Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 83

Yesu Waryisa Ŵanthu Anandi

Yesu Waryisa Ŵanthu Anandi

Phaska we pafupi kuchitika mu chaka cha 32 C.E., akutumika anguweku ko anguluta kuchipharazga. Yiwu anguvuka ndipu Yesu wanguŵato pa boti kuluta nawu ku Betesaida kuti akapumuwi. Ŵe pafupi kufika ku mtunda, Yesu wanguwona kuti ŵanthu masawuzandi nganandi afika kali. Chinanga kuti Yesu wakhumbanga kuti wapumuwi ndi akusambira ŵaki, wanguŵachitiya lisungu ŵanthu wo ndipu wanguŵalondere. Iyu wanguchizga akutama wo anguza nawu ndipu wangwamba kuŵasambiza. Yesu wanguŵasambiza za Ufumu waku Chiuta zuŵa losi lamphumphu. Kwati kwayamba kufipa, akutumika anguza kwaku Yesu ndi kukamba kuti: ‘Ŵanthu yaŵa atenere kuti ŵe ndi nja. Akambiyeni kuti akengi akapenji chakurya.’

Yesu wanguŵamuka kuti: ‘Atenere cha kuluta. Apaseni chakurya.’ Akutumika angumufumba kuti: ‘Kumbi mukhumba kuti tiluti tikaŵaguliyi viŵandi?’ Filipu, yumoza mwa akutumika wanguti: ‘Chinanga kuti tenga ndi ndalama zinandi tatingi tifiskengi cha kugula viŵandi vakukwana ŵanthu wosi yaŵa.’

Yesu wangufumba kuti: ‘Kumbi te ndi chakurya chinandi wuli?’ Andreya wangumuka kuti: ‘Te ndi viŵandi vinkhondi ndi somba zimanazimana ziŵi. Kweni vingakwana cha.’ Yesu wanguti: ‘Ndipaseni viŵandi ndi somba.’ Iyu wangukambiya ŵanthu wo kuti aje pauteka ndipu aje mumagulu, anyaki aje 50, anyaki aje 100. Yesu wanguto viŵandi ndi somba, wanguleresa kuchanya ndipu wangupemphera. Pavuli paki, wanguvipereka kwa akutumika ndipu yiwu angugaŵiya ŵanthu. Anthurumi akukwana 5 sawuzandi, anthukazi ndi ŵana angurya  ndipu anguguta. Pakumaliya, akutumika anguto vo vingujaku kuti paleki kutayika chechosi. Vo vingujaku vingukwana masokola 12. Kumbi uwona kuti venivi venga vakuziziswa cha?

Ŵanthu angukondwa ndi vo Yesu wachitanga ndipu akhumbanga kuti waje fumu yawu. Yesu wanguziŵa kuti nyengu yaku Yehova yenga yechendakwani kuti iyu waje fumu. Mwaviyo, wangukambiya ŵanthu wo kuti akengi ndipu wangukambiya so akutumika kuti aluti kusirya linyaki la Nyanja ya Galile. Akutumika angukwera boti lawu kweni Yesu wanguluta kuphiri. Ntchifukwa wuli wanguchita viyo? Wakhumbanga kuchipemphera kwa Awisi. Chinanga kuti Yesu watangwamikanga ukongwa kweni nyengu zosi wasaniyanga mpata kuti wapempheri.

“Lekani kugwira ntchitu chifukwa cha chakurya cho chinangika, kweni gwiriyani ntchitu chakurya chambula kumala cho chipaska umoyu wamuyaya. Chakurya chenichi ndichu Mwana wa munthu wakupaskeningi.”—Yohane 6:27