Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 67

Mpanda wa Yerusalemu

Mpanda wa Yerusalemu

Tiyeni tikambisani vo vinguchitika pa nyengu yo ŵenga ŵechendazengi so mpanda wa Yerusalemu. Nehemiya yo wateŵetiyanga Fumu Arataserese wenga Muyisraele ndipu wajanga mutawuni ya Susa ku Perese. Muku waki waku Nehemiya yo wangutuwa ku Yuda, wanguza ndi uthenga wambula kukondwesa wakuti: ‘Ŵanthu wo akuwere ku Yerusalemu mbakuvikilirika cha. Mpanda ndi mageti ngo Ababiloni anguwisa ngakuzengeka cha.’ Nehemiya wanguguŵa. Iyu wakhumbanga kuwere ku Yerusalemu kuti wakaŵawovyi. Mwaviyo, wangupempha fumu kuti yimuzomerezi.

Zuŵa linyaki, fumu yinguwona kuti Nehemiya wakondwa cha. Iyu yingufumba kuti: ‘Ndeche ndakuwonepu we ndi chisku chambula kukondwa. Ntchinthu wuli chachitika?’ Nehemiya wangumuka kuti: ‘Ndikondwengi wuli po msumba wangu wa Yerusalemu ngwambula kuzengeka?’ Fumu yingufumba so kuti: ‘Ukhumba kuti ndikuchitiyenji?’ Mwaliŵi, Nehemiya wangupemphera cha mumtima. Iyu wangumuka kuti: ‘Chondi, mundizomerezi kuti ndiluti ku Yerusalemu kuchizenga so mpanda.’ Fumu Arataserese yingukambiya Nehemiya kuti wangaluta ndipu yingumuwovya kuti wayendi umampha ulendu waki utali. Iyu yinguŵika so Nehemiya kuja nduna ya Yuda ndipu yingumupasa vimiti vaki kuti wakazenge mageti nga mpanda.

Nehemiya wati wafika ku Yerusalemu, wanguyendere mpanda. Pavuli paki wanguwunganisa asembi ndi alongozgi ndi kuŵakambiya kuti: ‘Vinthu ve umampha cha. Tikhumbika kwambapu kugwira ntchitu.’ Ŵanthu anguzomera ndipu angwamba kuzenga so mpanda.

Ŵanthu anyaki wo atinkhanga Ayisraele, aŵanyozanga ndipu akambanga kuti: ‘Mpanda wo muzenga chinanga ndi kambwi wangawiska.’ Ayisraele anguleka cha kuzenga mpanda chinanga kuti anyozekanga. Mpanda wo wenga utali ndipuso wakukho.

Arwani wo anguŵanaŵana kuti atuliyi muvigaŵa vakupambanapambana kuti aziyukiyi Yerusalemu mwakubuchiza. Ayuda ŵati ŵavwa za pulani yo arwani ŵenaŵa angupanga, anguchita mantha. Kweni Nehemiya wangukamba kuti: ‘Kuchita mantha cha. Yehova we nasi.’ Iyu wanguŵika alonda kuti avikiliyengi ŵanthu wo agwiranga ntchitu ndipu penga pakusuzga kuti arwani aŵayukiyi.

 Angumaliza kuzenga mpanda ndi mageti kwa mazuŵa 52. Nehemiya wangudana Alevi kuti ŵazi ku Yerusalemu kuzichita phwandu lakukondwere kuti amaliza kuzenga. Iyu wanguŵika ŵanthu akumba sumu mumagulu ngaŵi. Linyaki linguserere kunyaki ndipu linyaki linguserere so kunyaki mwakuzunguliya msumba achimba. Yiwu ambiyanga Yehova mwakugwirisiya ntchitu vitoliru, mbata ndi akaligu. Ezra wanguluta ndi gulu limoza, Nehemiya nayu so wanguluta ndi gulu linyaki ndipu anguchikumana pa nyumba yakusopiyamu. Ŵanthu wosi, anthurumi, anthukazi ndi ŵana angupereka sembi kwaku Yehova ndipu anguchita phwandu. Mazu ngawu ngavwikanga kutali chifukwa chakukondwa.

“Chidya chechosi cho chingapangikiya kuti chilimbani ndi iwi chazamupunda cha.”—Yesaya 54:17