Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 60

Ufumu Wo Wazamuja kwa Muyaya

Ufumu Wo Wazamuja kwa Muyaya

Zuŵa linyaki ndi usiku, Nebukadanezara wangulota malotu ngakuziziswa. Malotu ngenanga ngangumusuzga maŵanaŵanu ndipu wangutondeka kugona. Iyu wangudana amasenga ŵaki ndipu wangukamba kuti: ‘Ndikambiyeni vo ndalota.’ Yiwu angumuka kuti: ‘Tikambiyeni ndimwi fumu vo mwalota.’ Nebukadanezara wanguŵakambiya kuti: ‘Awa! Imwi ndimwi mukambi vo ndalota ndipu asani mutondekengi ndikubayeningi.’ Yiwu angumukambiya kuti: ‘Tikambiyeni malotu nginu ndipu pavuli paki timukambiyeningi vo ngang’anamuwa.’ Iyu wanguti: ‘Mosi mukhumba kundipusisa. Ndikambiyeni vo ndalota!’ Yiwu angukambiya fumu kuti: ‘Palivi munthu pacharu chapasi yo wangakamba vo munthu walota. Vo mwafumba vingachitika cha.’

Nebukadanezara wangukwiya ukongwa ndipu wangulamula kuti anthurumi wosi azeru wo ŵenga mucharu chaki abayiki. Ŵanthu wo atingi abayikengi asazgangapu Danyele, Shadreke, Mesheke ndi Abedenego. Danyele wangupempha fumu kuti yiŵalindizepu dankha. Pavuli paki, iyu ndi anyaki wo wenga nawu, anguromba kwaku Yehova ndi kumupempha kuti waŵawovyi. Kumbi Yehova wanguchita wuli?

Mu chiwona, Yehova wanguziŵisa Danyele malotu ngo Nebukadanezara wangulota ndipuso vo ngang’anamuwanga. Mawa laki, Danyele wanguluta kwa munthu yo wateŵetiyanga fumu ndipu wangukamba kuti: ‘Anthurumi wosi azeru mungaŵabayanga cha. Ini ndingakamba vo fumu yalota.’ Muteŵeti yo wanguluta ndi Danyele kwaku Nebukadanezara. Danyele wangukambiya fumu kuti: ‘Chiuta wavumbuwa vo vikuchitikiyeningi kunthazi. Malotu ngo mwalota ngakuti: Munguwona chikozgu chikulu cho chenga ndi mutu wa golidi, nganga ndi manja venga va siliva, rufu ndi viŵa venga va mkuŵa, misolonthi yenga ya chisulu ndipu maphazi ngenga ngakusazganikana chisulu ndi dongu. Pavuli paki, mwa ungudumulika kutuwa ku phiri ndipu unguphwanya maphazi nga chikozgu. Chikozgu cho chinguphwanyika kuja fuvu ndipu fuvu lo linguputa ndi mphepu. Mwa unguja phiri likulu ndipu linguzaza charu.’

 Wati wakonkhosa ivi Danyele wanguti: ‘Malotu nginu ngang’anamuwa kuti: Ufumu winu ndi mutu wa golidi. Ndipu siliva wamiya ufumu wo wazamuŵapu pavuli pinu. Pazamuja so ufumu wo wazamuyanana ndi mukuŵa ndipu wazamulamuliya charu chosi. Ufumu wakulondopu, wazamuja wakukho nge chisulu. Pakumaliya, pazamuja ufumu wo wazamugaŵikana, wo wazamukuŵa ndi vigaŵa vinyaki vakukho nge chisulu ndipu vinyaki vambula kukho nge dongu. Mwa wo unguja phiri, ndi Ufumu waku Chiuta. Yiwu wazamutuzapu maufumu ngosi ndipu wazamujaku kwamuyaya.’

Nebukadanezara wanguwa kavunama panthazi paku Danyele. Iyu wanguti: ‘Chiuta waku wakuvumbuliya malotu yanga. Palivi Chiuta wakuyanana nayu.’ M’malu mwakubaya Danyele, Nebukadanezara wangumuŵika kuŵa mulongozgi wa anthurumi wosi azeru ndipuso kuti walamuliyengi ku Babiloni. Kumbi uwona mo Yehova wangumukiya rombu laku Danyele?

“Ndipu mazu ngakukambirika ngo, nganguŵawunganisiya kumalu ngo mu Chiheberi ngadanika kuti Aramagedoni.”—Chivumbuzi 16:16