Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 84

Yesu Wangwenda Pamaji

Yesu Wangwenda Pamaji

Yesu wachizganga ŵaka akutama pe cha pamwenga kuyusa akufwa kweni wenga so ndi nthazi zakukaniza mphepu ndi vuwa. Yesu wati wamaliza kupemphera kuphiri, wanguwona kuti munyanja ya Galile mwenga chimphepu. Pa nyengu iyi akutumika ŵenga muboti lawu ndipu asuzgikanga kwendesa boti chifukwa ko alutanga ndiku kwatuliyanga mphepu. Yesu wangusika muphiri ndipu wangwamba kwenda pamaji kulazga ko kwenga boti lo mungukwera akutumika. Akutumika ŵati awona kuti munthu watenda pamaji anguchita mantha. Kweni Yesu wanguŵakambiya kuti: ‘Ndini, mungawopanga cha.’

Petro wangukamba kuti: ‘Ambuya asani ndimwi nadi ndikambiyengi kuti ndizi ko kwe imwi.’ Yesu wangukambiya Petro kuti: ‘Yiza.’ Mwaviyo, chimphepu che mukati, Petro wangusika muboti ndipu wangwamba kwenda pamaji kuluta ko kwenga Yesu. Petro we pafupi kufika, wangulereska chimphepu ndipu wanguchita mantha. Iyu wanguwona kuti wayamba kubila. Petro wangudanirizga kuti: ‘Ambuya, nditaskeni!’ Yesu wanguko janja laki ndipu wanguti: ‘Ntchifukwa wuli ungwamba kukayika? Chivwanu chaku che pani?’

Yesu ndi Petro angukwera muboti ndipu chimphepu chinguleka mwaliŵi. Kumbi uwona kuti akutumika anguvwa wuli? Yiwu anguti: ‘Ndimwi nadi Mwana waku Chiuta.”

Mphenapa pe cha po Yesu wangulongo kuti wenga ndi nthazi zakulamuliya mphepu. Nyengu yinyaki Yesu ndi akutumika alutanga kusirya linyaki la nyanja ndipu Yesu wangugona kuvuli kwa boti lo angukwera. We mutulu, kungwamba chimphepu. Mayiŵa ngapumanga boti ndipu linguzaza ndi maji. Akutumika anguyuska Yesu ndipu anguti: ‘Musambizi tifwengi! Tiwovyeni!’ Yesu wanguyuka ndipu wangukambiya nyanja kuti: “Ja cheti!” Nyengu yeniyo, chimphepu kweniso nyanja vinguchetama. Yesu wangufumba akutumika kuti: ‘Ntchifukwa wuli mulivi chivwanu?’ Yiwu angwamba kukambisana kuti: “Chinanga ndi mphepu kweniso nyanja vitimuvwiya.” Akutumika anguziŵa kuti asani agomeza Yesu ndi mtima wosi, achitengi mantha cha ndi chechosi.

“Ndatingi ndiŵengi pani asani ndengavi chivwanu kuti ndiwonengi vamampha kutuliya kwaku Yehova mucharu cha ŵanthu amoyu?”—Sumu 27:13

Ziŵani Vinandi

YEZGANI CHIVWANU CHAWU

Petro Wangulimbana ndi Mantha Kweniso Mtima Wakudonda

Kudonda kungachitiska kuti munthu watimbanyizgiki ukongwa. kweni Petro wangumalana ndi mantha kweniso kudonda.