Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 59

Anyamata Anayi Wo Anguvwiya Yehova

Anyamata Anayi Wo Anguvwiya Yehova

Nebukadanezara wati wako mafumu nga Yuda ndi kuluta nangu ku Babiloni, wangukambiya nduna yaki Ashapenaza kuti yiŵawoneriyengi. Iyu wangukambiya Ashapenaza kuti wasankhi anyamata anthazi kweniso akutowa ukongwa pakati pa Ayuda. Anyamata ŵenaŵa, atingi akasambizikengi kwa vyaka vitatu. Masambiru yanga ngatingi ngaŵawovyengi pa ma udindu ngakulungakulu ngo atingi apasikengi ku Babiloni. Yiwu akhumbikanga kusambira kuŵerenga, kulemba ndi kulongoro chineneru cha Akaldiya chaku Babiloni. Akhumbikanga so kurya vakurya vakuyanana ndi vo fumu kweniso ŵanthu a munyumba ya fumu aryanga. Anyamata yaŵa ŵenga Danyele, Hananiya, Mishaele ndi Azariya. Ashapenaza wanguŵapasa mazina nga chibabiloni ngakuti: Belteshazara, Shadreke, Mesheke ndi Abedenego. Kumbi yiwu atingi alekengi kusopa Yehova chifukwa cha vo asambiranga?

Anyamata anayi yaŵa akhumbisisanga kuvwiya Yehova. Yiwu aziŵanga kuti akhumbikanga cha kurya vakurya vo fumu yaryanga chifukwa Marangu ngaku Yehova ngakanizanga kurya nyama zinyaki. Mwaviyo, yiwu angukambiya Ashapenaza kuti: ‘Chondi mungatichichizanga cha kurya vakurya vo fumu yiturya.’ Ashapenaza wangukamba kuti: ‘Asani mulekengi kurya ndipuso asani fumu yawona kuti muwoneka nge mutama, yindibayengi.’

Danyele wanguŵanaŵana fundu yinyaki. Iyu wangukambiya yo waŵawoneriyanga kuti: ‘Chondi tipaseni mphangwi pe ndi maji kwa mazuŵa 10.’ Pavuli paki muzitiwoni asani tazamuyanana ndi anyamata wo aturya vakurya vo fumu yiturya.’ Yo waŵawoneriyanga wanguzomera.

Ŵati aŵayesa kwa mazuŵa 10, Danyele ndi anyaki atatu awonekanga anthazi ukongwa kuruska anyamata anyawu wosi. Yehova wangukondwa chifukwa angumuvwiya. Iyu wanguwovya Danyele kuti waje ndi zeru zakuziŵa viwona kweniso malotu.

Ŵati amaliza kusambira, Ashapenaza wanguluta ndi anyamata wo kwaku Nebukadanezara. Fumu yingukambisana nawu ndipu yinguwona kuti Danyele, Hananiya, Mishaele ndi Azariya ŵenga ndi zeru ukongwa kuluska anyamata wosi. Fumu yingusankha anyamata anayi ŵenaŵa kuti akagwirengi ntchitu ku nyumba yaki ya chifumu. Kanandi yaŵafumbanga ulongozgi pa nkhani zikuluzikulu. Yehova wanguchitisa kuti aje ndi zeru kuluska anthurumi wosi azeru kweniso amasenga.

Chinanga kuti ŵenga mucharu chachilendu, Danyele, Hananiya, Mishaele ndi Azariya anguluwa cha kuti ŵenga ŵanthu aku Yehova. Kumbi nawi umukumbukengi Yehova nyengu zosi chinanga apapi waku pangawavi?

“Ungazomerezanga cha kuti weyosi wakudeleri pa unyamata waku. M’malu mwaki, uje chakuwoniyapu chamampha ku ŵanthu akugomezeka mu vakukamba, vakuchita, chanju, chivwanu kweniso jalidu lituŵa.”—1 Timote 4:12

Ziŵani Vinandi

SAMBIRANI NKHANI ZA M’BAYIBOLU

Angukana Kugwada

Shadreke, Mesheke ndi Abedenego angukana kusopa chikozgu cho fumu yaku Babiloni yingupanga.

SAMBIRANI NKHANI ZA M’BAYIBOLU

Danyele Angumuponya Muzenji la Nkharamu

Murombengi kwaku Yehova zuŵa lelosi nge mo Danyele wachitiyanga!