Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 88

Yesu Wangumangika

Yesu Wangumangika

Yesu ndi akutumika angujumpha Dambu la Kidroni achiluta ku Phiri la Maolive. Pa nyengu iyi kwenga ku matandakucha ndipu mwezi wawonekanga wosi wamphumphu. Ŵati afika mumunda wa Gesemane, Yesu wanguŵakambiya kuti: “Jani panu ndipu muje masu.” Pavuli paki, Yesu wanguluta panthazi kamanavi ndipu wangugwada. Iyu wangusuzgika ukongwa maŵanaŵanu ndipu wangupemphera kwaku Yehova kuti: “Khumbu linu lichitiki.” Yehova wangutumiza mungelu kuti wamuchiski. Yesu wati wawere po ŵenga akutumika, wangusaniya kuti agona. Iyu wanguti: ‘Yukani! Ndi nyengu yakugone cha iyi! Nyengu yafika kuti ndiperekeki kwa arwani ŵangu.’

Pati pajumpha nyengu yimanavi, Yuda wanguza ndi chigulu cha ŵanthu cho chingupinga malipanga ndi nthonga. Iyu waziŵanga ko wangasaniya Yesu chifukwa kanandi azanga kumunda wenuwu. Yuda wangukambiya asilikali kuti wakuŵalongo Yesu. Iyu wanguluta ko kwenga Yesu ndi kukamba kuti: ‘Timoneni Musambizi,’ pavuli paki, wangumufyofyontha. Yesu wanguti: ‘Yuda, kumbi utindipereka mwakuchita kundifyofyontha?’

Yesu wangutuwa pagulu la akutumika ŵaki ndi kuma panthazi pawu ndipu wangufumba ŵanthu wo anguza kuzimuko kuti: “Kumbi mupenja yani?” Yiwu angumuka kuti: “Yesu wa ku Nazarete.” Iyu wangumuka kuti: “Ndini panu” ndipu ŵanthu wo anguwere vuli ndi kuwa pasi. Yesu wanguŵafumba so kuti: “Kumbi mupenja yani?” Yiwu angumuka so kuti: “Yesu wa ku Nazarete.” Iyu wangumuka kuti: ‘Ndakukambiyani kuti ndini. Alekeni yaŵa akengi.’

Petro wati waziŵa vo vachitikanga, wanguto lipanga ndi kudumuwa gutu laku Malko, yo wenga kapolu wa wasembi mura. Yesu wanguko gutu la munthu yo ndipu linguweriyapu. Iyu wanguti kwaku Petro: ‘Leka lupanga laku. Asani ugwirisiyengi ntchitu lupanga, wazamubayika ndi lupanga.’ Asilikali wo anguko Yesu ndi kumumanga manja ndipu akutumika anguthaŵa. Pavuli paki, chigulu cho  chingumutole kwaku Anase yo wenga mura wa a sembi. Anase wati wamala kufumba Yesu, wangumutumiza ku nyumba yaku Kayafa yo wenga wasembi mura. Ntchinthu wuli chinguchitikiya akutumika?

“Mucharu mukumanengi ndi masuzgu nganandi kweni jani ambula mantha! Ndachithereska charu.”—Yohane 16:33