamba kuti: ‘Ndipaseniku ndalama.’ Petro wangumuka kuti: ‘Nde ndi chinthu chinyaki chamampha kuluska ndalama cho ndingakupasa. Muzina laku Yesu, soka ndipu yenda!’ Pavuli paki, Petro wangumuwovya kuti wasoki ndipu munthu yo wangwamba kwenda! Ŵanthu wo ŵenga penipo angukondwa ukongwa ndi chakuziziswa chenichi ndipu anandi anguvwana.

Kweni asembi ndi Asaduki angukwiya. Yiwu anguko akutumika, anguŵatole kukhoti ndipu anguŵafumba kuti: ‘Ndiyani wakupasani nthazi zakuchizgiya munthu uyu?’ Petro wangukamba kuti: ‘Tikulonde nthazi kutuliya kwaku Yesu Khristu, yo imwi mungumubaya.’ Alongozgi a visopa yaŵa angudaniriza kuti: ‘Muleki kukamba zaku Yesu!’ Kweni akutumika angukamba kuti: ‘Titenere kukamba zaku iyu. Tilekengi cha.’

Petro ndi Yohane ŵati afwatulika ŵaka, anguluta kwa anyawu ndipu anguŵakambiya vo vinguchitika. Yiwu angupemphere limoza ndipu angupempha Yehova kuti: ‘Chondi tiwovyeni kuti tije ambula mantha kuti tilutirizi kugwira ntchitu yinu.’ Yehova wanguŵapasa mzimu utuŵa ndipu angulutiriza kupharazga kweniso kuchizga ŵanthu. Anandi anguja ndi chivwanu. Asaduki anguchita sanji ukongwa ndipu anguko akutumika ndi kuŵaŵika mujeri. Kweni ndi usiku, Yehova wangutuma mungelu yo wangujula makhomu nga jeri ndipu wangukambiya akutumika wo kuti: ‘Weriyani kunyumba yakusopiyamu ndipu mukasambizi kweniko.’

Ndi mulenji, ŵanthu angukambiya Mphara Yikulu ya Milandu ya alongozgi achisopa kuti: ‘Jeri leche lakujala kweni anthurumi wo munguŵamanga atuwamu! Yiwu ŵe munyumba yakusopiyamu, asambiza ŵanthu!’ Akutumika anguwamanga so ndipu anguza nawu ku Mphara Yikulu ya Milandu. Wasembi mura wangukamba kuti: ‘Ndingukulamulani kuti mungakambanga  cha zaku Yesu!’ Kweni Petro wangumuka kuti: “Titenere kuvwiya Chiuta nge wakuwusa kuluska ŵanthu.”

Alongozgi a visopa angukwiya ukongwa ndipu akhumbanga kubaya akutumika. Mufarisi munyaki zina laki Gamaliyeli wanguma ndi kukamba kuti: ‘Muphwere! Panyaki Chiuta we ndi ŵanthu yaŵa. Kumbi mukhumba kulimbana ndi Chiuta?’ Yiwu angumuvwiya. Akutumika ŵati aŵakwechuwa ndi nthonga, anguŵalamula so kuti aleki kupharazga ndipu anguŵakambiya kuti akengi. Yiwu anguleka cha kupharazga uthenga wamampha chifukwa cha vinthu venivi. Akutumika apharazganga mwambula mantha munyumba yakusopiyamu kweniso kunyumba ndi nyumba.

“Titenere kuvwiya Chiuta nge wakuwusa kuluska ŵanthu.”—Machitidu 5:29