Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 62

Ufumu Wo we Nge Chimiti Chikulu

Ufumu Wo we Nge Chimiti Chikulu

Zuŵa linyaki ndi usiku, Nebukadanezara wangulota malotu ngakofya. Iyu wangudana anthurumi ŵaki azeru kuti amukambiyi vo ngang’anamuwanga. Kweni pengavi yo waziŵanga vo ngang’anamuwanga. Pakumaliya paki, fumu yingukambiya Danyele.

Nebukadanezara wangukambiya Danyele kuti: ‘Ndalota chimiti cho chingukuwa ukongwa ndipu chingufika kumitambu. Chitenere kuti chawonekanga kwekosi pacharu. Chenga ndi mani ngakutowa kweniso vipasu vinandi. Nyama zapumuwanga mumuduzi waki ndipu tiyuni tazenganga vizimbu mu mphanda zaki. Pavuli paki, mungelu wanguza kutuwa kuchanya. Iyu wangudaniriza kuti: “Udumuwi chimiti ndipu udumuwi so mphanda zaki. Kweni siya chisina ndi misisi yaki pasi, chiŵi chakumangika chisulu ndi mkuŵa. Mtima wa chimiti usinthengi, ujengi nge wa munthu cha kweni nge wa nyama ndipu ulutirizgengi kuja viyo kwa nyengu 7. Ŵanthu wosi aziŵengi kuti Chiuta ndiyu ngwakulamuliya ndipu wangapasa ufumu weyosi yo wakhumba.”’

Yehova wanguvumbuliya Danyele vo malotu ngo ngang’anamuwanga. Danyele wati waziŵa, wanguchita mantha. Iyu wanguti: ‘Fumu, mphanyi lotu ili lenga lakukwaskana ndi arwani ŵinu kweni likwaska imwi. Chimiti cho chingudumulika, ndimwi. Ufumu winu umalengi ndipu mwamukurya uteka mudondu nge mo zichitiya nyama za mudondu. Kweni chifukwa chakuti mungelu wangukamba kuti siyani chisina, mwazamuja so fumu.’

Pati pajumpha chaka, Nebukadanezara wayendanga pachanya pa nyumba yaki yachifumu wachikamba za Babiloni. Iyu wanguti: ‘Awonani tawuni yikulu yo ndikuzenga. Awonani mo ndatchukiya.’ Pa nyengu yo walongoronga, mazu ngangutuwa kuchanya ngakuti: ‘Nebukadanezara! Sonu ufumu waku wamala.

Nebukadanezara wangufuntha nyengu yeniyo ndipu wajanga nge nyama yamudondu. Iyu wangutuwa munyumba yaki yachifumu ndi kuluta kuchija ndi nyama mudondu. Sisi laku Nebukadanezara lingukuwa ukongwa nge mavungwa nga nombu ndipu njoŵi zaki zenga nge njoŵi za chiyuni.

 Pati pajumpha vyaka 7, Nebukadanezara wanguja so umampha ndipu Yehova wangumuŵika so kuja fumu ya Babiloni. Pavuli paki, Nebukadanezara wangukamba kuti: ‘Ndithamikengi Yehova Fumu yo yikupanga kuchanya. Sonu ndaziŵa kuti Yehova ngwakulamuliya. Iyu wasisa akujikuzga ndipu wapasa ufumu kwaku weyosi yo wakhumba.’

“Kujikuzga kulongozge kukunangika ndipu mtima wakujiŵikamu uchitisa munthu kuwa.”—Nthanthi 16:18