Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 87

Chakurya Chakumaliya Chamazulu Chaku Yesu

Chakurya Chakumaliya Chamazulu Chaku Yesu

Chaka chechosi pa 14 mwezi wa Nisani, Ayuda achitanga phwandu la Phaska. Phwandu lenili laŵakumbusanga mo Yehova wanguŵafwatuliya ku ukapolu ku Egipiti ndi kuŵalongozga kuluta mu Charu Chakulayizgika. Mu chaka cha 33 C.E., Yesu ndi akutumika ŵaki akondweliyanga Phaska muchipinda chapachanya ku Yerusalemu. Ŵati amaliza, Yesu wangukamba kuti: ‘Yumoza waku imwi wandiperekengi.’ Akutumika anguzizwa ndipu angufumba Yesu kuti: ‘Ndiyani?’ Yesu wanguti: ‘Mweniyo ndimupasengi chiŵandi ichi.’ Iyu wangupereka chiŵandi cho kwaku Yuda Mkeriote. Nyengu yeniyo, Yuda wangusoka ndipu wangutuwamu muchipinda.

Pavuli paki Yesu wangupemphera, wangubanthuwa chiŵandi ndipu wangupasa akutumika wo ŵenga nayu. Iyu wanguti: ‘Ryani chiŵandi ichi. Chimiya liŵavu langu lo ndiperekengi chifukwa chaku yimwi.’ Wati wamala, wangupemphere vinyu ndipu wangupasa akutumika. Iyu wanguti: ‘Mwani vinyu uyu. Wamiya ndopa zangu zo ndiperekengi kuti mugowokereki maubudi nginu. Nditikulayizgani kuti mwazamuja mafumu limoza ndi ini kuchanya. Muchitengi ivi chaka chechosi kuti mundikumbukengi.’ Wo alondo Yesu, alutiriza kuwungana chaka chechosi pa zuŵa lenili asani lumwi lasere. Unganu wo anguchita, sonu udanika kuti Chakurya Chamazulu cha Ambuya.

 Ŵati amaliza ungano wo, akutumika angwamba kulimbana kuti wakukhumbika ukongwa ndiyani. Kweni Yesu wanguŵakambiya kuti: ‘Yo ndi mura pakati pinu ndi mweniyo watijiwona kuti ndi munamana, wambula kukhumbika.

‘Ndimwi abwezi ŵangu. Nditikukambiyani vosi vo Ada akhumba kuti ndikukambiyeni. Pambula kuswera ndiluta kwa Ada kuchanya. Mujengi dankha ndipu ŵanthu azamuziŵa kuti ndimwi akusambira ŵangu asani mutanjana. Mutenere kwanjana nge mo ndakuyanjiyani.’

Pakumaliya, Yesu wangupemphera ndipu wangukambiya Yehova kuti wavikiliyi akusambira ŵaki wosi. Iyu wangupempha Yehova kuti waŵawovyi kuti agwirengi ntchitu limoza mwachimangu. Yesu wangupemphera kuti zina laku Yehova litoweseki. Iyu ndi akutumika ŵaki angumba sumu zakuthamika Yehova ndipu pavuli paki angutuliya kubwalu. Kunguja kamanavi kuti Yesu amumangi.

“Mungawopanga cha akamuskambu kamana, chifukwa Awisemwi azomereza kukupasani Ufumu.”—Luka 12:32