Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBURU 57

Yehova Wangutuma Yeremiya Kuti Wakapharazgi

Yehova Wangutuma Yeremiya Kuti Wakapharazgi

Yehova wangusankha Yeremiya kuti waje muchimi wa Ayuda. Iyu wangumukambiya kuti wapharazgiyi ŵanthu ndi kuŵatcheŵeska kuti aleki kuchita vinthu viheni. Yeremiya wanguti: ‘Yehova ini ndeche munamana. Ndiziŵa cha mo ndingakambisiyana ndi ŵanthu.’ Yehova wangumukambiya kuti: ‘Ungachitanga mantha cha. Ndakukukambiya vakuti ukakambi. Ndakukuwovya.’

Yehova wangukambiya Yeremiya kuti wawunganisi arara Ayuda ndipu waphwanyi chiŵiya panthazi pawu ndi kukamba kuti: ‘Yerusalemu wazamuphwanyika nge chiŵiya chenichi.’ Yeremiya wati wachita vo Yehova wangumukambiya, arara wo angukwiya ukongwa. Wasembi munyaki zina laki Pashuru, wangupuma Yeremiya ndipu angutolo chithabwa ndikuserezamu manja ndi malundi ngaki. Usiku wosi Yeremiya wanguja po angumumangiliya. Pashuru wati wamufwatuwa ndi mulenji, Yeremiya wanguti: ‘Ndifiskengi cha. Ndilekengi kupharazga.’ Kumbi wanguleka nadi? Awa. Iyu wati wayiŵanaŵaniya ukongwa ntchitu iyi, wanguti: ‘Uthenga waku Yehova wenge motu mumtima wangu. Ndilekengi cha kupharazga.’ Yeremiya wangulutiriza kutcheŵeska ŵanthu.

Pati pajumpha vyaka, fumu yinyaki yingwamba kulamuliya Yuda. Asembi ndi achimi aboza anguwutinkha uthenga wo Yeremiya wapharazganga. Yiwu angukambiya alongozgi kuti: ‘Munthu uyu wakhumbika kubayika.’ Yeremiya wangukamba kuti: ‘Asani mubayengi ini, mubayengi munthu wambula kunanga. Ndilongoro mazu ngangu cha kweni ngaku Yehova.’ Alongozgi wo ŵati ŵavwa ivi, anguti: ‘Munthu uyu watenere kubayika cha.’

Yeremiya wangulutiriza kupharazga ndipu alongozgi angukwiya ukongwa.  Yiwu angupempha fumu kuti yibayi Yeremiya. Fumu yinguŵakambiya kuti achiti chechosi cho akhumba ndi Yeremiya. Yiwu anguko Yeremiya ndikumuponya muchisimi chitali cho chenga ndi vimawulambwi ndipu aŵanaŵananga kuti wafwiyengi mwenimo. Yeremiya wangwamba kubira mu vimawulambwi.

Mura wa munyumba ya fumu zina laki Ebedimeleke, wangukambiya fumu kuti: ‘Alongozgi aponya Yeremiya muchisimi. Asani timulekengi mwenimo, wafwengi.’ Fumu yingulamula Ebedimeleke kuti wadani ŵanthu aluti nayu kuchisimi akatuzi Yeremiya. Kumbi nasi tikhumbika cha kuja nge Yeremiya yo wanguzomereza cha kuti chechosi chimutondekesi kupharazga?

“Ŵanthu wosi azakukutinkhani chifukwa cha zina langu, kweni yo wazamukunthiyapu mpaka pakumaliya ndiyu wazamutaskika.”—Mateyu 10:22

Ziŵani Vinandi

SAMBIZANI ŴANA ŴINU

Yeremiya Wanguleka Cha Kukamba Vakukwaskana ndi Yehova

Nchifukwa wuli Yeremiya wangulutirizga kukamba vakukwaskana ndi Chiuta chinanga kuti ŵanthu amunyozanga kweniso kumukwiyiya?