Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 65

Estere Wangutaska Ŵanthu a Mutundu Waki

Estere Wangutaska Ŵanthu a Mutundu Waki

Estere wenga msungwana wa Chiyuda yo wajanga mutawuni ya Susa ku Perese. Vyaka vinandi kuvuli, mutundu wa Ayuda ungutoleke ku Yerusalemu ndi Nebukadanezara. Iyu wangulereka ndi muzichi waki Mordikayi, muteŵeti waku Ahaswerusi fumu ya ku Perese.

Fumu Ahaswerusi yakhumbanga kuto fumukazi yinyaki. Ateŵeti ŵaki anguza ndi anthukazi akutowa a mucharu cho kusazgiyapu Estere. Pa anthukazi wosi yaŵa, fumu yingusankha Estere kuja fumukazi. Mordikayi wangukambiya Estere kuti wangasumuwanga cha kuti ndi Myuda.

Munthu munyaki wakujikuzga zina laki Hamani, wenga mura wa alongozgi wosi. Iyu wakhumbanga kuti weyosi wamugwadiyengi. Mordikayi wangukana kumugwadiya. Ivi vingumukwiyisa ukongwa Hamani ndipu wakhumbanga kumubaya. Iyu wati waziŵa kuti Mordikayi wenga Myuda, wangunozga kuti Ayuda wosi abayiki mucharu cho. Iyu wangukambiya fumu kuti: ‘Ayuda mbanthu akofya mukhumbika kuŵabaya wosi.’ Ahaswerusi wanguti: ‘Chita chechosi cho wakhumba ndipu wangumupasa nthazi kuti wajalikisi dangu.’ Hamani wangupanga dangu lo lakambanga kuti azibayi Ayuda pa zuŵa la nambala 13 la mwezi wa Adara. Yehova wawonanga.

Estere waziŵanga cha kuti pangujalikisika dangu lo. Mwaviyo, Mordikayi wangumutumiziya kalata yo yakambanga za dangu lenili ndipu wangumukambiya kuti: ‘Luta kwa fumu kuti ukakambisani nayu.’ Estere wanguti: ‘Weyosi yo waluta kwa fumu kwambula kudanika wabayika. Fumu yandidana cha kwa mazuŵa 30 kweni ndilutengi. Asani yachisosa nthonga yaki yakundibaya cha kweni asani yachileka kusosa yakundibaya.’

Estere wanguluta kubwalu la fumu. Fumu yati yamuwona, yingumusose nthonga. Iyu wanguluta ko kwenga fumu ndipu yingumufumba kuti: ‘Ukhumba kuti ndikuchitiyenji Estere?’ Iyu wangumuka  kuti: ‘Nditikupemphani imwi ndi Hamani kuti muzi ku phwandu.’ Ŵe pa phwandu, Estere wanguŵadaniya so ku phwandu linyaki lo watingi wanozgengi zuŵa lachiŵi. Pa phwandu lachiŵi, fumu yingufumba so kuti: ‘Ukhumba kuti ndikuchitiyenji?’ Estere wangumuka kuti: ‘Munthu munyaki wakhumba kundibaya limoza ndi ŵanthu ŵangu. Chondi titaskeni.’ Fumu yingufumba kuti: ‘Ndiyani yo wakhumba kukubaya?’ Iyu wangumuka kuti: ‘Munthu muheni uyu, Hamani.’ Ahaswerusi wangukwiya ukongwa ndipu wangulamula kuti Hamani wabayiki nyengu yeniyo.

Pengavi yo watingi watuzgengepu dangu lo Hamani wangujalikiska, chinanga ndi fumu. Chinanga kuti venga viyo, fumu yinguŵika Mordikayi kuja mura wa alongozgi ndipu yingumupasa mazaza ngakuti wajalikiski dangu linyaki. Mordikayi wangujalikiska dangu lo lazomerezanga Ayuda kuti ajivikiriyengi asani arwani ŵawu atiŵayukiya. Pa zuŵa la nambala 13 la mwezi wa Adara, Ayuda anguthereska arwani ŵawu. Kutuliya nyengu iyi, chaka chechosi Ayuda achitanga chikondwereru pa zuŵa lenili chifukwa anguthereska arwani ŵawu.

“Azakukutoliyani kwa ŵaraŵara a boma ndi mafumu chifukwa chaku ini kuti ukaje ukaboni kwaku yiwu kweniso ku ŵanthu amitundu yinyaki.”—Mateyu 10:18