Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Sambirani Nkhani za m’Bayibolu

 SAMBIRU 1

Chiuta Wakupanga Kuchanya ndi Charu Chapasi

Chiuta Wakupanga Kuchanya ndi Charu Chapasi

Yehova Chiuta ndi Mulengi widu. Iyu ndiyu wakupanga vinthu vosi, vo tiwona ndi vo tileka kuviwona. Wechendapangi vinthu vo tiwona, wangulenga angelu anandi ukongwa. Kumbi utiŵaziŵa angelu? Angelu ŵenge Yehova ndipu iyu ndiyu wakuŵalenga. Nge mo tileke kumuwone Chiuta, angelu nawu tingaŵawona cha. Mungelu wakwamba yo Yehova wangupanga ndiyu wangumuwovya kupanga vinthu. Iyu wangumuwovya kulenga nyenyezi, mapulaneti ndi vinthu vinyaki vosi. Yimoza mwa mapulaneti ngenanga ndi charu chapasi chakutowa cho tijamu.

Yehova wangunozga charu chapasi kuti nyama ndi ŵanthu ajengemu. Wanguchitisa kuti lumwi liŵaliyengi charu chapasi. Wangupanga so mapiri, nyanja zikuluzikulu ndi misinji.

Ntchinthu wuli so cho wangupanga? Yehova wangukamba kuti: ‘Ndipangengi uteka, maluŵa ndi vimiti.’ Mwaviyo, mitundu yakupambanapambana ya vipasu, mphangwi ndi maluŵa vingwamba kume. Pavuli paki, Yehova wangulenga so nyama ndi viyuni vakupambanapambana. Nyama zinyaki zenga zakusambira mumaji ndipuso zakukwaŵa. Iyu wangupanga nyama zimanazimana nge akalulu ndipuso zikuluzikulu nge njovu. Kumbi iwi utanja nyama niyi?

Yehova wati wapanga venivi, wangukambiya mungelu wakwamba kuti: “Tiyi tipangi munthu.” Ŵanthu atingi ajengi akupambana ndi nyama. Yiwu atingi apangengi vinthu. Atingi alongorongi, kuseka ndi kupemphera. Atingi so aphweriyengi charu ndi nyama. Kumbi utimuziŵa munthu yo  wangwamba kumulenga? Tiyi tiwoni.

“Pakwamba Chiuta wangulenga kuchanya ndi charu chapasi.”—Chiyambo 1:1