Phaska wati wamala, Yesu ndi akusambira ŵaki angupitiya ku Samariya achiwere ku Galile. Iyu wangupumuwa pa chisimi cho chaziŵikanga kuti chisimi chaku Yakobe. Chisimi ichi chenga pafupi ndi tawuni ya Sukari. Akusambira ŵaki anguluta mutawuni yeniyi kuchigula vakurya ndipu angumuleka wachipumuwa.

Munthukazi munyaki wanguza pachisimi cho kuzitunga maji. Yesu wangumukambiya kuti: “Ndipaseku maji ngakumwa.” Iyu wanguti: ‘Ntchifukwa wuli ulongoro ndi ini? Ini ndini Musamariya. Ayuda alongoro cha ndi Asamariya.’ Yesu wangumukambiya kuti: ‘Asani ungundiziŵa watingi undipemphengi maji ndipu ndatingi ndikupasengi maji ngakupasa umoyu.’ Munthukazi yo wangumufumba kuti, ‘Ung’anamuwanji? Ulivi chinanga ntchiyaŵi chakutungiyamu maji.’ Yesu wangumuka kuti: ‘Weyosi yo watumwa maji ngo ini ndipereka, wazamukuvwa nyota so cha.’ Munthukazi yo wanguti: ‘Ada ndipaseni maji ngo mukamba.’

Pavuli paki, Yesu wangumukambiya kuti: ‘Kadani murumu waku ndipu uzi nayu kunu kuchisimi.’ Iyu wanguti: ‘Ndilivi munthurumi.’ Yesu wanguti: ‘Uneneska. Wayirwapu kankhondi ndipu munthurumi yo wenayu sonu ndi mulumu waku cha.’ Munthukazi yo wanguti: ‘Ndaziŵa kuti ndimwi mchimi. Ŵanthu a mtundu wangu agomeza kuti tingasopa Chiuta paphiri ili kweni Ayuda akamba kuti nkhu Yerusalemu pe ko tingachisopa. Ndigomeza kuti asani Mesiya waza, wazakutisambiza mo tingasope.’ Pavuli paki, Yesu wangukamba chinthu cho wenga wechendakambiyepu munthu weyosi. Iyu wangumukambiya kuti: ‘Ndini Mesiya.’

 Munthukazi yo wanguluta mwaliŵi mutawuni yo wajanga ndipu wangukambiya Asamariya kuti: ‘Ndigomeza kuti ndasaniya Mesiya. Iyu waziŵa chechosi chakukwaskana ndi ini. Tiyeni mukamuwoni!’ Yiwu angumulondo mpaka ku chisimi ndipu anguvwisiya vo Yesu wanguŵasambiza.

Asamariya angupempha Yesu kuti waje mutawuni yawu. Yesu wanguŵasambiza kwa mazuŵa ngaŵi ndipu ŵanthu anandi angumugomeza. Yiwu angukambiya munthukazi yo kuti: ‘Tati tavwisiya vo munthu uyu watikambiya, taziŵa kuti iyu ndi mtaski nadi wa charu.’

“‘Iza kunu!’ ndipu weyosi yo we ndi nyota, wazi; weyosi yo wakhumba, wamwi maji nga umoyu kwawezi.”—Chivumbuzi 22:17