Julani

Lutani pa vo ve mukati

Viŵanda Vichiska Ŵanthu Kuti Agarukiyengi Chiuta

Viŵanda Vichiska Ŵanthu Kuti Agarukiyengi Chiuta

Midawuku yinyaki yichitika chifukwa cha boza lakuti akufwa akhoza kutiwona

Kumbi nchifukwa wuli Satana ndi viŵanda vaki atesesa kuti apusikengi ŵanthu? Chifukwa chakuti akhumba kuti nasi so tigarukiyi nawu limozi. Akhumba kuti tiŵasopengi. Akhumba kuti tigomezgengi maboza ngawu ndi kuti tichitengi vinthu vambula kukondweska Yehova. Vinandi mwa vakuchitika venivi visazgapu midawuku yakukwaskana ndi ŵanthu akufwa.

Nyifwa ya wakwanjiwa widu nchinthu chimoza mwa vinthu vakupweteka ukongwa m’maŵanaŵanu, ndipu kuliya nkhwakwenere. “Yesu wanguliya,” mubwezi waki Lazaro wati wafwa.—Yohane 11:35.

Pe midawuku yinandi yakukwaskana ndi nyifwa, ndipu yipambanapambana malinga ndi malu. Yinandi yisuskana cha ndi fundu za m’Bayibolo. Kweni midawuku yinyaki, yichitika chifukwa chakugomezga kuti akufwa mbamoyu ndipu akhoza kuwona vo ŵanthu amoyu achita. Kuchereza pa maliru, kuliya kwambula makoleka, ndipuso midawuku ya maliru yakujumpha mwesu yichitika chifukwa chakopa mizimu ya ŵanthu akufwa. Pakuti ŵanthu akufwa “aziŵa kanthu cha,” wosi wo achita vinthu ivi atovya Satana pa boza laki.—Wakutaula 9:5.

Midawuku yinyaki yichitika chifukwa cha boza lakuti akufwa akhumbika kuŵawovya

 Midawuku yinyaki yichitika chifukwa chakugomezga kuti akufwa akhumba kuti amoyu aŵawovyi ndipu asani angaleka kuŵakondweska mbwenu apwetekekengi. Mu vyaru vinyaki achita sadaka asani pajumpha mazuŵa 40 pamwenga chaka chimoza kutuwa po munthu wakufwiya. Ivi atiti vitovya kuti munthu yo wakufwa ‘wasamiyi’ ku malu nga mizimu. Anyaki atanja kupereka chakurya ndi vakumwa ku ŵanthu wo akufwa.

Kuchita vinthu ivi nkhuheni, chifukwa kutovya Satana pa boza laki lakukwaskana ndi ŵanthu akufwa. Kumbi Yehova wangakondwa nasi asani tichita mudawuku wewosi wakukwaskana ndi visambizu va viŵanda? Awa!—2 Ŵakorinte 6:14-18.

Ateŵeti aku Chiuta wauneneska achitaku cha vinthu vo vitovya kuti boza laku Satana liluti panthazi. M’malu mwaki, yiwu atesesa kovya ndi kupembuzga mwachanju ŵanthu amoyu. Yiwu aziŵa kuti asani munthu wafwa, Yehova yija ndiyu wangamuyuska.—Jobu 14:14, 15.

 Chiuta Wazomerezga cha Kuchita Vamizimu

Ŵanthu anyaki achita va mizimu pakuŵija pamwenga kuziya mwa ŵanthu akukambiskana ndi mizimu. Ivi vidanika kuti kugomezga mizimu. Kusopa mizimu, ufwiti, masenga, kuwombeza, kufumba akufwa, ndi mitundu ya kugomezga mizimu.

Chiuta wazomerezga cha vinthu viheni. Wakhumba kuti titeŵetiyengi iyu pe.—Chituwa 20:5

Bayibolo lisuska vinthu ivi, ndipu likamba kuti: “Kungachisanirika cha mukati mwinu nanga njumoza . . . wakombeza, chanusi, pamwenga mungoma, pamwenga fwiti, pamwenga wakusinkha, pamwenga wakudana mizimu ya ŵakufwa. Pakuti weyosi wakuchita vinthu ivi mbukazuzi ku Ambuya [Yehova].”—Marangu 18:10-12.

Kumbi nchifukwa wuli Yehova watititcheŵeska mwanthazi viyo pa nkhani yakuchita vinthu venivi?

Yehova watititcheŵeska kuti tingachitanga cha mtundu wewosi wakugomezga va mizimu ndi  chilatu chakuti vinthu vitiyendiyengi umampha. Iyu watanja ndi kuphwere ŵanthu, ndipuso waziŵa kuti ŵanthu wosi wo akoliyana ndi viŵanda asuzgika.

Yumoza mwa ŵanthu yaŵa wenga Nilda wa ku Brazil, yo walongoronga ndi mizimu. Viŵanda vingumuchitiska kuti waje umoyu wakusuzgika. Iyu wakamba kuti: “Ndingukoleka ndi . . . mizimu, ndipu yandikambiyanga vakuchita. Ndafwanga chipoyu kaŵikaŵi, ndipu ndasuzgikanga ndi matenda nga maŵanaŵanu. Viŵanda vingunditombozga ukongwa mwakuti vingukwaska maŵanaŵanu ngangu. Ndingwamba kumwa munkhwala wakugoneska tulu, kumwa moŵa ndipuso kukweŵa foja kwambula kulekeza. Ivi vinguchitika kwa vyaka vinandi.”

Kanandi ŵanthu wo achita va mizimu asuzgika ukongwa. Angataya nyumba yawu, wanangwa wawu, ndipuso umoyu wawu

Chifukwa chakuwovyeka ndi Yehova kweniso ateŵeti ŵaki, Nilda wangufwatuka ku nthazi ya viŵanda ndipu sonu waja umoyu wamampha ukongwa. Iyu watiti: “Ndichiska mosi kuti mungayesanga cha, chinanga nkhamanavi, kukoliyana ndi mizimu [yiheni].”