Kuvuma kwa Yisraele kwajanga ŵanthu wo agomezanga kuti nyenyezi zingaŵalongozga kuziŵa vinthu vinyaki. Zuŵa linyaki ndi usiku anthurumi anyaki akwenuku anguwona nyenyezi yo yaŵalanga ukongwa. Iyu yayendanga kuchanya ndipu anguyilondo. “Nyenyezi” yo yinguŵalongozge ku Yerusalemu. Yiwu angwamba kufumba ŵanthu kuti: ‘Wepani mwana yo wazamuja fumu ya Ayuda? Taza kuti tizimugwadiyi.’

Herode yo wenga fumu ku Yerusalemu wati wavwa za fumu yifya yeniyi, wangufipa mtima ukongwa. Iyu wangufumba ŵara a asembi kuti: ‘Kumbi fumu yeniyi yiwiyengi pani?’ Yiwu angumuka kuti: ‘Achimi akukamba kuti yazamuwiya ku Betelehemu.’ Mwaviyo, Herode wangudana anthurumi wo angutuwa Kuvuma kwa Yisraele ndi kuŵakambiya kuti: ‘Lutani ku Betelehemu, mukamupenji mwana yo. Asani mwachimusaniya mukazi so kuti muzindikambiyi ko wali. Nani ndikhumba kuti nkhamugwadiyi.’ Kweni Herode wapusikanga.

“Nyenyezi” yeniyi yingwamba so kwenda. Anthurumi wo anguyilondo mpaka ku Betelehemu. “Nyenyezi” iyi yinguma pachanya pa nyumba ndipu yiwu angusere munyumba. Yiwu angusaniya Yesu ndi anyina a Mariya. Anthurumi ŵenaŵa angugwadiya mwana yo ndipu angumupasa mphasu za golidi, libani ndi muro. Kumbi Yehova ndiyu nadi wangutuma ŵanthu yaŵa kuti akasaniyi Yesu? Awa.

Usiku wa zuŵa ili, Yehova wangukambiya Yosefe kumalotu kuti: ‘Herode wakhumba kubaya Yesu. Uto muwolu waku ndi mwana, thaŵiyani ku Egipiti. Mukaje kweniko mpaka po ndazakukukambiyani kuti weniku kwe umampha.’ Mwaliŵi, Yosefe ndi banja laki angusoka kuluta ku Egipiti.

Yehova wangukambiya anthurumi wo angutuwa Kuvuma kwa Yisraele kuti, angaweriyangaku cha kwaku Herode. Iyu wati wawona kuti atuza cha wangukwiya ukongwa. Chifukwa chakuti wangutondeka kusaniya Yesu, Herode wangulamula kuti ŵana wosi anthurumi wo ŵenga ndi vyaka vakuyanana ndi Yesu abayiki ku Betelehemu. Pa nyengu iyi Yesu wanguvikilirika chifukwa wenga kutali ku Egipiti.

 Pavuli paki, Herode wangufwa. Yehova wangukambiya Yosefe kuti: ‘Sonu uweku kwe umampha.’ Yosefe, Mariya ndi Yesu anguwere ku Yisraele ndipu anguchija mutawuni ya Nazarete.

“Ndimu so ngaŵiyengi mazu ngangu ngakutuwa pamulomu pangu . . . ndipu ngafiskengi cho ndangatumiya.”—Yesaya 55:11