Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 58

Yerusalemu Wangubwangandulika

Yerusalemu Wangubwangandulika

Ŵanthu a ku Yuda alekanga kusopa Yehova ndipu asopanga achiuta aboza. Achitanga ivi mwakuwerezawereza. Yehova wanguŵawovya kwa vyaka vinandi kuti aleki kusopa angoza. Iyu wangutuma achimi anandi kuti akatcheŵesi ŵanthu yaŵa kweni anguvwiya cha. M’malu mwaki aŵasekanga achimi ŵenaŵa. Kumbi Yehova wanguchita wuli kuti Ayuda aleki kusopa angoza?

Fumu ya Babiloni Nebukadanezara, wathereskanga mitundu yakupambanapambana. Nyengu yakwamba wati wathereska Yerusalemu, wanguko Fumu Yehoyakini, alongozgi, asilikali ndipuso ŵanthu alusu lakupanga vinthu ndipu wanguluta nawu ku Babiloni. Iyu wanguto so vinthu vosi vo venga munyumba yaku Yehova. Pavuli paki, Nebukadanezara wanguŵika Zedekiya kuŵa fumu ya Ayuda.

Pakwamba Zedekiya wanguvwiya Nebukadanezara. Kweni mitundu yo yenga pafupi ndipuso achimi aboza, angukambiya Zedekiya kuti wagalukiyi Nebukadanezara yo walamuliyanga Babiloni. Yeremiya wangutcheŵesa Zedekiya kuti: ‘Asani ugalukiyengi, ŵanthu abayanengi mu Yuda ndipu muŵengi nja kweniso matenda.’

Zedekiya wati walamuliya kwa vyaka 8, wanguŵanaŵana kuti wagalukiyi Babiloni. Iyu wangupempha asilikali a Egipiti kuti amuwovyi. Pavuli paki, Nebukadanezara wangutuma asilikali ŵaki kuti akabwanganduwi Yerusalemu ndipu anguzenga musasa pafupi ndi msumba wenuwu. Yeremiya wangukambiya Zedekiya kuti: ‘Yehova wakamba kuti asani ujithereskengi ku fumu ya Babiloni, iwi ndi msumba uwu mutaskikengi. Asani ulekengi kujithereska, Ababiloni awotchengi Yerusalemu ndipu akukongi kuti ukaje kapolu.’ Zedekiya wanguti: ‘Nditherengi cha!’

 Pati pajumpha chaka ndi hafu, Ababiloni angubwanganduwa mpanda wa Yerusalemu ndi kuwuwotcha. Yiwu anguwotcha nyumba yakusopiyamu, angubaya ŵanthu anandi ndipu ŵanthu masawuzandi anguŵako kuti akaje akapolu.

Zedekiya wanguthaŵa ku Yerusalemu kweni Ababiloni angumulondo. Yiwu angumukore pafupi ndi Yeriko ndipu anguluta nayu kwaku Nebukadanezara. Fumu ya Babiloni yingutuma ŵanthu kuti abayi ŵana aku Zedekiya, mweneku wachiwona. Pavuli paki, Nebukadanezara wangutoro masu Zedekiya ndi kumuŵika mujeri ndipu pati pajumpha nyengu wangufwa. Yehova wangulayizga ŵanthu a ku Yuda kuti: ‘Asani pajumpha vyaka 70 ndazakukuweziyani kwinu ku Yerusalemu.’

Ntchinthu wuli cho chatingi chichitikiyengi achinyamata wo angutoleke ku Babiloni kuchija akapolu? Kumbi yiwu atingi alutirizengi kuja akugomezeka kwaku Yehova?

“Yehova Chiuta Wanthazizosi, vyeruzgu vinu vauneneska ndipuso virunji.”—Chivumbuzi 16:7